1 Samweli 28

Abafilisiti nibatabalira Isiraeli

1Omu biro ebyo Abafilisiti bashoroza amahe gabo kutera Isiraeli. Akishi agambira Daudi ati, “Omanyire kimoi okwo iwe n'abashaija bawe muratabara nanye omw'ihe lyaitu.” 2Daudi amugambira ati, “Kurungi muno, naiwe orayebonera eky'omwiru wawe arakora.” Akishi amugambira ati, “Kurungi muno, nanye ndakuhindura mulinzi wange ebiro byona.”

3Aho Samweli akaba yafire. Isiraeli yona emuchulira, bamuziika Rama omu kigokye. Kandi Shauli akaba atambize embandwa n'abafumu omuli Isiraeli. 4Abafilisiti bahurura basisira Shunemu, na Shauli ahuruza Isiraeli yona basisira Giliboa. 5Orwo Shauli yaboine eihe ly'Abafilisiti atina, omutima gujugumba muno. 6Kayaragwize aha Mukama, Omukama tiyamuhoroire, yaba mu kiroto, anga mu urimu anga mu barangi. 7Aho Shauli agambira abaramatabe ati, “Mumbonere embandwa nyije ngende ngiraguzeho.” Abaramatabe bamugambira bati, “Embandwa eli Endori.”

Shauli nagya aha mukazi omufumu

8Aho Shauli ayehindura, ajwara bijwaro bindi, agenda n'abashaija babili, bagoba omw'omukazi ekiro. Agamba ati, “Oyeme n'omuzimu ondagulire. Onyetere omuzimu gwona gwona ogwo ndakugambira.” 9Omukazi amugambira ati, “Thaliho kya kulengeshanyia, nomanya ekyo Shauli akozire, okwo achwire embandwa n'abafumu omuli Isiraeli. Kubaki nontega omutego kwija kunyita?” 10Shauli amunahilira obuso bw'Omukama ati, “Obuso bw'Omukama, tolikwija kubona kibonabonyio aha rw'ekigambo eki.” 11Aho omukazi abaza ati, “Nkwetere ohai?” Agamba ati, “Onyetere Samweli.” 12Orwo omukazi yaboine Samweli akunga n'eiraka lihango; agambira Shauli ati, “Kubaki wambeiya? Iwe oli Shauli.” 13Omukama Shauli amugambira ati, “Otatiina. Nobonaki?” Omukazi amugambira ati, “Nimbona omuzimu niguruga okuzimu.” 14Shauli amubaza ati, “Nigushusha gutai?” Agamba ati, “Omugurusi naruga okuzimu ajwete ekanzu.” Shauli amanya okwo yabaire ali Samweli, ainama akanga aha itaka, amuhabukya.

15Aho Samweli abaza Shauli ati, “Kubaki wanyita kubi kunyeta eiguru?” Shauli ahorora ati, “Ndi omu bushasi bungi. Abafilisiti nibandashanisa, kandi Ruhanga anagire, takimporora mu barangi anga mu biroto; nikyo nakwetera k'oija okangambira ekyo ndakora.” 16Samweli agamba ati, “Ahonu nombalizaki k'Omukama araba akunobire akakunagirana? 17Omukama akukozire nk'okwo yandagiire. Akwakire obukama, yabuha Daudi mutahi wawe. 18Tohuliire by'akugambiire: Tiwamweholera Amaleki, nikwo kukugira atyo. 19Kandi iwe n'Abaisiraeli naija kubanaga omu mikono y'Abafilisiti. Nyenkya iwe na batabani bawe muraba muli hamoi nanye. Eihe lya Isiraeli nalyo aralinaga omu mikono y'Abafilisiti.”

20Aho niho honkai Shauli agwa ahansi arambira, ebigambo bya Samweli bimutinisa, ashunugukwa, aha rw'okuba akaba atakaliire kantu omushana gwona n'ekiro kyaho. 21Omukazi amugoba; kayaboine okwo yatina amugambira ati, “Leba, omuzana wawe yakuhulira, nayehwamu, nahulira ebyo wangambira. 22Mbwenu naiwe kutyo ohulire omuzana wawe, nkuhe akakulya, olye obone amani omu rugendo rwawe.” 23Shauli ayanga, agamba ati, “Tindikwija kulya.” Kyonkai abaramatabe n'omukazi ogwo bamukaliliza, ebyo bamugambira abihulira. Aho aimuka ahansi, ashuntama aha kitanda. 24Omukazi omu nju akaba ainamu enyana y'eshajwa, ayanguha agiita. Akwata ensano, achumba omukate gutatumbisiibwe. 25Aguteka Shauli n'abaramatabe omu maisho, balya. Aho baimukya omu kiro omwo bagenda.

Currently Selected:

1 Samweli 28: RHAY01

Highlight

Copy

Compare