2 Samweli 11

Obufu bwa Daudi

1Omu mbandizo y'omwaka, omu makiro ag'abakama batabaliramu, Daudi atuma Yoabu n'abaramatabe n'eihe lyona lya Isiraeli, basilikya Abaamoni, kandi babunda Raba. Kyonkai Daudi aikara Yerusalemu.

2Ekiro kimoi eizoba lyaija kutobera Daudi aimuka aha kitandakye, agendagenda aha rushwi rw'enju y'Omukama. Kayabaire ayemeleireho abona omukazi nayoga. Omukazi ogwo hakaba ali murungi muno. 3Daudi yatuma kumubaliliza. Omuntu omoi agamba ati, “Ogu ni Batisheba muhara wa Eliamu, ni muka Uria, Omuhiti.” 4Nikwo Daudi kutuma entumwa zikamuleta omwe, yabyama nawe, aha rw'okuba hakaba yazirukire. Ahanyuma agaruka omuka. 5Atwara enda; mara aragiraho Daudi ati, “Nyina enda.”

6Aho Daudi atuma ahali Yoabu ati, “Ontwekere Uria, Omuhiti.” Yoabu amumutwekerakwo. 7Orwo Uria yamugobire, Daudi yamubaza amakuru ga Yoabu n'abaisherukare n'ag'endashana. 8Ahanyuma amugira ati, “Ogende omwawe, onabe amaguru.” Uria aruga nyaruju omw'Omukama, Omukama amuhondeza eby'okumugabira. 9Kyonkai Uria akarara n'abairu ba Mukamawe aha kishasi kya nyaruju y'Omukama, owe tiyagiireyo. 10Orwo bagambire Daudi bati, “Uria owe tagiireyo,” Daudi yagambira Uria ati, “Manya iwe orugire omu tabaro, mbwenu kubaki otagiire wawe?” 11Uria amuhorora ati, “Esanduku na Isiraeli na Yuda bali omu nsisira, mara Mukama wange Yoabu n'abairu ba Mukama wange basisiire omw'ishwa. Aho inye ngende omwange kulya nkanywa nkabyama na mukazi wange? Mwoyo gwawe, ekyo tindikwija kukikora.” 12Nikwo Daudi kumugambira ati, “Na kir'eki ikara hanu, nyenkya ndakutaishura.” Kityo kir'ekyo n'ekyahondeireho Uria aikara Yerusalemu. 13Daudi amuraliza, alya nawe, amunyoisa amutamiiza. Bwaigoro ashohora abyama aha kitandakye hamoi n'abairu ba Mukamawe; kyonkai owe tiyagiireyo.

14Kabwakeire Daudi ahandikira Yoabu ebarua mara agitweka Uria wenene. 15Omu barua ahandika ati, “Ote Uria omu maisho bwatana mbali endashana eina amani, ahanyuma mugaruke enyuma mumusigeho bamutere afe.” 16Orwo Yoabu yabaire nabunda ekigo, ata Uria aha mwanya mbali yabaire namanya okwo haliho abashaija emanzi. 17Abanyakigo bashohora kurwana na Yoabu; abairu ba Daudi abandi bafa. Uria Omuhiti nawe abugenderanamu afa. 18Yoabu atuma entumwa kugambira Daudi amakuru gona g'endashana. 19Entumwa yagiragilira ati, “Orwo oramara kugambira Omukama amakuru gona g'endashana, 20akanigara, akakubaza ati, ‘Kubaki murashaine mukagoba ekigo haihi? Mubaire mutalikumanya okwo bakwemire aha rukuta eiguru bakarasha emyambi? 21Abimeleki eya Yerubesheti akaitw'ohai? Ti mukazi ayayemire aha rukuta eiguru akamutenekera enseiso?’ Iwe aho omugambire oti, ‘Omwiru wawe Uria Omuhiti nawe afire.’ ”

22Entumwa egenda; kayagobire yagambira Daudi byona ebyo yabaire amutumire kugamba. 23Emugambira eti, “Ababisha batushagisize amani bashohora batutelera omu rweya; kyonkai tubafunyire twabagobya omu kishasi ky'ekihigi. 24Nikwo abarasi b'emyambi kurasha ababisha bawe bemire aha rukuta eiguru. Abairu b'Omukama abandi bafire n'omwiru wawe Uria Omuhiti yabugenderanamu.” 25Daudi agambira entumwa ati, “Ogye ogambire Yoabu oti, ‘Ekyo kitakwita kubi, okuba embanda eita ogu, eshuba eita oli. Oteho amani kurashanisa ekigo, okikambure.’ Mara omugumisilize.”

26Orwo muka Uria yahuliire okwo iba afire, amuchulira. 27Kandi okuteka orufu kakwahoire, Daudi yamutuma yamutahya omwe, yaba mukaziwe, ahanyuma yamuzalira omwana w'omwojo. Kyonkai ekyo Daudi yakozire kikatama Omukama.

Currently Selected:

2 Samweli 11: RHAY01

Highlight

Copy

Compare