1 Samweli 30

Daudi narashanisa Abaamaleki

1Orwo Daudi n'abashaijabe bagobire Zikilagi aha kiro kya kashatu, Abaamaleki bashangwa banyagire Negebu na Zikilagi. Bakaba bateire Zikilagi bagyokya n'omuliro. 2Abakazi na bona ababaire bagilimu, abajege n'abahango, babatwara endore. Tibaisire muntu n'omoi, kyonkai bahwa nabo, bagenda. 3Daudi n'abashaijabe kwija omu kigo, bashanga kyokize, abakazi babo n'abana babo batwetwe endore. 4Aho Daudi n'abantu abo yabaire ainabo bachura, balemwa baburwa n'agachura. 5Baka Daudi bombili: Ahinoamu owa Yezireeli na Abigaili muka Nabali kifa owa Karimeli, nabo bakaba batwetwe endore. 6Daudi ajunara muno aha rw'abantu kugamba kumuteza amabare, nobona bona bakaba nibashanshagazibwa abana babo. Kyonkai Daudi ayegumisiliza ayekwete Omukama Ruhangawe.

7Aho Daudi agambira Abiatari omukuhani, mutabani wa Ahimeleki ati, “Ndetera efodi.” Abiatari agimuletera. 8Daudi abaza aha Mukama ati, “Mbinge abanyagi aba, ndabakwata?” Amuhorora ati, “Obabinge; noija kubakwatakwo okabaka n'eminyago.” 9Nikwo Daudi kwimukya n'abashaija 600 abo yabaire ainabo. Bagoba aha Kaiga ka Besori mbali abandi basigaire. 10Kyonkai Daudi n'abashaija 400 baguma babingire ababisha. Ebikumi bibili basigara enyuma; bakaba balemirwe muno, agashabuka Akaiga ka Besori gayanga.

11Bagwamu Omumisiri omw'itarabuga, bamuletera Daudi. Bamuha ekyakulya alya, n'amaizi g'okunywa. 12Bamuhaho n'omukate gw'etini, n'engoobe ibili z'ezabibu. Kayabaire yaliire agarukwamu akoyo, enshonga emishana eshatu n'ebiro byaho akaba atakaliire kakulya handiki kunywa maizi. 13Daudi amubaza ati, “Oli w'ohai? Isi oli wa nkahai?” Agamba ati, “Ndi musigazi wa Misiri, omwiru w'Omuamaleki. Orwo ndwaire ebiro bishatu ebihingwire mukama wange yannaga. 14Tubaire tunyagire Negebu ey'Abakereti na Negebu eya Yuda na Negebu eya Kalebu, kandi twayokya Zikilagi n'omuliro.” 15Daudi amubaza ati, “Wakuntwara mbali abashuga aba bali?” Ogu ati, “Onnahilire obuso bwa Ruhanga okwo otanyite, anga okwo otannage mu mikono ya mukama wange; aho ndakutwara mbali abashuga aba bali.”

16Kayamugobizeyo abashanga bemaliire ensi yona nibalya, nibanywa, nibazina, aha rw'eminyago ey'amaani eyo banyagire omu nsi ya Filisitia na Yuda. 17Daudi abaita kwema aha kalemba bazana kugoba bwaigoro obwa bukeire bunu. Tibahungireho muntu n'omoi shana abasigazi 400 abakuubire engamia bakairuka. 18Anyaguruza bona ab'Abaamaleki babaire batwete na bakazibe bombili. 19Thaliho kyabuzireho, kibe kike anga kihango, babe bana bojo anga bana baisiki, gube munyago anga kyona kyona ekyabaire kitwetwe. Daudi akabigarura byona. 20Ashuba anyaga amahyo gona ag'entaama n'ag'ente. Abantu bafunya ebitunganwa ebyo bagenda bamwebembeire, bagamba bati, “Eminyago egi ya Daudi.”

Nibabegana eminyago

21Daudi agobera abashaija 200 ababaire balemirwe muno kutashobora kumuhondera, bakasigara aha Kaiga ka Besori. Baija kumuchwekera n'abo yabaire ainabo. Daudi kayabagobire abashura. 22Aho empwabujwa omu bashaija ezabaire zitabaire na Daudi zigamba ziti, “Orwo batatabaire naichwe, titulikwija kubahaho minyago eyo twanyaguruza, shana buli muntu akwate mukaziwe n'abanabe agende.” 23Kyonkai Daudi agamba ati, “Barumuna bange, eby'Omukama yatutunga mutabigira mutyo. Atulinzire, yamara yatuha abashuga ababaire batutabaliire. 24N'ohai alikwija kubaikiliza aha kigambo eki? Nk'okw'omugabo gw'ayatabara omu ndashana gwigana nikwo omugabo gw'ayaikara aha migugu guraba. Babeganirwe kumoi.” 25Kwema kir'ekyo aragira kakiba kiragiro, mara mugenzo omuli Isiraeli na mambwenu.

26Orwo Daudi yagobire Zikilagi, atwekeraho batahibe, abagurusi ba Yuda, eminyago, nagamba ati, “Eki kigemuro kyanyu aha minyago eyo tunyagire ababisha b'Omukama.” 27Akitweka kili ky'aba Betheli, Ramoti na Negebu, Yatiri; 28Aroeri, Sifumoti, Eshitemoa; 29Rakali, ab'ebigo by'Abayerahimeeli, ab'ebigo by'Abakeni; 30Horima, Borashana, Ataki; 31Heburoni na hona mbali abashaijabe babaire baikaire nibatera oku n'oku.

Currently Selected:

1 Samweli 30: RHAY01

Highlight

Copy

Compare