1 Samweli 22

Daudi nairukira Adulamu na Mizipa

1Daudi aruga Gati, ahungira omu mpako ya Adulamu. Orwo abarumuna n'abomwabo bona babihulire, bagenda bamuhonderayo. 2Buli omoi ayabaire aina enaku, na buli omoi ayabaire aina eibanja, na buli omoi ayabaire atalikugondokerwa, bamuhagata, aba mukuru wabo. Akaba aina nk'abantu 400. 3Daudi arugayo agya Mizipa eya Moabu. Agambira omukama wa Moabu ati, “Ninkutagiliza, tata na mawe onyikalire nabo, kuhika orwo ndamanya ekyo Ruhanga arankolera.” 4Abasigira omukama wa Moabu. Baikara nawe ebiro byona ebyo yabaire ali omu kitairongo. 5Aho omurangi Gadi amugambira ati, “Otaikara mu boma; imukya ogende omu nsi ya Yuda.” Kityo Daudi aimukya agenda omu kibira kya Hereti.

Okwitwa kw'abakuhani ba Nobu

6Mbwenu aho Shauli ahulira Daudi okwo abonekire, n'abantu abo yabaire ainabo. Shauli akaba ashuntamire Gibea aha kabanga ahansi y'omuhesheli akwete eichumu, n'abaramatabe bamwemeleireho. 7Abaza abaramatabe abo ati, “Mbwenu hulira, inywe Babenjamini. Mutabani wa Yese naija kubaha buli omoi endimiro n'emizabibu? Abahindure bakuru b'enkumi anga b'ebikumi, 8inywena kunshengera? Thaliho n'omoi alikunyibiraho okwo mutabani wange aina kisimba na mutabani wa Yese ogwo. Thaliho n'omoi alikunshasibwa anga kunyibiraho okwo mutabani wange aizire akaligija omwiru wange akanshengera, mara anshengirekwo na kir'eki.” 9Aho Doegi, Omuedomu, ayabaire ayemeleire haihi n'abaramata ba Shauli, ahorora ati, “Mboine mutabani wa Yese naija Nobu ahali Ahimeleki eya Ahitubi, 10yamuraguliza aha Mukama, yamuha entanda, n'embanda ya Goliati Omufilisiti.”

11Nikwo omukama kuragira kabeta Ahimeleki omukuhani, mutabani wa Ahitubi, n'ab'omwabo bona, abakuhani ababaire bali Nobu. Bona baija aha mukama. 12Shauli agamba ati, “Mbwenu hulira, iwe mutabani wa Ahitubu.” Ahorora ati, “Kasinge rugaba.” 13Shauli amubaza ati, “Kubaki ombanzire na mutabani wa Yese, kumuha omukate n'embanda, n'okumuraguliza ahali Ruhanga, akantabalira, akanzimbira? Mara anshengirekwo na kir'eki!” 14Ahimeleki amuhorora ati, “Omu bairu bawe omwesigwa nka Daudi n'ohai, Daudi omukoi w'omukama, omukuru w'abalinzi bawe, mara omwawe nakunirwa. 15Isi kir'eki murundi gwa mbere inye kumuraguliza ahali Ruhanga? Chei! Otansebeka kantu kona kona anga kugira kyo wasebeka ba mwaitu; kuba naba ntalikumanya kantu aha kigambo eki, na bike na bingi.” 16Omukama agamba ati, “Mazima Ahimeleki nofa, n'ab'omwanyu nibafa!” 17Ashuba agambira abalizi ababaire bamwemeleireho ati, “Mugende mwite abakuhani b'Omukama aha rw'enshonga nibema na Daudi; bamanyiire okwo airukire tibantigiraho.” Kyonkai abaramatabe banga kubaita. 18Aho omukama agambira Doegi ati, “Ogende obunde abakuhani.” Doegi Omuedomu agenda ababunda. Kir'ekyo akaita abantu 85 ababaire bajwete efodi ya kitani. 19Nobu, ekigo ky'abakuhani, akiisa embanda, abashaija n'abakazi, abana n'enkelemeke, ente, endogobe n'entaama. 20Kyonkai omoi omuli batabani ba Ahimeleki eya Ahitubi, eibaralye Abiatari, ahunga, airukira owa Daudi. 21Amubarulira okwo Shauli yaita abakuhani b'Omukama. 22Daudi agambira Abiatari ati, “Nkamanya kiro kili okwo Doegi Omuedomu yabaire haliho, okwo atakubuzirwe kugambira Shauli. Abawe bona n'inye nabaisa. 23Oikare nanye, otatina, aha rw'okuba ogwo alikumpiganisa kunyita niwe nanye ndikuhiganisa. Orwo oina inye wakira.”

Currently Selected:

1 Samweli 22: RHAY01

Highlight

Copy

Compare