1 Samweli 16

Samweli nakora Daudi amajuta kuba mukama

1Omukama akambira Samweli ati, “Oraberahai n'okujunazibwa Shauli? Inye mwangire takiba mukama wa Isiraeli. Oijuze eihembe lyawe amajuta, oije nkutume, ndakutuma ahali Yese Omubetelehemu; omu batabani naronziremu omukama.” 2Samweli abaza ati, “Ngende ntai? Shauli k'arakihulira nanyita.” Omukama ahorora ati, “Ogende n'enyana y'enkiraiziba, ogambe oti, ‘Naija kutambira Omukama ekitambo.’ 3Oralize Yese aije aha kitambo, inye ndakwoleka eky'orakora. Owo ndakugambira omunkolere amajuta.” 4Samweli akora okwo Omukama yamugambira, agya Betelehemu. Abagurusi b'ekigo bagya kumuchwekera nibajugumba, bamubaza bati, “Waitu miembe?” 5Agamba ati, “Milembe, naija kutambira Omukama ekitambo. Mweshemeze mumpondere aha kitambo ekyo.” Ahasilira Yese n'abatabani, mara abaraliza aha kitambo.

6Orwo bagobire, aleba Eliabu atekeleza ati, “Rwona ow'Omukama alikwenda kukora amajuta niw'ogu omu maishoge.” 7Kyonkai Omukama amugambira ati, “Otaleba mizokereye anga kyemakye, ogu nimwanga. Okw'omuntu aleba tikwo Mukama aleba. Omuntu aleba emizokere y'aheru, kyonkai Omukama aleba aha mutima.” 8Aho Yese ayeta Abinadabu amurabya omu maisho ga Samweli. Samweli ati, “N'ogu Omukama tamuronzire.” 9Aho Yese arabyaho Shama. Samweli ati, “N'ogu Omukama tamuronzire.” 10Ahanyuma Yese arabyaho abatabani mushanju omu maisho ga Samweli. Samweli amugambira ati, “Aba Omukama tabaronzire.” 11Ashuba amubaza ati, “Batabani bawe bona bali aha?” Yese ati, “Hasigarayo omuto muno, kyonkai nalisa entaama.” Samweli amugambira ati, “Tuma bamulete, atagobire aha titulikushuntaama.” 12Yese atuma bamuleta. Akaba nayera ali murungi aha maisho, murungi w'okulebwa. Omukama agambira Samweli ati, “Imuka omukore amajuta, ogu niwe.” 13Aho Samweli akwata eihembe ly'amajuta, amukora amajuta omu maisho ga bakurube. Mwoyo wa Mukama abanda Daudi n'amani kwema kir'ekyo n'okugendelera. Samweli aimukya ashuba Rama.

Daudi omu kikaare kya Shauli

14Omu bir'ebyo Mwoyo wa Mukama aruga ahali Shauli, Omukama amusindikira mwoyo omubi ata namwita kubi. 15Abaramatabe bamugambira bati, “Mwoyo omubi owo Ruhanga akusindikiire nakwita kubi. 16Mbwenu Mukama oturagire ichwe abairu bawe abakukurasire, tuhige omutezi w'enanga omubuya, orwo mwoyo wa Ruhanga ow'alikukusindikira k'arata kukwijaho, ogu akutelere enanga obege.” 17Kityo Shauli abagambira ati, “Mumbonere alikumanya kugiterage, mumundetere.” 18Omusigazi omoi agamba ati, “Mboine mutabani wa Yese owa Betelehemu, mubuya omu kutera enanga, mushaija emanzi mara yakurashana, nyegendeleza omu kugamba mara aina ekyema kirungi; kandi Omukama amulimu.” 19Shauli atuma entumwa ahali Yese ati, “Ntwekera mutabani wawe Daudi omulisa w'entaama.” 20Yese akwata endogobe agitaho emikate, n'enfulebe y'edivai n'omwana gw'embuzi abitweka Daudi omutabani kubitwalira Shauli. 21Daudi agoba omwa Shauli abanza kumukolera. Shauli amugonza muno, aba mukwasi w'ebikwatobye. 22Shauli atuma ahali Yese ati, “Daudi agendelere kunkolera aha rw'okuba anganzire.” 23Buli orwo Ruhanga yasindikiraga Shauli mwoyo mubi, Daudi akwata enanga agitera; aho Shauli atukuruguka, abage, mwoyo mubi amurugamu.

Currently Selected:

1 Samweli 16: RHAY01

Highlight

Copy

Compare