1 Samweli 29

Abafilisiti nibanga kutabara na Daudi

1Abafilisiti amahe gabo gona bagashoroleza Afeki. Abaisiraeli bakaba basisiire aha nchuro omuli Yezireeli. 2Abatwazi b'Abafilisiti kababaire nibahingura bali omu mitwe y'ebikumi n'enkumi, kandi Daudi n'abashaijabe nibahingura enyuma baina Akishi, 3abakuru b'amahe g'Abafilisiti bagamba bati, “Abaheburania aba nibakoraki aha?” Akishi abagambira ati, “Ogu ni Daudi omwiru wa Shauli, omukama wa Isiraeli, kanya aka twamazire hamoi amakiro; kwema ampungiireho tinkamubonagaho muze kuhika kir'eki.” 4Kyonkai abakuru b'amahe g'Abafilisiti bamukwatirwa ekiniga, bamugambira bati, “Garurayo omushaija ogu ashube mbali wamutaire. Talikwija kutabara naichwe mu ndashana, ataija akatuhinduka omu ndashana omwo. Omuntu ogu nahiga kutwita gube muhanda gw'okuchwa amaiko na mukamawe. 5Ogu ti Daudi owo bazina nibahororangana omu mayaga bakwese,

‘Shauli akaita enkumize,

Daudi obukumibwe?’ ”

6Ahanyuma Akishi ayeta Daudi amugambira ati, “Obuso bw'Omukama, obaire oli mwesigwa, kandi omu bwange naba nimbona kili kirungi kutabara nanye, tukatabaruka ahamoi, enshonga kwema oizire owange kugoba kir'eki tinkakubonagamu kabi. Kyonkai abatwazi tibalikukusiima. 7Ahonu mbwenu ogarukeyo. Ogende n'emilembe otakwija okatamisa abatwazi b'Abafilisiti.” 8Daudi amubaza ati, “Kyonkai nkozireki? Omwiru wawe omuboinemuki kwema mbandize kukukolera kuhika mwaha kutagenda kurashanira babisha ba Rugaba Omukama wange?” 9Akishi amuhorora ati, “Omu mibonere yange nimanya okw'oli nyakatetere nk'omumalaika wa Ruhanga. Kyonkai abakuru b'amahe g'Abafilisiti bagambire bati, ‘Atakutabara naichwe mu ndashana.’ 10Ahonu mbwenu oimuke bwankya karai n'abairu ba mukama wawe abo waizire nabo, orwo harabona mugende.” 11Kityo Daudi aimukya bwankya karai n'abashaijabe batabaruka bashuba Filisitia. Kyonkai Abafilisiti batemba Yezireeli.

Currently Selected:

1 Samweli 29: RHAY01

Highlight

Copy

Compare