1 Samweli 20

Yonatani nayema hamoi na Daudi

1Daudi ahunga, aruga Nayoti omuli Rama, agya abaza Yonatani ati, “Nyina ntambaraki? Isho mufakaliireki kuhiga kunyita?” 2Yonatani amuhorora ati, “Nikikabure, tofe. Na kike na kihango, thaliho kyo tata akora atangambiire. Mbwenu kubaki ekyo nakinshereka? Tikwo kili.” 3Kyonkai Daudi ahorora ati, “Isho namanya karugendo okwo nkuganzire, kityo nayanga otabimanya okajunara. Mazima, obuso bw'Omukama mara mwoyo gwawe, haliho ekitambi kimoi kyonkai inye kufa.” 4Yonatani amugambira ati, “Kyona kyona eky'oragamba ndakikukolera.” 5Daudi agambira Yonatani ati, “Nyenkya okwezi nikwema, mara tinakubura aha kiihuro ky'omukama, mbwenu ondeke ngende nyeshereke omu kishaka kugoba aha kiro kya kashatu bwaigoro. 6Isho k'araba atamboine n'akati, aho omugambire oti, ‘Daudi antagilize kamutaishura kugya Betelehemu omu kigokye; ahakuba haliho ekitambo kya buli mwaka ekilikutambilirwa eka yona.’ 7K'aragira ati, ‘Kurungi,’ omwiru wawe yaguma; kyonkai k'aratamwa aho omanye okwo aina akabi ak'agendeleire. 8Aha rw'ekyo onkorege ahakuba turagaine hamoi endagano ntakatifu y'Omukama. Kandaba nyina entambara, onyite iwe wenene; aha rwa nshongaki kuntwalira sho?” 9Yonatani agamba ati, “Nikikabure! Kanakumanyire okwo tata agendeleire akabi ahali iwe, tinakukugambiire?” 10Daudi abaza Yonatani ati, “Isho k'arakuhorora kubi n'ohai arangambira?” 11Yonatani amuhorora ati, “Ija tugende omw'ishwa.” Kityo bombili bagenda omw'ishwa.

12Yonatani agambira Daudi ati, “Omukama Ruhanga wa Isiraeli niwe kaishemboni. Nyenkya karai omw'izoba nk'eli, anga aha kiro kya kashatu kandaba namazire kufumora na tata, kandashanga nakugwage, ndakutumaho nkumanyise. 13K'araba nayenda kukukora kubi, kandaba ntakumanyisize ekyo, nkakutaishura okagenda omu mirembe, Omukama n'akanyite. Omukama abe naiwe, nk'okwo abaire aba na tata. 14Kandiba nkyarora ongonze engonzi z'amazima nk'ez'Omukama, ntalija nkafa. 15Kandi n'eka yange ogume ogigilire obwesigwa ebiro byona. Orwo Omukama aliita ababisha bawe bona omu nsi, 16omwawe ntalyebekamu. Omukama nakehore ababisha bawe.” 17Yonatani ashuba agambira Daudi kunahira okwo alikumugonza, kuba Yonatani wenene yagonzaga Daudi nk'okwo yayegonzaga.

18Ahanyuma Yonatani agambira Daudi ati, “Nyenkya okwezi nikwema; mara toboneke, entebe yawe eraba eli bushai. 19Aha kiro kya kashatu orabura muno; aho ogende mbali wabaire oyeshelekire orwo ebigambo byabaire bishobire, oikare aha rubaju rw'entuumiro elinya ey'amabare. 20Inye ndarasha emyambi eshatu rubaju orw'entuumiro, nk'alikurasha mbali ntebire. 21Ndatuma omwana ningamba nti, ‘Genda ohige emyambi.’ Kandamugambira nti, ‘Leba emyambi ekuli rubaju oru, gironde,’ aho oije aha rw'okuba obuso bw'Omukama, eraba eli mirembe ahali iwe, hathaliho kabi. 22Kyonkai kandamugambira nti, ‘Leba emyambi ekuli omu maisho kuli,’ aho ogende, Omukama araba akutaishwire. 23Kandi ekigambo ekyo iwe nanye twafumoraho, Omukama niwe mujulizi waitu ebiro byona.”

24Kityo Daudi agenda ayeshereka omw'ishwa. Orwo okwezi kwayemire, omukama ashuntama kulya. 25Omukama ashuntama aha ntebeye nk'okwo yakagiraga, aha ntebe eyataine orukuta. Yonatani amushuntaama omu maisho amulebire, na Abuneri ashuntama aha rubaju rwa Shauli, kyonkai omwanya gwa Daudi gwikara bushai.

26Kir'ekyo Shauli taina kyoyagambire. Akatekeleza ati, “Daudi aina ekyo yaba; rwona ahagaire.” 27Kyonkai aha kiro kya kabili, bukeire okwezi kuraire kwemire, omwanya gwa Daudi gushuba gwikara bushai. Shauli abaza Yonatani omutabani ati, “Kubaki mutabani wa Yese atalikwija aha kihuro nyeigoro na mbwenu?” 28Yonatani amuhoroa ati, “Daudi antagilize muno kumujubura kugya Betelehemu. 29Agambire ati, ‘Onjubure ngende, aha rw'okuba ab'omwaitu nibatamba ekitambo omu kigo, mara mukuruwange ankomekeleize kambaho. Mbwenu onsingire, onjubure ngende, mbone bakuru bange.’ Nikyo ataizira aha kihuro ky'omukama.”

30Aho Shauli anigalira muno Yonatani, amugambira ati, “Iwe mwana w'omukazi enyeleme omushengi, tindikumanya okwo oronkire mutabani wa Yese okehemura, n'okuhemura nyoko okamukwasa enshoni? 31Omanye okwo mutabani wa Yese orwo aliba narora omu nsi omu toliguma, n'obukama bwawe chei. Aha rw'ekyo otume bamundetere; mazima afe!” 32Aho Yonatani ahorora ishe ati, “Kubaki afe, akozireki?” 33Kyonkai Shauli ajugunya eichumu kumwita. Nirwo Yonatani yamanyire okwo ishe amalize kwita Daudi. 34Yonatani aruga aha meza ekiniga nikimubarabata, n'aha kiro kya kabili okwezi kwemire tiyaliire kyakulya, kuba akashasibwa Daudi, enshonga ishe akamuhemura.

35Bwankya Yonatani aturuka agya omw'ishwa nk'okwo yabaire ategekeraine na Daudi, agenda n'omwana muto. 36Agambira omwanawe ati, “Iruka ohige emyambi eyo ndikurasha.” Orwo omwana yabaire nairuka, arasha omwambi gumugwa omu maisho. 37Orwo omwana yagobire aha mwanya mbali Yonatani yabaire arasire emyambi, Yonatani ayeta omwana agamba ati, “Omwambi guli omu maisho gawe.” 38Amweta ati, “Yanguha, rahuka, leka kukelererwa.” Aho omwana ashombokya emyambi agaruka ahali mukamawe. 39Kyonkai tiyamanyire kantu; Yonatani wenkai na Daudi nibo babaire nibamanya ekigambo ekyo. 40Yonatani aha omwanawe ebikwatobye, amara amugambira ati, “Iroko obitware omu kigo.” 41Orwo omwana yabaire yagenda ati, Daudi aimuka aha rubaju rw'entuumiro y'amabare, agwa ahansi ajumaire, ainama kashatu; banywegerangana, balira, Daudi alemwa arundana. 42Aho Yonatani agambira Daudi ati, “Ogende n'emilembe, nk'okwo ichwembili tunahiire obuso bw'Omukama nitugamba tuti, ‘Omukama abe mujulizi waitu mara mujulizi wa baijukuru baitu ebiro byona.’ ” Daudi aimuka agenda; Yonatani ataha omu kigo.

Currently Selected:

1 Samweli 20: RHAY01

Highlight

Copy

Compare