1 Samweli 17

Goliati nakoleeza Abaisiraeli

1Abafilisiti bahuruza amahe gabo kurashana, bahurulira Soko eya Yuda, basisira omugati ya Soko na Azeka omuli Efesidamimu. 2Shauli n'Abaisiraeli nabo bahurura, basisira omu Ruhanga rwa Ela, batekateka kurashana n'Abafilisiti. 3Abafilisiti bemelera aha ibanga rubaju orumoi, n'Abaisiraeli bemelera aha ibanga rubaju orundi, oruhanga rubali omugati. 4Omu rusisira rw'Abafilisiti harugwayo omwisherukare eibaralye Goliati, owa Gati, akaba aina oburai bw'emita nka ishatu. 5Akaba ajwete ehelumeta y'omulinga omu mutwe, ajwete engabo y'ekyoma omu omu kifuba, obusikizi bwayo nk'ekilo 57. 6Aha maguru akaba ainaho engabo z'omulinga, omu mabega aina akachumu k'omulinga. 7Orubango rw'eichumulye rukaba nirushusha orugamba rw'omushuki w'emyendo, n'obusikizi bw'eichumu lyonene bukaba buli bw'ekilo nka mushanju. Omutwazi w'engaboye yamwebemberaga. 8Ayemelera akungira amahe ga Isiraeli ati, “Nimukorahoki aho? Nimutekateka endashana? Inye ndi Mufilisiti, inywe muli bairu b'amahe ga Shauli. Omuli inywe murondemu omuntu omoi asongoke mbali ndi. 9K'arashobora kurwana nanye akanyita, aho turaba bairu banyu. Kyonkai kandamukiza amani nkamwita, aho muraba bairu mutukolere.” 10Omufilisiti ogwo agamba ati, “Kir'eki ninkoleeza amahe ga Isiraeli; mumpe omuntu turwane.” 11Shauli na Isiraeli yona kuhulira eby'Omufilisiti alikugamba bahahanwa emitima, batina muno.

Daudi naija omu rusisira

12Daudi akaba ali mutabani wa Yese, Omuefurati wa Betelehemu omuli Yuda, mara Yese ogwo akaba aina abatabani munana. Omu makiro ga Shauli, omushaija ogwo akaba yare yagurusire. 13Abatabani abashatu abakuru bakaba batabaire na Shauli omu ndashana. Omuzigaijo ni Eliabu, nakuratwa Aminadabu, owa kashatu ni Shama. 14Daudi niwe yabaire ali mainuka gabo. Abashatu abakuru baikaraga na Shauli; 15kyonkai Daudi yagendaga owa Shauli nagaruka kulisa entaama za ishe omuli Betelehemu.

16Ebiro makumi ganai Omufilisiti yaijaga nabemelera omu maisho bwankya na bwaigoro.

17Yese agambira omutabani Daudi ati, “Otwalire barumuna bawe ekilo 10 z'engano egi ebabwire, n'emikate egi 10. Obibatwalire bwangu omu rusisira. 18Kwakwo otwalire omukuru w'eihe lyabo ly'orukumi emichundo egi 10 y'amajuta. Olebe okwo barumuna bawe bali oshube ogaruke, bakuhe akamanyiso oshube okandetere.”

19Shauli, na batabani ba Yese abashatu n'Abaisiraeli bona bakaba bali omu Ruhanga rwa Ela nibarashana n'Abafilisiti. 20Daudi aimuka bwankya karai, entaama azisigira omulinzi, akwata entanda agenda nk'okwo Yese yabaire amuragiire. Agoba aha rusisira orwo eihe lyabaire nilibandura kugya omu rubuga rw'endashana nilitera orusharo rw'endashana. 21Isiraeli n'Abafilisiti betekatekera endashana, eihe kurashana na linu. 22Daudi emigugu agisigira omulinzi kugilinda, airuka agya omw'ihe ashura abarumuna. 23Kayabaire akyafumora nabo, leba emanzi, Omufilisiti wa Gati, eibaralye Goliati, aruga omw'ihe ly'Abafilisiti, agamba ebigambo byonene byonene nk'obubere, Daudi abihulira. 24Abaisiraeli kubona omushaija ogwo batina muno, bamwiruka. 25Bagamba bati, “Mwabona omushaija ogu ayamaza? Mazima yamaza kukoleeza Isiraeli. Omuntu aramwita, omukama aramutunga amanaganage, amusigiire omuhara, n'eka ya ishe omuli Isiraeli taligyenza mushoro.” 26Daudi agambira ababaire bamwemeleire haihi ati, “Omuntu araita Omufilisiti ogu, akaihaho Isiraeli ekihemu eki, bamukolereki? Kuba Omufilisiti ogu atatahirirwe yab'ohai kukoleeza eihe lya Ruhanga asingire?” 27Abantu bamuhorora omu migambire yonene yonene bati, “Omuntu aramwita arakolerwa atyo n'atyo.”

28Eliabu omukuruwe bwoli akaba nahulira orwo yabaire nafumora n'abantu. Atamwa muno Daudi, amubaza ati, “Waletwaki kunu? Entaama zike; mbwenu omw'irungu wazisigir'ohai? Nimanya eby'olikutekeleza, mara ogir'omutima gubi. Waletwa okuleba endashana.” 29Daudi amubaza ati, “Mbwenu nakoraki? Ntagira kyonabaza?” 30Daudi amurugaho agya ah'ondijo amubaza emibalize yonene yonene; abantu bamuhorora nk'orwa mbere.

31Orwo bahulire ebyo Daudi yagambire, babibarulira Shauli, nawe amutuma. 32Daudi agambira Shauli ati, “Omufilisiti ogu atakuyugumisa muntu n'omoi. Inye ndagenda ndwane nawe.” 33Shauli amuhorora ati, “Tolikushobora kugenda kurashana na Mufilisiti ogu, kuba iwe okyali musigazi kandi wenene aba muntu w'endashana kwema omu busigazibwe.” 34Kyonkai Daudi agambira Shauli ati, “Inye nalisaga entaama za tata. Entare anga edubu kayaijaga ekakwata omwana gw'entaama omu buhyo, 35ngihondera ngitera, ngigwiha omu kanwa. Kayanyimukiragamu ngikwata ekileju ngitera ngita. 36Nkaita entare n'edubu; n'Omufilisiti ogu atatahirirwe nikwo arashusha, orwo yagaya eihe lya Ruhanga asingire.” 37Daudi ashuba agamba ati, “Omukama ayanyihwire omu magembe g'entare n'ag'edubu, aranyihura omu mikono y'Omufilisiti ogu.” Shauli agambira Daudi ati, “Iroko, Omukama abe naiwe.” 38Aho amujweka engaboze z'endashana. Amujweka ehelumetaye y'omulinga omu mutwe, amujweka n'engabo y'ekyoma omu kifuba. 39Daudi ayekoma embandaye aha ngabo y'endashana, kyonkai alenga kugenda byanga aha rw'okuba akaba atabimanyiire. Aho agambira Shauli ati, “Ebi tindikushobora kugenda nabyo enshonga timbimanyiire.” Abijura. 40Akwata enkoniye, aronda amabare g'entelere gatanu omu kaiga agata omu nshaho y'omushumba, akaba akwete ekihubeezokye, ailira haihi Omufilisiti.

Daudi naita Goliati

41Omufilisiti aija ailira Daudi haihi, n'omutwaziwe w'engabo amwebembeire. 42Kayaboine Daudi amuleba amugaya, aha rw'okuba akaba akyali musigazi kyonkasi nayera, ali murungi aha maisho. 43Amubaza ati, “Inye naba mbwa kunyizira n'enkoni?” Yamukeena omw'ibara lya baruhangabe. 44Ashuba agambira Daudi ati, “Ngoba nkubagire amahungu n'ebikaaka.” 45Aho Daudi agambira Omufilisiti ati, “Iwe wanyizira n'embanda, n'eichumu, n'akachumu; kyonkai inye nakwizira omw'ibara ly'Omukama w'amahe, Ruhanga w'eihe lya Isiraeli ely'okoleize. 46Kir'eki Omukama arakunnaga omu mikono, nkutere ahansi, nkunogore omutwe. Kandi emitumbi y'eihe ly'Abafilisiti ningiha amahungu n'ebikaaka. Ensi yona emanye okwo haliyo Ruhanga omuli Isiraeli, 47n'ehururu egi yona emanye okwo Omukama tarokoza mbanda na ichumu, aha rw'okuba endashana y'Omukama; kandi naija kubanaga omu mikono yaitu.”

48Omufilisiti kayarugire mbali yabaire ali kutanganwa Daudi, na Daudi airuka bwangu agiire omu rubuga rw'endashana kumutanganwa. 49Daudi atahya omukonogwe omu nshahoye, aihyamu eibare alihubeeza omu kihubeezo, atera Omufilisiti omu kahanga k'obuso; eibare limutoberamu agwa ahansi ajumaire.

50Nikwo Daudi yasingisize atyo Omufilisiti eibare omu kihubeezo, akamutera akamwita. Akaba ataina mbanda mu mukono. 51Aho airuka, atungamira Omufilisiti ogwo, akwata embanda y'Omufilisiti agishohorora omu ruraro, agimunogoza omutwe, amwita. Abafilisiti kabaaboine okwo emanzi yabo yafa bairuka. 52Abaisiraeli na Yuda baimuka, batera orusharo, babinga Abafilisiti babagobya Gati n'aha bihigi bya Ekironi. Nangu n'emputa z'Abafilisiti zigwa omu muhanda kwema Sharaimu kulemwa kugoba Gati na Ekironi. 53Ahanyuma Abaisiraeli balemwa kubinga Abafilisiti, bagaruka banyaga orusisira rwabo. 54Daudi akwata omutwe g'Omufilisiti aguleta Yerusalemu, kyonkai ebikwatobye abita omw'ihemalye.

Daudi omu maisho ga Shauli

55Orwo Shauli yaboine Daudi nagenda kurashanisa Omufilisiti, abaza Abuneri omukuru w'eihe ati, “Abuneri, omusigazi ogu ni mutabani w'ohai? 56Omanyuruzege omulenzi ogu ni mutabani w'ohai.” 57Orwo Daudi yarugire kwita Omufilisiti, Abuneri amutwara omu maisho ga Shauli akwete omutwe gw'Omufilisiti. 58Shauli amubaza ati, “Iwe musigazi oli mutabani w'ohai?” Daudi ahorora ati, “Ndi mutabani w'omwiru wawe Yese Omubetelehemu.”

Currently Selected:

1 Samweli 17: RHAY01

Highlight

Copy

Compare