1 Samweli 15

Shauli narashana n'Abaamaleki

1Samweli akagambira Shauli ati, “Omukama antumire kankukora amajuta okaba mukama w'Abaisiraeli abantube. Ahonu hulira okwo Omukama alikugamba. 2Omukama w'amahe nagamba ati, ‘Ninyija kubonabonyia Abaamaleki mbature ekyo baish'enkurubo bakozire Abaisiraeli, bakabatanga nibaruga Misiri. 3Mbwenu ogende oite Abaamaleki, ebyabo obisilikize kimoi, otabaganyira. Oite bona, omushaija n'omukazi, omwana muto n'alikwonka, ente n'entaama, engamia n'endogobe.’ ”

4Kityo Shauli ayeta abaisherukalebe, ababalira Teraimu. Ab'amaguru akagobya 200,000 aba Isiraeli, kandi aba Yuda 10,000. 5Kayagobire omu kigo ky'Abaamaleki yabazimbira omu ruhanga. 6Yagambira Abakeni ati, “Mugende muruge omu Baamaleki ntakwija nkabasilikijanyia nabo, aha rw'okuba mukagilira Abaisiraeli ekisha orwo babaire nibaruga Misiri.” Nikwo Abakeni kuruga omu Baamaleki. 7Shauli asinga Abaamaleki kwema Havila kulemwa kugoba Shuri eli oburugaizoba bwa Misiri. 8Agagi omukama wabo amukwata obunyangaro, kandi abantu abasilikya kubi abaisa embanda. 9Kyonkai Shauli n'abantube baganyira Agagi, n'entaama ezirungi muno, ente ezigomokire n'obutaama na byona ebyabaire bili birungi. Bakaita ebyabaire nibigaywa, ebitaina mugasho.

Omukama nayanga Shauli

10Omukama agambira Samweli ati, 11“N'inyefuhya ekyo nateleire Shauli aha ngoma. Ahakuba anshengire n'emihango yange talikugihikya.” Samweli anigara, arara natakira Omukama. 12Aimuka karai kutanganwa Shauli omu bwankya. Bamubarulira bati, “Shauli agire Karimeli yasimbayo eibare ly'akaijukiro, yashuba yagya Giligali.” 13Samweli aija ahali Shauli, Shauli amugambira ati, “Omukama akuhe omugisha, inye ngobesheleize omuhangogwe.” 14Samweli amubaza ati, “Entaama ezo ndikuhulira nizijugibwaki? Isi ente ezilikujumeera?” 15Shauli amuhorora ati, “Entaama ezo n'ente abashaija bange bazihire omu Baamaleki. Basigireho ezirungi muno ez'okutambira Omukama Ruhanga waitu ebitambo. Ezisigaire tuzisilikize kimoi.” 16Aho Samweli amugambira ati, “Lekera! Kankubarulire eky'Omukama yangambira omu kir'eki.” Shauli ati, “Gamba.”

17Samweli agamba ati, “N'orwo omu bwawe oraba noyegaya, oli mukuru w'enganda za Isiraeli. Omukama akakukora amajuta waba mukama wa Isiraeli. 18Kandi akakutuma butuma nagamba ati, ‘Ogende otere Abaamaleki, abantu babi, obaite bahweho.’ 19Kubaki otamuhuliire? Nshongaki kururukira eminyago okafakalira Omukama?” 20Shauli amuhorora ati, “Omukama muhuliire, mbali antumire ngiireyo, Agagi omukama w'Abaamaleki namuleta, kandi Abaamaleki nabasilikiza kimoi. 21Abashaija bange bakwete eminyago y'entaama n'ente, baihyamu ezirungi muno ez'okutambira Omukama Ruhanga wawe omuli Giligali.” 22Samweli amubaza ati,

“Omukama ashemelerwa ebihongo by'okwokibwa n'ebitambo

kushaga okumuhulira?

Leba, omuhuliro gurungi gushaga ekitambo,

gukira ebishaju by'empaya y'entaama.

23Okumushenga kushusha obufu bw'okuraguza,

n'okugumangana omutima kushusha okufukamira ebihuuku.

Orwo oyangire eky'Omukama akuragiire,

na wenene yakwanga tokiba mukama.”

Shauli natongana

24Shauli agambira Samweli ati, “Nfakaire, natina abantu nahulira ebyabo, kandi nachwa omuhango gw'Omukama nashaga n'ekigambo kyawe. 25Mbwenu ninkushaba oganyire obufu bwange, tushubeyo hamoi nfukamire Omukama.” 26Samweli amugarukamu ati, “Titugarukeyo hamoi, kuba orwo oyangire kuhulira Omukama na wenene akwangire, tokiba mukama wa Isiraeli.” 27Samweli kayahindukire kugenda, Shauli amukwata omukugiro gw'ebeboye etaguka. 28Samweli amugambira ati, “Kir'eki Omukama yakutaguraho obukama bwa Isiraeli, mara yabuha mutabani wawe omurungi kukushaga. 29Ruhanga, ekitinwa kya Isiraeli talikwija kubeiya anga kwefuhya; tayefuhya aha rw'okuba taba muntu.” 30Shauli amugambira ati, “Nfakaire, kyonkai mbwenu ninkutagiliza ompe ekitinwa omu maisho g'abagurusi b'abantu bange, n'omu maisho ga Isiraeli tugarukeyo hamoi nfukamire Omukama Ruhanga wawe.” 31Samweli ashubayo na Shauli, Shauli afukamira Omukama.

Samweli naita Agagi nashuba nataishukana na Shauli

32Samweli aragira ati, “Ndetera Agagi omukama w'Abaamaleki hanu aha.” Agagi amugoba nashemelerwa, agamba ati, “Obushasi bw'orufu bwahwaho.” 33Samweli agamba ati, “Okwo embandwa yawe echwire abakazi amabere, nikwo erachwa nyoko amabere omu bakazi.” Aho Samweli achwagachwagura Agagi omu maisho g'Omukama omuli Giligali.

34Ahanyuma Samweli agya Rama, kandi Shauli agya omwe Gibea eya Shauli. 35Samweli tiyaboine Shauli rundi kuhika kir'ekyo yafire. Kyonkai amujunalira muno. N'Omukama ayefuhya ekyo yateleireho Shauli kuba mukama wa Isiraeli.

Currently Selected:

1 Samweli 15: RHAY01

Highlight

Copy

Compare