Zimbazi 3
3
Mafundo kuli wazelelo
1Gwe mwanangu, wulece kuzisemwa zono nghukwijiza.
Kanyhi weze kuzikumbucila nhondo zose zono nghukulajiliza witume.
2Ne mafundo gangu,
gokupela wumoteswe vilo vinji hamonga no mu mikalile yako.
3Weze wuli mwihuwilwa,
kanyhi wuli cihuliko.
Wuwuwopeleze wihuwilwa ne cihuliko mu singo yako,
wuvyandice mu nhumbula yako mugati.
4Nagwe hono witume zizo,
u Mulungu hamonga ne wanhu wokwendezwa nagwe.
5Wumwitumbile Muwaha Mulungu kwe nhumbula yako yose.
Wulece kwiyitumbila mahala gako go mweneco.
6Wumukumbucile Muwaha Mulungu,
muli zose zono wukwituma,
nayo kokutonga mu nzila yono yinojeye.
7Ninga wulecele lukulu kwihwesa nha vyono,
agwe wuli we mahala go mweneco,
langa agwe weze ne cihuliko kuli Muwaha Mulungu du,
kanyhi wulemele lukulu kwituma zimbi.
8Na hono wuwe ne cihuliko kuli Muwaha Mulungu,
ale, yowa nha miti miswanu,
yono yokuponya zinghomele zako no kukucepulila wusungu wako.
9Wumulumbe Muwaha Mulungu,
mu nzila yo kumulavizya vilimwa viswanu vyono wuvitujile mu mugunda wako.
10Hobaho nago madongha gako,
gomemywa wuhemba,
kanyhi kowa na divayi nyinji yono yokufutila na ha wuwiko wayo.
11Mwanangu, kolo Muwaha Mulungu yakukufunda,
wulece kugabedegala mafundo gakwe,
langa wugabocele.
12Hambi Muwaha Mulungu,
nha kawafundaga wose wono yawendile,
nha vyono sogo yo munhu kamufundaga mwanagwe mono yamwendile.
13Yo mumoti munhu mono kawonaga mahala,
no munhu mono katugaga wizuce.
14Hambi nha mo mocili cambuzi ciwaha muno si nhe cambuzi ca mu fweza.
Kanyhi mocili cambuzi ciwaha muno si nhe zahabu.
15Mahala, mbeka gena sawilo mbaha muno,
si nhe vibwe vyo wuguzi wukamu,
na hasina cinhu cinji co cose,
cono kocisaka cono kosuma kwihwananiza ne mahala.
16Mahala gakupelaga vilo vinji vyo kwikala mumi mu mikalile yako,
hamonga no wugoli ne lilumbo.
17Mahala gokupela nyemo mu mikalile yako hamonga no mulamu.
18Na wose wono wena mahala,
wena nyemo.
Ne mahala gowapela wumi.
19Muwaha Mulungu yayiwumba yinze,
kwe mahala gakwe.
Na ko wizuce wakwe,
yakawusimya wulanga.
20Kanyhi mahala gakwe go gaganoza makolongo gahulume,
ne mavunde nago gayitonyeze mvula mono 'si.
21Holeka agwe mwanangu,
wukamise mahala hamonga no wizuce.
Wulece kuvileceleza vikutije.
22Hambi nha vyo vyokupela wumi,
no wendezwe,
hamonga ne mikalile ye nyemo.
23Nagwe kowa kujenda wupolile mu zinzila zako,
hamba si kokwikobala yaye.
24Kanyhi kowa wusina woga wo wose,
lono wukwinjila kugona mu citanda cako.
Heya ku cilo kogona nhongo zono zili muzinzi.
25Hamba si kosuma kugacelelela magayo gono gokuziza nhinicizo,
hamba mukukunzo we wabi kolo wukukuziza.
26Hambi Muwaha Mulungu nha kokukamisa.
Hamba si kokuleka yaye wugwile mu mutego.
27Holeka agwe,
weze kuwatendela ziswanu wono wena wanjile,
mu nghango vyono kosuma.
28Kanyhi wulecele lukulu kumutya muyago,
yalindile sunga mitondo yaco,
hono kumbe nagwe wali wusume kumupela wutazi lwa kamonga du.
29Kanyhi wulece kumuwicila muyago cikobazo ho wumutamise,
hambi yuyo muyago,
nha mwikalene behi,
kanyhi mwene yakwitumbiye gwegwe.
30Kanyhi wulece kwisumaniza no muyago mbula soko,
lono nayo hamba si yakunozize yinji 'mbi.
31Wulece kuwawonela wivu,
i wanhu wagazi,
hamba wulece kuwega mu metumo gawo.
32Hambi Muwaha Mulungu,
nha yawasulile i wanhu wetuma zimbi,
langa i weling'ani,
mwene yali hamonga nawo.
33Muwaha Mulungu kazilijitizaga zikaya ze wanhu wabi,
ninga zikaya ze weling'ani,
mwene kazimotyaga.
34Kanyhi mwene si kawasakaga i wanhu wedunhumuzi,
langa kawapelaga lihewa i weneneyhezi.
35Iwe mahala wotuga lukumyo,
ninga walele, wokozwa cevu.
Currently Selected:
Zimbazi 3: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.