Wuwale 34
34
I mipaka ye yisi
1Muwaha Mulungu yakamulonjela Musa 2wulajilize awuno so Waisilayeli yakatya, “Kolo mweza kwinjila mu yisi yono nghumupelenyi, yisi ya Kanani, ale, mipaka ye yisi yenyu yowa nhavi: 3Ku lubavu lwa kutakama, mupaka wowa mugazi wulawiliye mu nyika ya Zini, mu mupaka wa Edomu. Nawo wokwanziza ku lubavu lwe ndumilizo ya kutakama, ye lilenga lyo mwino kucilima yayo. 4Hanyuma wojendelela sunga ko ku lubavu lwa kutakama ku wubita ku Akelabimu Pasi, nawo wojendelela wukole mu Zini ku lubavu lwa kutakama ye Kadeshi Balineya. Hanyuma kanyhi, mupaka wojendelela sunga ko ku lubavu lwe mwezi ye sumuka ku Hazali Adali, nawo wobita sunga ko ku Azimoni, 5hanyuma ho wokunga wulanje kwi'lolo, ku mupaka wa Misili, nawo wodumiliziza mwi'lenga lya Meditelaneya.
6“Holeka mupaka wo lubavu lwa kumwezi, wowa lilenga lya Meditelaneya. 7Nawo mupaka wo lubavu lwa kusumuka, awo wowa wugolocile du ku wulawa lilenga lya Meditelaneya sunga ko kwi'tunda lya Holi. 8Na ku wulawa baho, wojendelela sunga ko ku Hamati Pasi. Kanyhi wojendelela sunga ko ku Zedadi, 9sunga ku Zifoloni, nawo wodumiliziza ku Hazali Enani.
10“Nawo mupaka wa ku lubavu lwa kucilima, wowa wugolocile du, ku wulawa Hazali Enani sunga ko ku Shefamu. 11Hanyuma wojendelela sunga ko kutakama ku Halibeli, kucilima ye Ayini, sunga mu matunda, ku mhwani ya kucilima ye lilamba lya Galilaya. 12Hanyuma kanyhi wojendelela sunga kutakama kwi'kolongo lya Yoludani sunga kwi'lenga lyo mwino.
“Nayo mipaka yiyi, yowa mipaka mine ye yisi yenyu.”
13Nayo Musa yakawa kuwaloloseza zizi Waisilayeli yakutya, “Ayi yo yisi yono mosuma kugawana mu nzila yo kutowa kula, yisi yono Muwaha Mulungu yakondya kuyilavya ho yiwe so we milango yenyu yicenda na nusu. 14Hambi i we milango ya Lubeni na ya Gadi, hamonga ne nusu ya wo mulango wa Manase, wono wali ku lubavu lwa kucilima, awo wose nha wakondya kulituga ligawo lyawo, nawo wakagawilwa mu nghango yo winji wa mu zimhuga zawo, 15ku lubavu lwa kucilima ye likolongo lya Yoludani, vidome na Yeliko.”
I walongola wono wapegwa mulimo wo kuyigawa yisi
16Muwaha Mulungu yakamulonjela Musa yakatya, 17“Eleyezali mukohani, hamonga na Yoshuwa u mwana wa Nuni, wawo wo wetumaje mulimo wuwo wo kuwagawila wanhu yisi. 18Kanyhi wuhagule wanhu wanji monga monga mu wulawa mu milango yose nha vyono yinha, ho wawataze mu mulimo wuwu wo wugawa yisi.” 19Nawo wanhu wono Muwaha Mulungu yawahagula so mulimo wuwo, wowano:
Wo mulango wa Yuda,
Kalebi mwana wa Yefune.
20Wo mulango wa Simiyoni,
Shelumiyeli u mwana wa Amihudi.
21Wo mulango wa Benyamini,
Elidadi u mwana wa Cisiloni.
22Wo mulango wa Dani,
Buki u mwana wa Yogili.
23Wo mulango wa Manase,
Haniyeli, umwana wa Efodi.
24Wo mulango wa Efulayimu,
Kemuyeli u mwana wa Shifatani.
25Wo mulango wa Zabuloni,
Zelizafani u mwana Palinaki.
26Wo mulango wa Isakali,
Pelitiyeli u mwana wa Azani.
27Wo mulango wa Asheli,
Abihudi u mwana wa Shelomi.
28Wo mulango wa Nafutali,
Pedaheli u mwana wa Amihudi.
29Wawa wo wanhu wono Muwaha Mulungu yawahagula, wetume mulimo wo kugawa yisi kuli wanhu wa Isilayeli, mu yisi ya Kanani.
Currently Selected:
Wuwale 34: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
