Zimbazi 4
4
Cambuzi ce mahala
1Nye wanangu, muhulicize zono sogo yenyu yakumufundenyi.
Mugebate,
mafundo gakwe ho mowa no wizuce.
2Hambi 'ne zono nghumwijizenyi,
nha nghani swanu,
holeka muzikumbucile zose.
3Hambi ane nha nali mwana kuli sogo yangu.
Mudodo mwendece we ciwene mwa yaya.
4Baba yafundaga yatezaga,
“Ale, wukumbucile kuli zono nghukulonjela,
wulece kuzisemwa.
Weze kwituma nha vyono nghukulajiliza,
nagwe holeka kowumipa.
5Wutuje mahala,
hamonga no wizuce! Wulecele lukulu kusemwa,
hamba kuzibedegala zinghani zangu.
6Wulece kumuleka mahala,
nayo kokukamisa.
Wumwende, nayo kokucitila,
wikale wupolile.
7Kutuga mahala yo nghani mbaha yono yicizize,
yono yikunojeye wuyitume.
Heya, hamonga ne zisawo zako zose,
ninga wunojeye witujile mahala.
8Wende mahala,
nayo kokupela lilumbo.
Wumwibatilize,
nayo kokuletela lukumyo.
9Nayo kowa wo mukumbo wo lukumyo mu mutwe wako.”
10Gwe mwanangu, wuhulicizaje,
wuzikamisizaje lukulu zose zono nghukulonjela,
nagwe holeka kokwikala vilo vinji mono'nze.
11Ane nakondya kukwijiza mahala,
hamonga ne nzila swanu yono koyikola mu mikalile yako.
12Kanyhi hasina cinji co cose cono cokwimila mu zinzila zako,
hono wuwe kujenda kwe mahala,
na kanyhi hamba si kokwikobala yaye lono wukumangha.
13Nhondo zose weze wibate zono weyijiza,
hambi mejizo gako,
nha wo wumi wako,
holeka wugalanjililaje galece kukutiga.
14Wulece kwinjila mu zinzila wetuma zimbi.
Wulecele lukulu kuyityatya misambo ye wanhu wabi,
15Wulece kwituma zizo,
wuwucile lukulu mu zimbi!
Wuzilemaje zimbi,
wilegaje mu zimbi.
16Nawo i wanhu wabi,
hamba si wagonaga nhongo sunga langa wetume zimbi du.
Wagonaga meso,
sunga watamise munhu yunji.
17Nago metumo mabi kuli wene yo ndigwa yawo, hamonga.
No wukali, nawo kuli wene,
vihwanile no wugali ne malenga go kung'wa.
18Nayo nzila yono wakolaga wanhu we ling'ani,
yihwanile wuzelu we lizuwa lono likusosomoka,
nalyo liwa kujendelela kutuga wuzelu muno sunga kolo welelecela.
19Ninga nzila ye wanhu wabi,
yina wutitu, yihwanile cilo.
Nawo wakwikobaza hamba kumanya cono ciwakobaze yaye.
20Holeka agwe mwanangu,
wukamise zono nghulonga,
wuzihulice zinghani zangu.
21Wulece kuzileceleza zikutije,
wuzikumbucilaje,
wuzikamise mu nhumbula yako.
22Nazo zomupela wumi hamonga ne vilungo vyo muwili
munhu wo wose mono yakuzizuka.
23Holeka wuyikamise nhumbula yako,
hambi mumo nha mo yilawaga mivwilo yo wumi.
24Wulece kulonga wulambi.
Wilegaje muli zinghani zo wulambi,
hamonga ne zinghani ze liwanjilila.
25Meso gako,
galanje ku mwande du,
hamonga no witumbilo,
wulece kwikoza cevu.
26Weze wuli mulanjilizi muno,
muli zose zono wukwituma,
wukumanya vyono,
zono wukwituma zose swanu.
27Wilegaje mu zimbi,
meso gako galanje ku mwande du.
Hamba nghanzo yako monga du,
yilece kupatuka mu nzila.
Currently Selected:
Zimbazi 4: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.