1 Samweli 3
3
Omukama nahabukira Samweli
1Omwana Samweli akolera Omukama omu mikono ya Eli. Mara omu bir'ebyo ekigambo ky'Omukama kikaba kihambire, n'okubonekerwa kukaba kutaliho. 2Omu kiro kimoi Eli abyamire omu kiyumbakye, mara aho yabandize kuhuma amaisho atakibonage, 3etara ya Ruhanga etakaraire, na Samweli abyamire omuli Rwensinga y'Omukama mbali Esanduku ya Ruhanga yabaire eli, 4Omukama ayeta Samweli. Samweli ayetabuka ati, “Kaboneke waitu!” 5Airuka agoba Eli amugambira ati, “Waitu wanyeta, naizire.” Kyonkai Eli amugira ati, “Tinkakwesire, oshubeyo obyame.” Agarukayo abyama. 6Omukama ashuba ayeta ati, “Samweli.” Aho Samweli aimuka agya agoba Eli, amugambira ati, “Waitu, wanyeta, naizire.” Kyonkai Eli amugambira ati, “Mwana wange, tinkakwesire, oshubeyo obyame.” 7Samweli akaba atakamanyire Mukama mara ataina kigambo kyoyamushuruliire. 8Omukama ashuba ayeta Samweli omurundi gwa kashatu. Aimuka agya ahali Eli amugambira ati, “Waitu, wanyeta naizire.” Ahanyuma Eli akenga okwo Omukama niwe alikweta omwana ogwo. 9Nikwo Eli kugambira Samweli ati, “Ogende obyame, k'arashuba akakweta ogambe oti, ‘Mukama hanga, kuba omwiru wawe nahulira.’ ” Samweli ashuba omu kiyumbakye abyama.
10Omukama aija ayemelera, ayeta nk'orwa mbere ati, “Samweli, Samweli.” Samweli ahorora ati, “Mukama hanga, kuba omwiru wawe nahulira.” 11Aho Omukama amugambira ati, “Ekiro kimoi nyina ekyo ndikora omuli Isiraeli; buli omoi alikihulira amatwi galimwana. 12Kir'ekyo nirwo ndigobesheleza byona ebyo nagambire kugwera eka ya Eli. 13Namugambire okwo ndibonabonyia ekaye ebiro byona aha rw'entambara ey'alikumanya, kuba abatabani bakandogotaho tiyabatangire. 14Nikwo ndikurahilira ekaye okwo entambara yabo ebiro byona thaliho kitambo anga kihongo kiligyatilira.”
15Samweli abyama akeisa obwire; kayaimukire akingura enyigi za Rwensinga y'Omukama. Ebyo yaboine akatina kubigambira Eli. 16Nawe Eli amweta ati, “Samweli, mwana wange!” Ayetaba ati, “Kaboneke waitu!” 17Amubaza ati, “Omukama akugambiireki? Otansheleka. Otakugira kyowansheleka akaija akakubonabonyia kubi.” 18Aho Samweli amugambira buli kantu, tiyamushelekire. Eli agamba ati, “Niwe Mukama, akore okwo arayenda.”
19Samweli akura, n'Omukama amusingira, n'ebyo yamugambiire akabigobesheleza byona. 20Isiraeli yona kwema Dani kugoba Beersheba emanya okwo Omukama ataireho Samweli kuba murangiwe. 21Kandi Omukama agendelera kuhabukira omuli Shilo, nabonekera Samweli omu byo yamutumaga. Kayagambaga baisiraeli bamuhuliliza bona.
Currently Selected:
1 Samweli 3: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
