Wuwale 35
35
I makaya gono wapegwa Walawi
1Muwaha Mulungu yakalongana na Musa lono yali yali mu yisi yo wuhihi ya Mowabu, ku nhumbi ya Yoludani behi na Yeliko, yakatya, 2“Ale, walonjelaje Waisilayeli, vyono yiwanojeye wawagawile nawo Walawi makaya ganji, nawo wekale mumo, no wudimilo we mitugo zawo, wuwe behi behi ne makaya gago. 3Ne makaya gago gowa sawo ye Walawi, nawo wokwikala mumo. Nawo wudimilo wowa wudimilo we zing'ombe zawo hamonga ne mitugo zinji zose. 4Nawo wudimilo weze hanhu hagazi ku wulawilila mu majinji ge likaya. Weze wugazi wa mita magana mane na makumi mahano mu wupilima likaya mbavu zose. 5Na mu nzila yiyo, wudimilo wowa no wugazi wa mita magana yicenda mu mbavu zose, ne likaya lyowa lili haciligati. 6Kanyhi muwapele Walawi makaya ganji, gali mutandatu, gawe hanhu ha wutizizo wo munhu hono lunji yawulaje munhu mhalanyuka. Hamonga na zizo, wawapelaje kanyhi makaya ganji makumi mane na mejete, 7hamonga no wudimilo wayo, nago mu wutowelele wago, gowa gaficile makumi mane na munana. 8Ne liwalo lye makaya ge Walawi, gono wosuma kwikala, geze gakwiliye mu nghango ye yisi yawo vyono yinha.”
Makaya go Wutizizo
(Kum 19:1-13; Yos 20:1-9)
9Muwaha Mulungu yakamulonjela Musa 10yawalonjele Waisilayeli yatye, “Kolo mweza kulowoka likolongo lya Yoludani, na kolo mwenjila mu yisi ya Kanani, 11ale mugawagule makaya ganji gawe so wutizizo, hono munhu yawulaje yunji mhalanyuka, ho yasume kutiziza mumo no kwiponya. 12Mumo mo kokwiponezya kuli wandugu za mono yafwiye, hono wasace kwilipiciza so ndugu yawo. No munhu hono yasitakwe vyono kawulaga munhu, yalece kuwulagwa musunho, sunga calo cakwe yaling'anizwe calinze hali wanhu. 13Holeka muhagule makaya mutandatu, 14madatu gawe ku lubavu lwa kucilima ya Yoludani, ne madatu, gawe mu yisi ya Kanani, 15Nago gosuma kuwa ho hanhu ha wutizizo we Waisilayeli, hamonga ne wajenzi wono mwikaye nawo nha waduwi du, hamba wono mwikalane nawo, wono si wolohama kanyhi. Nayo mono komuwulaga munhu mhalanyuka, yowa yimunojeye yatizize muli limonga lya mu makaya gaga.
16“Na hono munhu yetumamile citwalo ca cuma 17hamba yibwe, 18hambe 'bici, yawulaje munhu, yuyo kowalwa vyono muwulaji, nayo munhu yuyo yanojeye yawulagwe. 19No nduguye wa mono yawulagwe, yuyo yo kowa yanojeye yamuwulaje munhu yuyo u muwulaji. Nayo yamuwulaje du kolo vikwitang'anila nayo.
20“Na hono munhu yawe yamusulile muyagwe, ho yamuwulaje mu nzila yo kumubamiliza hasi, hamba lunji mu nzila yo kumutowa na cinhu cinji, 21hamba lunji yamutowanje na funzi, ale, munhu yuyo kowalwa vyono muwulaji, nayo yanojeye yawulagwe. No nduguye wa mono yawulagwe, yuyo yo kowa yanojeye yamuwulaje munhu yuyo u muwulaji. Nayo yamuwulagaje du kolo vikwitang'anila nayo.
22“Lunji munhu hono yamuwulaje muyagwe mhalanyuka, mono si yali musili wakwe, lunji yamuwulaje mu nzila yo kumubamiliza hasi, lunji mu nzila yo kumugumilila cinhu cinji. 23Hamba lunji munhu, kagumila yibwe wula kuwona, nalyo limutowa munhu kafwa, nayo yawe siyaligumiye libwe ne nyono, langa yali mhalanyuka du, no munhu yuyo yawe si yali musili wakwe yaye. 24Ale mu zinghani ze liwala lili, yinojeye mhuga yose hamonga, yo yizilamule mu nzila yo kumuwonela lusungu u munhu mono yawulaje. Ninga yilece kuwa mu nzila yo wuwonela lusungu ayulya mono yakondya kufwilwa no nduguye, hambi mwene yuyo nha kosaka du yelipicize, so lifwa lyo nduguye. 25Yinojeye mhuga yose yimuponye u munhu mono yetumile lisutya lyo wuwulaji mu miwoko yo ndugu yo munhu mono yafwiye. Na yowa yinojeye u munhu yuyo yagomolezwe ku kaya yo wutizizo, kono yali yakondya kutiziza. Nayo yekalaje kuko du, sunga kono kofwila u Mukohani Muwaha mono yetilwa mafuta gono gelile, mono yali baho lulo. 26Na hono munhu mono yawulaje, yawuce mwi'kaya lyono yali yatiziza, 27na hono munya nduguye mono yawulagwe yamuwone mumo mwihala, yamuwulaje, ale wilipicize wuwo si wowa wuwulaji yaye. 28Holeka yinojeye u munhu muwulaji yekale mumo du mwi'kaye lyo wutizizo, sunga kono kolofwila Mukohani Muwaha mono yali baho mu vilo vivyo. Na kolo mukohani yakondya kufwa, hodu kosuma kuwuya ku kaya yakwe. 29No wutemye wuwu wuli so nyenye na mu ndelo zenyu zose, mu wikalo wenyu wose.
30“No munhu hono yawulaje munhu muyagwe, yuyo kowa muwulaji, nayo yimunojeye yawulagwe mu nzila ye wahomelezi wejete, hamba kuciza. Hambi wuhomelezi wo munhu monga, nha si wukwiliye yaye kuhomelela wufwe wo munhu. 31Nayo mono yakuwulaga munhu, yanojeye nayo yawulagwe. Hamba mulecele lukulu kubocela malipo ge mapesa kuli munhu yuyo muwulaji, ho yeponye mu wulipicizwe wakwe ku so wuwulaji. 32Na hono munhu yawe yatiziza kwi'kaya lyo wutizizo, mulecele lukulu kumulumbiza yalipe pesa, ho yakombolwe yawuye ku kaya yakwe, lono Mukohani Muwaha yakali si nafwa. 33Na hono mwijelele du munoze nha vivyo, hodu mowa mwayavufya yisi yono mwikaye. Hambi wuwulaji nha wukuwa kuyavufya yisi, hamba hasina cilavywa cinji cono cosuma kuyeza yisi, ku soko yo wuwulaji wono witumiywe muli yene, langa hono si lifwa lya yuyo munhu muwulaji du, sunga yawulagwe. 34Holeka mulecele lukulu kuyavufya yisi yono mwikaye, hambi ane nha yonene Muwaha Mulungu, nane nikaye hamonga ne wanhu wa Isilayeli.”
Currently Selected:
Wuwale 35: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
