1 Samweli 4
4
Esanduku ly'Endagano nenyagwa
1Omu biro ebyo Abafilisiti bahurura kurashanisa Isiraeli, aho Abaisiraeli nabo batabara kurashana n'Abafilisiti abo. Basisira Ebenezeri, n'Abafilisiti basisira Afeki. 2Abafilisiti bateka orugamba kutera Abaisiraeli. Endashana kayaranzire, Abaisiraeli baterwa; Abafilisiti baitamu abantu nka 4,000 omu ndashana egyo. 3Abantu kabagarukire omu nsisira, abagurusi ba Isiraeli bagamba bati, “Kubaki mbwenu Omukama yatuleka kuterwa Abafilisiti? Esanduku y'Endagano y'Omukama tugihye Shilo tugilete kunu, tute nitugenda nayo nirwo aratwiha omu mikono y'ababisha baitu.” 4Aho abantu bagira abo batuma Shilo, baihyayo Esanduku y'Endagano y'Omukama w'amahe abandaire aha bakerubi. Batabani ba Eli bombili Hofuni na Finehasi bakaija n'Esanduku egyo.
5Esanduku y'Endagano y'Omukama kayagobire omu nsisira Abaisiraeli batokera n'ensi etamu orusharo. 6Abafilisiti kabahuliire orutokero orwo bagamba bati, “Orutokero oru orungi omu nsisira z'Abaheburania rwaki?” Kabamanyire okwo Shanduku y'Omukama yaija omu nsisira, 7batina, bagamba bati, “Ruhanga yaija omu nsisira.” Bashuba bati, “Zatulya! Okuba ekyab'eki tikikabagaho kwema akarai kona! 8Zatulya! N'ohai aratwihya omu mikono ya baruhanga aba ab'amaani? Aba nibo baruhanga abateize Abamisiri ebibundo bya buli ngeli omw'irungu. 9Guma, kwata mashaija Bafilisiti, mutakwija mukaba bairu b'Abaheburania, nk'okwo bonene babaire bali bairu banyu; kwata mashaija, murashane.”
10Abafilisiti barashana, Isiraeli esingwa, buli muntu airukira omw'ihemalye, bakaitwa abantu bangi muno. Omuli Isiraeli abaisherukale ab'amaguru abaisirwe 30,000. 11Esanduku ya Ruhanga baginyaga, na batabani ba Eli bombili, Hofuni na Finehasi, babaita.
Okufa kwa Eli
12Omuntu omoi w'oruganda rwa Benjamini aruga omu rugamba airuka, agoba Shilo kir'ekyo kyonene, emyendoye etemwirwe n'eitaka limuli omu mutwe. 13Orwo yagobire, Eli akaba ali aha muhanda alindiliire, ashuntamire aha kitebe nahangarwa Esanduku ya Ruhanga. Omubenjamini ogwo kayagobire akabarura amakuru ago omu kigo, ekigo kyona kiboroga. 14Eli kuhulira orwashano abaza ati, “Orwashano orwo rwaki?” Aho omubenjamini olinya ayanguha amugoba amubarulira. 15Eli akaba aina emyaka 98 na munana, yahumire n'amaisho atakibona. 16Omubenjamini amugambira ati, “Inye kir'eki naruga omu ndashana, nairuka.” Eli amubaza ati, “Byaba bitai, mwana wange?” 17Ogwo ayalesire amakuru ahorora ati, “Abaisiraeli bairuka Abafilisiti, bafa abantu bangi, na batabani bawe bombili Hofuni na Finehasi babaita, n'Esanduku ya Ruhanga abaginyaga.” 18Kayagambire aha Shanduku ya Ruhanga, Eli aruga aha ntebe aha kihigi agwa ekinyangaramira, ahendeka ebikya, afa, kuba akaba ali mukuru muno, mara muhango. Akaramura Isiraeli emyaka 40.
Okufa kwa muka Finehasi
19Omukamwana, muka Finehasi akashangwa aina enda, ali haihi kuzara. Kayahuliire amakuru g'okunyagwa kw'Esanduku ya Ruhanga, n'okwo ishezara yafa, na iba kwakwo, aho honkai arumwa, abandama ahansi azara. 20Kayabaire nafa, abakazi ababaire bamuliho bamugambira bati, “Otatiina, kuba wazara omwana w'omwojo.” Kyonkai wenene ebyo tiyabyetaireho n'okuhorora chei. 21Omwana eibara amweta Ikabodi, nagamba ati, “Ekitiinwa kyasigaho Isiraeli,” aha rw'okunyagwa kw'Esanduku ya Ruhanga n'aha rwa ishezara na iba. 22Agamba ati, “Isiraeli yarugwaho ekitinwa, orwo Esanduku ya Ruhanga baginyaga.”
Currently Selected:
1 Samweli 4: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
