1 Samweli 21

Daudi n'omukuhani wa Nobu

1Daudi agya Nobu owa Ahimeleki omukuhani. Ahimeleki aija kumuchwekere nachundwa, amubaza ati, “Kubaki oli wenkai, otaina muntu?” 2Daudi amuhorora ati, “Omukama aina ekyo yanjaraba, yangambira ati, ‘Hatabaho muntu wena wena kumanya kyonakutuma n'ekyo nakujaraba.’ Kandi ndagaine n'abasigazi omwanya nanka. 3Aho mbwenu oinamuki? Mpa emikate etanu anga kyona kyona ekiliho.” 4Omukuhani ahorora Daudi ati, “Tinyinamu mukate gwa buli kiro, shana haliho omukate gutakatifu, kiliho k'abasigazi baraba beshumbire abakazi.” 5Daudi amuhorora ati, “Omu mazima abakazi tubeshumbire ebiro ebi bishatu nka buli orwo ngya omu tabaro. Abasigazi tibahagaire n'orwo orugendo ruli rwa buli kiro; lero mbwenu ebikwato byabo tibilikwera kushagaho?” 6Kityo omukuhani amuha omukate gutakatifu aha rw'okuba hakaba hataliho mukate gundi shana ogw'obusinge, ogwihwa omu mabona g'Omukama, gukahingwa n'omukate ogulikwokya kir'ekyo baguhingishanyia.

7Kandi kiro kyonone ekyo hakaba bhaliho omuramata omoi wa Shauli, aina ekyabaire kimusigaize omu maisho g'Omukama. Eibaralye akaba nayetwa Doegi Omuedomu, ali mukuru w'abashumba ba Shauli.

8Daudi agambira Ahimeleki ati, “Hanu aha toinaho ichumu anga mbanda? Aha rw'okuba tinaija na mbanda anga bikwato byange bya ndashana, aha rw'enshonga eky'Omukama yantuma nikyetaga obwangu.” 9Omukuhani agamba ati, “Embanda ya Goliati Omufilisiti owo waitiire omu Ruhanga rwa Ela, leba eli aha eshembire omu mwendo enyuma y'efodi. K'oraba oratwara egyo, gitware, enshonga aha thaliho ndijo shana egi.” Daudi agamba ati, “Thaliho elikushusha egyo; gimpe.”

Daudi nairukira Gati

10Daudi aimuka, kir'ekyo airuka Shauli, ahungira owa Akishi, omukama wa Gati. 11Abaramata ba Akishi bamugambira bati, “Ogu ni Daudi omukama w'ensi egi. Niwe bazinire nibahororangana bati,

‘Shauli aisire enkumize,

Daudi obukumibwe.’ ”

12Daudi ata aha mutima ebigambo ebyo, mara atina muno Akishi omukama wa Gati. 13Aho ahindura emigilireye omu maisho gabo. Orwo bakulengire kumukwata ayehindura muraru ata nahandika aha bihigi, ajorombeza enjwajwa omu birejubye. 14Aho Akishi agambira abaramatabe ati, “Iyo! Inywe nimubona omushaija ogu okwo ali muraru, mbwenu kubaki mwamundetera? 15Inye nimburwa abararu kuleta omuntu ogu kukora eby'abararu omu maisho gange? Omuntu ogu naija kutaha omu nju yange?”

Currently Selected:

1 Samweli 21: RHAY01

Highlight

Copy

Compare