1 Samweli 7
7
1Abantu ba Kiriatiyearimu baija batwara Esanduku y'Omukama bagitahya omwa Abinadabu, aha kabanga. Batendeka Eleazari omutabani kugilinda.
Samweli naba muramuzi wa Isiraeli
2Kwema kiro ekyo Esanduku yabandize kwikara Kiriatiyearimu, ekahinguraho omwanya gurai emyaka 20 eihanga lyona lya Isiraeli nilitakira Omukama.
3Samweli agambira eihanga lya Isiraeli ati, “Kamuraba nimugaruka aha Mukama n'omutima gwanyu gwona, muturukye baruhanga abanyamahanga mubanage; munage n'ebishushani bya Ashitaloti. Mugume aha Mukama mufukamire wenene wenkai, aho arabaihya omu mikono y'Abafilisiti.” 4Kityo Abaisiraeli baturukya ebishushani bya Baali na Ashitaloti babinaga, bafukamira Omukama wenkai.
5Ahanyuma Samweli agamba ati, “Isiraeli yona mugihurulize Mizipa nyije mbashabire aha Mukama.” 6Abaisiraeli bona bahurulira Mizipa, bataha amaizi bagashesha omu maisho g'Omukama, kir'ekyo basiiba, bagamba bati, “Tufakaliire Omukama.” Samweli aba muramuzi w'Abaisiraeli ayemire Mizipa. 7Aho Abafilisiti kabahuliire okwo Abaisiraeli bahuruliire Mizipa, abatwazi babo babatabalira. Abaisiraeli kuhulira byaba bityo batina Abafilisiti. 8Bagambira Samweli bati, “Otesiza, otalekera kututakilira aha Mukama Ruhanga waitu, oturokore aha mikono y'Abafilisiti.” 9Aho Samweli akwata entaama elikwonkya, agitambira Omukama ekitambo ky'okwokibwa, atakilira Isiraeli aha Mukama. Omukama amuhorora. 10Orwo Samweli yabaire natamba ekitambo ekyo, Abafilisiti bagoba kutera Isiraeli. Kyonkai kir'ekyo Omukama ahinda n'eiraka lihango, atabangura Abafilisiti, baterwa Abaisiraeli. 11Aho abaisherukale ba Isiraeli baruga Mizipa, babinga Abafilisiti, babatera babagobya eifo ya betikari.
12Samweli akwata eibare alisimba omugati ya Mizipa na Yeshana, aliruka eibara Ebenezeri, nikwo kugamba ati, “Kuhika mwaha Omukama atujunire.” 13Abaisiraeli bafunfuniza Abafilisiti, baba batakitaha rundi mu nsi ya Isiraeli, mara omu biro bya Samweli byona, Omukama aikara ashasize Abafilisiti abo. 14Ebigo ebyo Abafilisiti babaire banyagire omuli Isiraeli byagarukira Abaisiraeli, kwema Ekironi kuhika Gati. Abaisiraeli banyaguruza ensi yabo omu mikono y'Abafilisiti. Kandi Abaisiraeli n'Abaamoni bakagira emilembe.
15Samweli akaramura Isiraeli oburorabwe bwona. 16Buli mwaka yarabaga Betheli, Giligali na Mizipa naramura Isiraeli. 17Ahanyuma nirwo yagarukaga Rama, kuba ekaye niyo yabaire eli, mara nayo yaramuliragayo. Akombekerayo n'Omukama ealutare.
Currently Selected:
1 Samweli 7: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
