1 Samweli 24

Daudi nayanga kwita Shauli

1Orwo Shauli yarugire kubinga Abafilisiti, bamugambira bati, “Leba, Daudi ali Omw'Irungu lya Engendi.” 2Shauli akwata abashaija 3,000 abo yaronzire omuli Isiraeli yona, agenda bwolekera Enyazi z'Ensa kuhiga Daudi n'abashaijabe. 3Agobera abiraro by'entaama bwatana aha muhanda, mbali habaire ali empako, atahamu kwejuna. Daudi n'abashaijabe bakaba bashuntamire omu mpako omundakwakwa. 4Abashaijabe bamugambira bati, “Eki nikyo kiro eky'Omukama yakugambire ati, ‘Leba, ndakunaga omubisha wawe omu mikono, omukore okwo orayenda.’ ” Daudi aimuka agenda nashoita ashara omukugiro gw'ebebo ya Shauli. 5Ahanyuma enkuratima emutera aha rw'okushara omukugiro gw'ebebo ya Shauli. 6Agambira abashaijabe ati, “Nikikabure kukora nti mukama wange, enkorwa mujuta y'Omukama: Kuhiga kumwita okwo nimbona okwo ali nkorwa majuta y'Omukama.” 7Kityo aba nikwo agwisiliza atyo abashaijabe n'ebigambo ebi, tiyabajubwire kutera Shauli. Shauli aimuka aruga omu mpako, akwata muhandagwe agenda.

8Ahanyuma Daudi nawe aruga omu mpako, ayeta Shauli ati, “Rugaba rwange omukama!” Ka Shauli yakebukire, Daudi abandama obuso bukanga aha itaka, amuhabukya. 9Amubaza ati, “Kubaki nohuliliza eby'abantu balikugamba bati, ‘Daudi nayenda kukwita?’ 10Bitai, kir'eki wabona okwo Omukama yaba akunagire omu mikono yange omu mpako? Abandi bangambira kukwita, kyonkai nakuleka. Nagamba nti, ‘Tindikwija kuziza mukono gwange ahali mukama wange, aha rw'okuba nkorwa majuta y'Omukama!’ 11Olebe, tata, olebe omukugiro gw'ebebo yawe ngukwete. Okwo nashara ebebo yawe omukugiro ntakwisire, omanye mara obone okwo ntaina kabi ahali iwe anga kukubanja. Tinkufakaliire n'orwo olikumpiganisa kunyita. 12Omukama aturamure inye naiwe; Omukama abe niwe akunyeholera; kyonkai inye tindikwija kukwita. 13N'orwo eb'eirai bachwire omugani bati, ‘Omubi arugwamu ebibi,’ inye tinkwite. 14Omukama wa Isiraeli atabalire ohai? Obingire ohai? Obingire embwa efire? Obingire omukukuni? 15Aha rw'ekyo Omukama abe niwe aba muramuzi, aturamure inye naiwe, niwe arabimanya akandamulira, akanyihya omu mikono yawe.”

16Orwo Daudi yamazire kugambira Shauli abigambo ebyo, Shauli agamba ati, “Alikugamba niwe, Daudi mwana wange?” Alira muno. 17Agambira Daudi ati, “Oli munyamazima kunshaga, aha rw'okuba wandongora ebirungi kandi inye nkurongoire ebibi. 18Mara kir'eki wagamba akature okwo wankorage, orwo otanyita orwo Omukama yaba annagire omu mikono yawe. 19Omuntu yakugwanishanyia omubishawe amuleka atyo agenda? Ahonu Omukama asinge ekurongore ebirungi aha rw'ekyo wankolera kir'eki. 20Mara mbwenu leba, namanya okwo orabakwo mukama, n'okwo obukama bwa Isiraeli buraguma omu mikono yawe. 21Aha rw'ekyo onnahilire obuso bw'Omukama okwo otalichwa baijukuru bange n'okwo otalichwa ka yange.” 22Eki Daudi akinahilira Shauli. Aho Shauli agya omuka, kyonkai Daudi n'abashaijabe batemba aha kitairongo.

Currently Selected:

1 Samweli 24: RHAY01

Highlight

Copy

Compare