1 Samweli 6
6
Esanduku y'Endagano negaruka
1Esanduku y'Endagano ekaikara omu nsi y'Abafilisiti emyezi mushanju. 2Abafilisiti beta abakuhani n'abafumu bababaza bati, “Esanduku y'Omukama tugigire tutai? Mutumanyise okwo turagigarurayo.” 3Abakuhani n'abafumu babagira bati, “Kamuragarurayo Esanduku ya Ruhanga wa Isiraeli, mutagigarurayo bushai. Mugire ekyo mwagitaho kuliha obufu bwanyu nirwo murakira. Aho nirwo muramanya ekyo abaire naikara ababonaboneize.” 4Abafilisiti babaza bati, “Ndihiki eyo turamugilira?” Bagamba bati, “Ebizimba by'ezahabu bitanu n'embeba z'ezahabu itanu, kuhonderana n'orubara rw'abatwazi banyu, okuba inywena hamoi n'abatwazi banyu muteirwe ekibundo kimoi. 5Aha rw'ekyo mukore ebishushani by'ebizimba byanyu, n'eby'embeba zanyu ezilikwita ensi, mara muhe Ruhanga wa Isiraeli ekitinwa, rundi yakulekera kubabonabonyia na baruhanga banyu n'ensi yanyu. 6Kubaki nimusikiira emitima nka Farao n'Abamisiri? Orwo Ruhanga yabahindwire bafera tirwo bataishwire Abaisiraeli bakagenda? 7Ahonu mbwenu kwata egali emoi empya muzikome aha nte ibili ezilikwonkya ezitakakomwagaho nkomo, kyonkai enyana ezo muzizihyeho muzishubye omuka. 8Mukwate Esanduku y'Omukama mugite omu gali, kandi eshanduku endijo egili aha rubaju mugitemu ebintu by'ezahabu eby'okumulihira mugitaishure egende. 9Kandi mulebe; k'eragenda eyolekeire ensi yayo, Betishemeshi, nikwo kugir'oti Ruhanga wa Isiraeli niwe atuteize ekibundo ky'amani eki. Kakitabaire kityo, turamanya okwo tiwe atuhaire kibonabonyio, kitugwireho bushai.” 10Abafilisiti abo bakora batyo. Bakwata ente ibili ezilikwonkya, bazikomaho egali, kandi enyana zazo bazikomerana omu nju. 11Egali bagitamu Esanduku y'Omukama, n'eshanduku elimu embeba z'ezahabu, n'ebishushani by'ebizimba byabo. 12Ente zikwatira kimoi nyaihanda elikugya Betishemeshi; zigenda nizijuga, zitalikuhinduka bulyo anga bumosho, mara abatwazi b'Abafilisiti bagenda bazihondeire kulemwa kuhika omu rubibi rwa Betishemeshi. 13Omu kanya ako abantu ba Betishemeshi bakaba nibagesha engano omu ruhanga. Kabanagire amaisho bakabona Esanduku bashemelerwa. 14Egali egoba omu ndimiro ya Yoshua Omubetishemeshi, eba nimwo eyemelera. Hakaba haliho eibare lihango. Basa emiti y'egali, ente bazitambira Omukama ekitambo ky'okwokibwa. 15Esanduku y'Omukama n'esanduku eyabaire egili aha rubaju einamu ebintu by'ezahabu, Abalevita bazita aha ibare lihango. Kir'ekyo abantu ba Betishemeshi batambira Omukama ebitambo by'okwokibwa, bamutambira n'ebitambo ebindi. 16Abatwazi batanu b'Abafilisiti kabaaboine byaba bityo, kiro kyonene ekyo bagaruka Ekironi.
17Ebi nibyo bizimba by'ezahabu eby'Abafilisiti balesire nk'endihi aha Mukama: Ekya Ashidodi kimoi, ekya Gaza kimoi, ekya Ashikeloni kimoi, ekya Gati kimoi n'ekya Ekironi kimoi. 18N'embeba z'ezahabu kuhonderana n'orubara rw'ebigo by'Abafilisiti ezatwarwaga abatwazi batanu bizingoirwe enkuta n'ebyaro. Eibare lihango ely'omu ndimiro ya Yoshua Omubetishemeshi elyo bataireho Esanduku y'Omukama, bujulizi bw'ebyabaireho kugoba mwaha.
19Omukama akaita abantu nshanju ba Betishemeshi okuba bakalinguliza omu Sandukuye. Aho abantu bachura orwo yabateize ekibundo kihango kityo. 20Ahanyuma abantu ba Betishemeshi bagamba bati, “N'ohai ayakushobora kwemelera omu maisho g'Omukama Ruhanga ogu Omutakatifu? Esanduku egi eturugeho, manya egye owa bahai?” 21Aho batuma entumwa aha banyansi ba Kiriatiyearimu, nibagamba bati, “Abafilisiti bagarwire Esanduku y'Omukama. Abafilisiti bagigarwire, mwije mugitware owanyu.”
Currently Selected:
1 Samweli 6: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
