1 Samweli 25

Okufa kwa Samweli

1Samweli afa. Isiraeli yona ehurura emuchulira; bamuzika Rama omwe.

Daudi na Nabali

Ahanyuma Daudi agya omw'irungu lya Parani. 2Hakaba haliho omuntu omuli Maoni, mara aina ebyo yakoraga Karimeli. Akaba ali mutungi muno, aina entaama 3,000 n'embuzi 1,000. Akashangwa ali Karimeli nashara entaamaze obwoya. 3Eibaralye akaba ali Nabali, na mukaziwe eibaralye ni Abigaili. Omukazi akaba ali mushobokerwa mara ali murungi, kyonkai omushaija akaba ali mukoma kandi ali ngwagwa. Akaba ali Mukalebu. 4Daudi ahulira omw'irungu okwo Nabali yabaire nashara entaamaze obwoya. 5Atuma abasigazi 10 abagambira ati, “Mugye Karimeli owa Nabali mumushulire. 6Mumushure muti, ‘Ogire emilembe, n'eka yawe egire emilembe, na byona eby'oinabyo bigire emilembe. 7Nimpulira ngu oina abashazi b'obwoya. Abashumba bawe tubaire twinabo kyonkai titubakozire kubi. Kandi ebiro byona ebyo babaire bali Karimeli tibabuzirwe kantu. 8Obaze abasigazi bawe barakugambira. Aha rw'ekyo abasigazi bange obakilire kurungi, ahakuba twaija aha kiro kikuru. Ninkushaba abairu bawe na mutabani wawe Daudi obahe kyona kyona aky'oinakyo.’ ”

9Abasigazi kabagobire, bagambira Nabali ebi byona omw'ibara lya Daudi; bashuba balindaho. 10Nabali ababaza ati, “Daudi n'ohai? Mutabani wa Yese n'ohai? Bir'ebi bhaliho abairu bangi abalikusigaho bakama babo. 11Nkwate ekyakulya kyange n'amaizi n'enyama yange eyo mbagiire abashazi bange b'obwoya mpe abantu abo ntalikumanya mbali balikuruga?” 12Aho abasigazi ba Daudi bagaruka bamugambira byona. 13Daudi agambira abashaijabe ati, “Buli muntu ayekome embanda.” Buli muntu ayekoma embanda; Daudi kwakwo agyekoma. Abantu nka 400 bamuhondera kandi 200 basigara n'emigugu.

Abigaili nagwisiliza Daudi

14Kyonkai omusigazi omoi agambira Abigaili, muka Nabali ati, “Daudi ayemire omw'irungu yatuma entumwa kuramya mukama waitu; kyonkai wenene yabarotokera. 15Okwo abashaija bakatubera barungi muno, batukorage, mara titwabuzirwe kantu orwo twakagendaga nabo omw'irungu. 16Bakaba bali ngabo yaitu ekiro n'omushana omwanya gwona ogwo twabaire twinabo nitulisa entaama. 17Aha rw'ekyo eki okimanye mara otekeleze ekyo orakora. Nobona nibagonza kukora kubi mukama waitu n'ekaye yona, kandi agira emize mibi taliho n'omoi yakumugambira kantu.”

18Abigaili ayanguha akwata emikate 200, n'enfulebe ibili z'edivai, embagwa z'entaama itanu, ebipimo bitanu by'engano ebabwire, engoobe 100 z'ezabibu, n'emikate 200 y'etini, 200, abiteka aha ndogobe. 19Agambira abasigazibe ati, “Munyebembere, nanye mbahondeire.” Kyonkai Nabali iba tiyamugambiire. 20Kayabaire ali aha ndogobe nasoka asiikirwe eibanga, Daudi n'abantube nabo basongoka bamutahiremu. Ababuganganwa. 21Daudi akaba yagambire ati, “Mazima amani gange gafire bushai kulinda eitunga ly'omuntu ogu lyona omw'irungu, hataliho kilikye kyona kyona ekibuzire; aha rw'ebirungi yandongora ebibi. 22Ruhanga anyite bwita, kwija kugoba bwankya kandaba nsigireho buzima omushaija omoi omu bashaijabe bona.”

23Orwo Abigaili yaboine Daudi ayanguha, akuburuguka aha ndogobe, amubandamira. 24Amugwa omu maguru ashuba agamba ati, “Entambara ekwate inye, Rugaba. Ninkutagiliza ohulire omuzana wawe akugambiire, ohulire ebigambo by'omuzana wawe. 25Mukama wange, atafaho muntu ogu Nabali ow'emize, okwo eibaralye lili, na wenene nikwo ali. Eibaralye ni Nabali, mara aba mulenga. Kyonkai inye omuzana wawe abasigazi bawe Rugaba, ab'otumire timbaboine. 26Aho mbwenu, Rugaba, obuso bw'Omukama, mara mwoyo gwawe, okw'Omukama akutangire obwitamuntu, na iwe wenene kwehoroza, aho ababisha bawe na balinya abalikwenda kukukora kubi, babe nka Nabali. 27Ebigemuro ebi ebyo nakuletera, mukama wange, singa obihe abasigazi ab'olikutabara nabo. 28Singa banganyire entambara yange, kuba Omukama naija kukuha obukama obuli bukama, orwo alikumurashanira. Oburora bwawe bwona tolizokwamu kabi. 29K'abantu bakukubinga kukwita, orashangwa nobaliranwa omu bantu abalindwa Omukama Ruhanga wawe. Ababisha bawe arabachunkya oti yabachunkisa ekihubeezo. 30Orwo Omukama araba yakukoleire ebirungi byona nk'okwo yakuraganisize, mukama wange, yakutaireho kuba mukama wa Isiraeli, 31Rugaba otalija okechuza handiki kuterwa nkuratima aha rw'okushangwa oisire omuntu hataliho nshonga, anga aha rw'okushangwa ayehoroize. Omukama k'aliba yakugizirege, Rugaba, aho baliijuka omuzana wawe.”

32Daudi agambira Abigaili ati, “Omukama Ruhanga wa Isiraeli, asingizibwe, ayakusindika kir'eki kwija kuntanganwa! 33Gaberwa amagezi gawe, na iwe oli muberwa iwe ayantanga kwehoroza nkaita omuntu! 34Ninkurahilira obuso bw'Omukama Ruhanga wa Isiraeli ayantanga kukwita. Kuba otayanguha okaija kuntanganwa, mazima butakeire Nabali yaba atalikusigara na mushaija n'omoi.” 35Aho Daudi amutora ebyo yabaire amuleterire. Ashuba amugambira ati, “Ogaruke omuka n'emilembe; ebyo wagamba nabihulira, n'ekyo wataka nakikuha.” 36Abigaili agobera Nabali; amushanga omwe nakora obugenyi oti bw'omukama. Nabali akaba yabaiire muntu ondijo, enshonga akaba yatamire muno. Kityo tiyamugambiire kantu kulemwa kugoba bukeire. 37Bwankya Nabali edivai yamurugireho, mukaziwe amugambira ebigambo ebyo; atina muno, agandara nk'eibare. 38Kahahingwireho ebiro nka 10 Omukama Ruhanga aita Nabali.

Daudi nashwera Abigaili

39Orwo Daudi yahuliire okwo Nabali yafa, agamba ati, “Asingizibwa Omukama ayayehora ekijumi ekyo Nabali anjumire, akantanga kukora kubi. Ebibi bya Nabali Omukama yabimuziza wenene wenene.” Ahanyuma atumaho Abigaili namuragiraho k'aba mukaziwe. 40Orwo abairube bagobire Karimeli ahali Abigaili bamugambira bati, “Daudi yatutuma ahali iwe, katukutwara okaba mukaziwe.” 41Aimuka, abandama obuso bukanga aha itaka, agamba ati, “Leba, ndi muzanawe, ngye nabise abairube ebilenge.” 42Ayanguha akuuba endogobe, abazanabe bontanu bamushemba. Akuratira entumwa za Daudi, agenda aba mukaziwe.

43Daudi ashwera na Ahinoamu owa Yezireeli. Bombili baba bakazibe. 44Kyonkai Mikali mukaziwe, Shauli ishe akaba yamusiigiire Paluti mutabani wa Laisha ow'ekigo kya Galimu.

Currently Selected:

1 Samweli 25: RHAY01

Highlight

Copy

Compare