Zimbazi 5
5
Suguzi kuli zo wusenyha
1Gwe mwanangu,
wukamise no kuzihulika ze mahala gangu no wizuce.
2Nagwe ho komanya nzila ze nyikala ye cogopo,
ne zinghani zako zokulajila vyono kumbe wina mahala.
3Hambi milomo yo mugolece wo munhu yunji,
nha yiwezaga yili muzinzi nho wuci,
ne nonela yakwe,
yiteleye yinhe mafuta,
4ninga kolo zose zakondya,
hodu mwene kawa kukuleka,
wina wusungu ne mawine.
5Nayo kokukwenghweleza sunga yakufise ku yisi ye wafu,
hambi nzila yono yayikoleye,
nha nzila yono yibitile ku wufwe.
6Hambi mwene nha si kajendelaga mu nzila yo wumi,
langa keyedyaga caka,
hamba kumanya zono zomwagana yaye.
7Anye wanangu, ale ta,
muhulicizaje,
kanyhi mulece kuzisemwa zono nghulonga.
8U mucekulu we liwala lilyo,
mumwilegaje ye!
Hamba no kusejelela ha mulango wakwe du,
mulecele lukulu.
9Ku soko hono wunoze zono zinha zizo,
wanji wokusolela lilumbo lyako lyono wali wina nalyo,
nagwe kofwa wukali mudodo,
kanyhi kofwila mu miwoko ye wanhu wono wasina lusungu.
10Nawo wajenzi woyisola sawo yako,
na vyose vyono wali wavituga mu milimo yako,
vyose vyosolwa no munhu yunji.
11Nagwe kolofwila mu wusungu,
kolo muwili wako hamonga ne nghuli yako vikuligwa,
12nagwe baho ho kolotela,
“Alu nye, nhawule si neyijiza?
Hamba nhawule si namuleka yunji yanhaze?
13Hamba si nenda kuwahulika walimu wangu,
hamba kuwacelelela yaye.
14Nane nghewona nhinicizo
vyono nakondya kukozwa cevu cagalanze.”
15U mugolece wako yehwanile cisima ce malenga mapolo,
ale, weze wuli mwihuwilwa kuli mugolece wako,
no wendo wako weze wuli kuli mweneco du yali wene.
16Ne wana nawo wono wulelile ako kudeha,
kuli mucekulu yunji,
wawo hamba si wokutaza cinji yaye.
17Hambi i wanago,
nha wanojeye wawiluce,
ho wakutaze gwegwe,
ninga si wawo wajenzi yaye.
18Holeka yikunojeye wumusangalalile mugolece wako,
wuwone vyono wina nyemo no muhinza mono mwitolile.
19Hambi nha muswanu ku wulangwe,
kanyhi yakwendeza nha cizimba.
Wulece vitombo vyakwe vikusangalaze nhondo zose.
Nagwe wendezwe muno no wendo wakwe kuli'gwe.
20Alo socici mwanangu,
wukuwugawa wendo wako kuli mucekulu yunji?
Hamba nhawule vitombo vyo mucekulu
wo munhu yunji vyo vikwendeze 'gwe?
21Ninga wumanye vyono,
Muwaha Mulungu kaziwonaga zose zono kwitumaga.
Nayo kakulanjililaga ko kose kono wukubita.
22Kanyhi wumanye vyono u wubi wo munhu mubi,
mutego kuli mwene.
Hambi nha kokwigwiza mu mutego wo wubi wakwe mweneco.
23Hambi nha yakwiwulaga
mweneco so wu wula kwiyimila kwakwe.
No wulele wakwe,
wo womufisa ko ku citenjelo.
Currently Selected:
Zimbazi 5: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.