1 Samweli 19

Shauli nagingiza Daudi

1Shauli agambira omutabani Yonatani n'abaramatabe kabaita Daudi. Kyonkai Yonatani yagonzaga muno Daudi. 2Agambira Daudi ati, “Tata, Shauli nahiga kukwita. Aha rw'ekyo bwankya orayemanya, oikare omu mwanya ogweheleire oyesheleke. 3Inye ndaturuka nyemelere aha rubaju rwa tata omw'ishwa mbali oyeshelekire, nfumolere tata ahali iwe. Kandagira ekyo namanya kyona kyona ndakugambira.” 4Yonatani atenda Daudi ahali Shauli ishe, amugambira ati, “Omukama atakora kubi mwiruwe Daudi, kuba taina ky'akufakaliire. Kandi ebigirobye bikubeleire by'omugasho. 5Akehwamu yaita Omufilisiti, n'Omukama y'aha Isiraeli yona okusinga kw'amani. Ekyo okakibona washanduka, mbwenu aho kubaki Daudi omwitire bushai obuzira nshonga?” 6Shauli ahuliliza ebyo Yonatani alikumugambira, anahira ati, “Obuso bw'Omukama timwite.” 7Yonatani ayeta Daudi, amugambira ebyo byona; ashuba amutwalira Shauli, yaikara omu mabonage nk'orwa mbere.

8Hashuba habaho endashana. Daudi atabara, arashana n'Abafilisiti, mara abaita muno, abasinga. 9Aho Ruhanga asingira Shauli omuzimu gumubanda. Akashangwa ashuntamire omwa wenene akwete eichumu, Daudi natera enanga. 10Shauli ahiga kumubambijanyia aha rukuta n'eichumu, kyonkai Daudi amwehigiza, Shauli eichumu alitera orukuta. Daudi airuka hunga.

11Omu kir'ekyo Shauli atuma entumwa aha nju ya Daudi kumulinda, kwija kumwita bwankya. Kyonkai Mikali muka Daudi amugambira ati, “K'otairukire okahunga kir'eki omu, nyenkya nibakwita.” 12Mikali arabya Daudi omw'idirisha amusongora, airuka. 13Mikali akwata ekinyago akibyamika aha kitanda, akishaguza omuto gw'omushenshe gw'embuzi, ashuba akishweka n'emyendo. 14Orwo Shauli yatwekire entumwa kukwata Daudi, Mikali abagambira ati, “Arwaire.” 15Aho Shauli atuma entumwa kweta Daudi kumubona, ati, “Mumundetere aha kitanda nyije mwite.” 16Orwo entumwa zatahiremu, bashanga ekinyago aha kitanda, kishagwirwe omuto gw'omushenshe gw'embuzi. 17Shauli abaza Mikali ati, “Ombeiyeireki oti, okataishura omubisha wange akagenda? Leba yairuka.” Mikali amuhorora ati, “Angambiire ati, ‘Ondeke ngende, anga nkwite!’ ”

18Daudi aba nikwo airuka atyo akahunga. Agobera Samweli omuli Rama. Amugambira byona ebyo Shauli yabaire amukozire. Aho bombili bagenda batura Nayoti. 19Abantu bagambira Shauli bati, “Daudi ali Nayoti omuli Rama.” 20Aho Shauli atuma entumwa kumukwata. Orwo baboine omuteko gw'abarangi nibabasha, Samweli ali mukuru wabo, Mwoyo wa Ruhanga abanda entumwa za Shauli, na zonene kwakwo zibasha. 21Orwo babigambire Shauli, atuma entumwa ezindi nazo zibasha. Atuma ezindi omurundi gwa kashatu, nazo kwakwo zibasha. 22Ahanyuma ayegendera Rama, agoba aha iziba lihango omuli Seku. Abaza ati, “Samweli na Daudi bali nkahai?” Omuntu omoi amushubamu ati, “Bali Nayoti omuli Rama.” 23Aruga aho agya Nayoti omuli Rama. Mwoyo wa Ruhanga na wenene kwakwo amubanda, kayabaire nagenda abasha, alemwa agoba Nayoti omuli Rama. 24Ajura emyendoye abasha omu maisho ga Samweli. Omushana ogwo gwona n'ekiro ekyo kyona abyama ali butunyu. Kwema aho bagamba bati, “Shauli nawe ali omu barangi?”

Currently Selected:

1 Samweli 19: RHAY01

Highlight

Copy

Compare