1 Samweli 27

Daudi nahungira omu Bafilisiti

1Daudi atekeleza omu mwoyo ati, “Ekiro kimoi Shauli nalemwa nanyita. Thaliho kindi shana mpungire omu nsi y'Abafilisiti, abo Shauli arashuburugukwa alekere kumpigiliza omuli Isiraeli aho ndamukiraho.” 2Kityo hamoi n'abashaija rukaga aho yabaire ainabo, agya owa Akishi, mutabani wa Maoki, omukama wa Gati, 3atura nawe okwo. N'abashaijabe kutyo, buli mushaija n'omutungogwe, kandi Daudi wenene n'abakazibe bombili: Ahinoamu owa Yezireeli na Abigaili owa Karimeli ayabaire afeleirwe Nabali mushaijawe. 4Orwo bagambire Shauli okwo Daudi yairukire Gati, tiyashubire kumuhigiliza rundi.

5Ahanyuma Daudi agambira Akishi ati, “Osingire ompe akanya omu bigo eby'aharaiharai mbe nimwo ntura, omwiru wawe aleke kutura naiwe omu kikaare.” 6Kir'ekyo Akishi amutunga Zikilagi. Kwema aho Zikilagi eba y'abakama ba Yuda na mambwenu. 7Omu nsi y'Abafilisiti Daudi akamaramu omwaka gumoi n'emyezi enai.

8Daudi n'abashaijabe bagenda batera Abageshuri n'Abagerizi n'Abaamaleki, aha rw'okuba bakaba bali bataka b'ensi egyo kwema karai. Akabatera yagoba Shuri n'ahali Misiri. 9Ensi egyo agiita, tiyagisigiremu mushaija anga mukazi; atwara entaama, ente, endogobe, engamia n'ebijwaro agaruka owa Akishi. 10Orwo Akishi yakumubalize ati, “Kir'eki wanyaga bahai?” Daudi agamba ati, “Nanyaga Negebu eya Yuda,” anga, “Nanyaga Negebu ey'Abayerameeli,” anga, “Nanyaga Negebu ey'Abakeni.” 11Daudi tiyasigireho mushaija anga mukazi, hataija hakarugwaho muntu akaija Gati, okwo yatekelezaga, akabarura ebyo yakora. Eyab'egi niyo yabaga migilireye orwo yabaire natura omu nsi y'Abafilisiti. 12Akishi ayesiga Daudi natekeleza ati, “Ayenobesize aba wenene, Abaisiraeli, limoilimoi, aha rw'ekyo aliikara ali mwiru wange.”

Currently Selected:

1 Samweli 27: RHAY01

Highlight

Copy

Compare