1 Samweli 23

Daudi nakiza ekigo kya Keila

1Bagambira Daudi bati, “Abafilisiti nibarashanisa Keila, nibanyaga n'emyaka aha nyano.” 2Aha rw'ekyo Daudi araguza aha Mukama ati, “Ngende ndashanise Abafilisiti aba?” Omukama amuhorora ati, “Ogende orashanise Abafilisiti orokore Keila.” 3Kyonkai Daudi abashaijabe bamugambira bati, “Leba, omuli Yuda tulimu nitutina, lero biraba bitai katuragenda Keila kurashanisa amahe g'Abafilisiti?” 4Aho Daudi ashuba araguza aha Mukama. Omukama amuhorora ati, “Imuka ogye Keila, enshonga Abafilisiti ndabakunaga omu mikono.” 5Daudi agenda Keila n'abashaijabe, barashanisa Abafilisiti, babaita eiturampungu, banyaga n'ebitunganwa byabo, Daudi arokora atyo abanyansi ba Keila.

6Abiatari mutabani wa Ahimeleki kayairukiire Keila owa Daudi agenda akwete efodi. 7Bagambira Shauli okwo Daudi aizire Keila. Shauli agamba ati, “Ruhanga yamunnaga omu mikono aha rw'okuba yayekingirana orwo yataha omu kigo kina ebihigi n'emihingo.” 8Shauli ahuruza abantu bona kugya omu ndashana, kuzingora Keila, kuzinda Daudi n'abashaijabe. 9Daudi amanya okwo Shauli yabaire namuhiganisa; agambira Abiatari omukuhani ati, “Leta efodi aha.” 10Ashuba agamba ati, “Waitu Mukama, Ruhanga wa Isiraeli, omwiru wawe ahuliire kwo okwo Shauli alikwenda kwija Keila kusilikya ekigo nakitura inye. 11Abantu ba Keila bannage omu mikonoye? Isi Shauli aije, nk'okwo omwiru wawe ahuliire? Waitu Mukama, Ruhanga wa Isiraeli, ninkutagiliza, omwiru wawe omuhorore.” Omukama agamba ati, “Araija.” 12Aho Daudi agamba ati, “Abantu ba Keila barannaga n'abashaija bange omu mikono ya Shauli?” Omukama agamba ati, “Barabanaga omu mikono yabo.” 13Aho Daudi n'abashaijabe, ababaire nibagoba nka 600, baruga Keila, bafa gagenda. Shauli kayahuliire okwo Daudi yairuka, etabaro agileka. 14Daudi aikara omu bitairongo omw'irungu omu mabanga g'Eirungu lya Zifu. Shauli yamuhigaga buli kiro; kyonkai Ruhanga tiyamumunagire mu mikono.

15Daudi atina aha rw'enshonga Shauli akaba atabaire kumwita. Daudi akaba ali Horeshi Omw'irungu lya Zifu. 16Yonatani mutabani wa Shauli aimukya ahondera Daudi omuli Horeshi amugambira kuguma ahali Ruhanga. 17Amugambira ati, “Otatiina, aha rw'okuba tata takwite. Noija kuba mukama otware Isiraeli, nanye mbe katikiro wawe. Shauli, tata, eki nakimanya.” 18Bombili bakora endagano omu maisho g'Omukama; Daudi aikara Horeshi, na Yonatani agya omuka.

19Ahanyuma Abazifi batemba Gibea owa Shauli, nibagamba bati, “Daudi ayesherekire omu nsi yaitu omu bitairongo bya Horeshi aha kabanga ka Hakila obugya ruguru bwa Yeshimoni. 20Mbwenu Rugaba, songoka okwo washangwa noralira; ekyaitu ni kumukunaga omu mikono.” 21Shauli agamba ati, “Omukama abatunge omugisha orwo mwanganyibwa. 22Mugende mushube mumanyuruzege; mubone enkiro mbali eyeshelekire, n'omuntu amuboineyo mumumanye, aha rw'okuba nibangambira okwo aina obwenge bungi. 23Orw'ekyo mulebe, kandi mwekomye emyanya eyo ayeshelekiremu, azimbiire, mugaruke mumpe amakuru geigeigei. Aho ndagenda nainywe; k'araba ali omu nsi egi, ndamuhiga omu nkumi zona za Yuda.”

24Baimukya bagenda Zifu bebembeire Shauli. Omu kanya ako Daudi n'abashaijabe bakaba bali Omw'Irungu lya Maoni, omuli Araba amagya ruguru ga Yeshimoni. 25Shauli n'abashaijabe bagenda kumuhiga. Daudi kuhulira ago, agya aha rwazi Omw'Irungu lya Maoni. Orwo Shauli yahuliire ekyo amubingira omwirungu elyo. 26Shauli agenda rubaju rumoi rw'eibanga na Daudi n'abashaijabe rubaju orundi rw'eibanga. Daudi akaba narahuka kwiruka Shauli; kandi Shauli n'abashaijabe bakaba bamutangatangire n'abashaijabe kubakwata, 27orwo entumwa yagobire Shauli negamba eti, “Yanguha oije, Abafilisiti ensi bagibunda.” 28Aho Shauli akubuka, aleka kubinga Daudi, atabalira Abafilisiti; nikwo omwanya ogwo kwetwa “Rwazi rw'Okuhunga.” 29Daudi arugayo, atura mu bitairongo bya Engedi.

Currently Selected:

1 Samweli 23: RHAY01

Highlight

Copy

Compare