1 Samweli 18
18
1Orwo Daudi yamazire kufumora na Shauli, Yonatani agonza Daudi eza fanfe, amugonza nk'okwo yayegonzaga. 2Kandi kir'ekyo Shauli amwekwata okutamutaishura kushuba wabo. 3Aho Yonatani anywana na Daudi, enshonga akaba namugonza nk'okwo yayegonzaga. 4Ajura ebebo eyo yabaire ajwete, agiha Daudi, n'ebikwatobye by'endashana, nangu n'embandaye, n'obutabwe n'omukandaragwe. 5Daudi yagoshokaga hona hona mbali Shauli yamutumaga. Kityo Shauli amuhindura mukuru w'abaisherukalebe. Ekyo kikashemelera abantu bona, kwakwo n'abaramata ba Shauli.
Shauli nachubira Daudi
6Kababaire nibatabaruka Daudi yarugire kwita Omufilisiti, abakazi baturuka omu bigo byona bya Isiraeli nibahoya, nibaguruka kuchwekera Omukama Shauli, baina ebikwato by'amayaga, baina n'engarabi, nibazina n'ebyera. 7Orwo balikushanduka bazina nibahororangana bati,
“Shauli aisire enkumize,
na Daudi obukumibwe.”
8Aho Shauli emigambire egi emutama, atamwa muno; agamba ati, “Daudi bamubalira obukumi inye bambalira enkumi; akyabonaki ekishagireho shana obukama!” 9Kwema kir'ekyo akimba Daudi ekiisho.
10Bukeire Ruhanga atweka omuzimu gubanda Shauli n'amani, agamba asiga akaragi omu njuye, aho Daudi atera enanga nk'okwo yagiraga buli kiro. Shauli akaba akwete eichumu. 11Alijugunyira Daudi nashubira kumubambijanyia aha rukuta. Kyonkai Daudi amuhigiza emirundi ebili.
12Shauli yatinaga Daudi aha rw'enshonga Omukama akaba ainawe, kandi wenene akaba yamurugireho. 13Nikwo kumweihyaho akamuhindura mukuru w'orukumi; yaba natabara natabaruka ayebembeire embaga. 14Ebyo yakoraga byona byagoshokaga, kuba Omukama akaba amwemiremu. 15Orwo Shauli yaboine okwo yabaire nagoshoka muno yamutina. 16Kyonkai Abaisiraeli bona na Yuda bamugonza; aha rw'okuba yatabaraga abebembeire, atabaruka abakulembeire.
Shauli nasiigira Daudi
17Aho Shauli agambira Daudi ati, “Merabu muhara wange omukuru ali aha; ninyija kumukusiigira. Ekikuru ombere manzi orwane endashana z'Omukama.” Okumugambira atyo akaba natekeleza ati, “Atangwaho, agwe aha Bafilisiti.” 18Daudi agambira Shauli ati, “Inye nab'ohai n'abanyaruganda bange, eka ya tata omuli Isiraeli baba bahai, inye kuba mukoi w'Omukama?” 19Kyonkai omu bukiro obwo Merabu yabaire naija kushwerwa Daudi, bamuhangiira Adirieli Omumeholati.
20Kandi Mikali muhara wa Shauli ondijo yagonzaga Daudi; bagambira Shauli, ekigambo ekyo kimushemelera. 21Shauli atekeleza ati, “Kamumuhe aije amubere mutego, Abafilisiti baije bamwite.” Aha rw'ekyo agambira Daudi omurundi gwa kabili ati, “Mbwenu noija kuba mukoi wange.” 22Aragira abaramatabe ati, “Mugambire Daudi omu kyama muti, ‘Omukama nakushemelerwa, n'abaramatabe bona nibakugonza; ahonu obe mukoi w'Omukama.’ ” 23Abaramata ba Shauli bagambira Daudi ebigambo ebyo. Daudi agamba ati, “Inywe nimubona kintu kijege inye kuba mukoi w'Omukama?” 24Abaramata bagambira Shauli okwo Daudi yahorora. 25Aho Shauli abaragira kugambira Daudi bati, “Omukama talikwegomba makura, shana enshembe 100 z'Abafilisiti, abone kwehora ababisha b'Omukama.” Shauli akaba agendeleire kumwisa Abafilisiti. 26Orwo abaramatabe babaruliire Daudi ebigambo ebyo, Daudi ashemelerwa kuba mukoi w'omukama. Ebiro kabyabaire bitakahingiwreho, 27Daudi atabara n'abashaijabe aita Abafilisiti 200; aleta enshembe zabo, aziha omukama orubara rwijwire, abone kuba mukoiwe. Nikwo Shauli kumusiigira omuhara, Mikali. 28Kyonkai orwo Shauli ogwo yaboine okwo Omukama yabaire amwemiremu, n'okwo omuhara Mikali yabaire namugonza, 29Shauli yatina Daudi okushagaho. Aho anoba Daudi obutaleka.
30Ahanyuma abatwazi b'Abafilisiti batabara omu ndashana, mara orwo bakatabaraga Daudi yabonaga egoshoko kushaga abaramata ba Shauli bona; kityo eibaralye liranganwa muno.
Currently Selected:
1 Samweli 18: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
