2 Samweli 10

Daudi nasinga Abaamoni n'Abasiria

(1Ma 19:1-19)

1Ahanyuma Omukama w'Abaamoni afa, omutabani Hanuni amusikira. 2Daudi agamba ati, “Ndagilira Hanuni mutabani wa Nahashi obufura nk'okwo ishe yangiliire obufura.” Aha rw'ekyo atuma abaramatabe kumumaramara aha rw'okuferwa ishe. Kabagobire omu nsi y'Abaamoni, 3abebembezi b'Abaamoni bagambira Hanuni Omukama wabo bati, “Nolenga oti okuba Daudi yakutwekera ab'okukumaramara, nakunira sho? Yakutwekera abaramatabe kumanyuruza ekigo n'okukinyomoza kwija akakitera.” 4Aho Hanuni akwata abaramata abo abamoisa ebileju orubaju rumoi, ashara emyendo yabo omugati kugoba omu matako mara abataishura. 5Kababigambiire Daudi atuma ab'okugya kubabuganganwa, kuba bakaba baina enshoni zingi kwija Yerusalemu kugaruka owabo. Omukama abaragiraho ati, “Mwikare Yeriko, mubanze mumerwe ebileju nirwo muragaruka.”

6Abaamoni kababoine okwo bayetamisa Daudi, batuma kukodi Abasiria ba Betirehobu n'aba Zoba. Bakodi abaisherukare b'amaguru 20,000. Bakodi n'Omukama wa Maaka n'abaisherukarebe 1,000, n'aba Tobu 12,000. 7Daudi kubihulira asindika Yoabu n'eihe lyona ly'abaisherukare emanzi. 8Abaamoni baturuka betekatekera endashana aha kishasi ky'ekihigi. Abasiria ba Zoba n'aba Rehobu, n'abaisherukare ba Tobu na Maaka bakaba bali bonkai omw'ishwa.

9Orwo Yoabu yaboine okwo endashana yamutanga enyuma n'omu maisho, omw'ihelye arondamu abaisherukare emanzi za Isiraeli abateka orujuru omu maisho g'Abasiria. 10Abasigaireho abakwasa Abishai omurumuna, ogwo abateka orujuru omu maisho g'Abaamoni. 11Agamba ati, “K'Abasiria barankiza amani aho oije onjune, kandi k'Abaamoni barakukiza amani aho ndaija nkujune. 12Omanzare. Tumanzare, turashanire abantu n'ebigo bya Ruhanga waitu; Omukama akore okwo alikwenda.” 13Aho Yoabu n'abaisherukare abo yabaire ainabo bagya omu maisho kutera Abasiria. Abasiria bamwiruka. 14Orwo Abaamoni baboine okwo Abasiria bairuka Yoabu, nabo bairuka Abishai, bataha omu kigo. Ahanyuma Yoabu aleka Abaamoni, agaruka Yerusalemu.

15Kyonkai Abaramu kababoine okwo Abaisiraeli babasinga, baterana hamoi. 16Hadadezeri atuma aha Abasiria ababaire batwire buseli bw'Omwiga Efurati baija Helamu bebembeirwe Shobaki omukuru w'eihelye. 17Kabagambire Daudi, nawe yahuruza Abaisiraeli bona, bashabuka Yorudani bataha Helamu. Abasiria bateka enjuru bolekeire Daudi, barashana nawe. 18Kyonkai bakaterwa Abaisiraeli bairuka. Omu Basiria abo Daudi akaitamu abaisherukare 700 ababaire nibarwanira omu magali, yaitamu ab'efarasi 40,000, yahutaza na Shobaki omukuru w'eihe lyabo, yafera aho. 19Abakama ababaire bali bairu ba Hadadezeri kababoine okwo Abasiria basingwa Abaisiraeli, bayehongera Abaisiraeli abo, mara babakolera. Abasiria batina, tibashubire kujuna Baamoni.

Currently Selected:

2 Samweli 10: RHAY01

Highlight

Copy

Compare