Wuwale 33
33
Muhinzo wo kulawa ku Misili kubita ku Mowabu
1Ali lyo liwalo lye matagwa ge hanhu hono Waisilayeli wasitaga zinghambi zawo, lono wawucila ku Misili, mu nghango ye milango yawo, hasi yo wutonji wa Musa na Haluni. 2Musa yakasuma kwandika matagwa ge hanhu hose hono wasitaga zinghambi, nha vyono Muwaha Mulungu yamulajiliza.
3I Waisilayeli, wawuka ku Misili mwi'zuwa lye likumi ne'hano lya mu mwezi mulongozi wa mu mwaka, mwi'zuwa lye Pasaka nongozi. Nawo wawuka mwi'kaya lya Lamesesi ha meso ge Wamisili, 4lono wene Wamisili wali wali mu mulimo wo kuzika i wana wawo we cilume i walongozi kulelwa, wono Muwaha Mulungu yawawulaga. Na mu wunoza zizi, Muwaha Mulungu yalajila vyono mwene yali vilungo muno muno kuciza milungu ya Misili.
5Nawo Waisilayeli wawuka ku Lamesesi, wakasita nghambi yawo ku Sukoti. 6Ne nghambi yawo yono yatyatya, yali yili ku Etamu, ha mwejelele we nyika. 7Na ku wulawa baho, wakawuya ne nyuma, wakabita ku Habiloti, kulubavu lwe cilima ya Baali Zefoni, wakasita nghambi yawo behi na Migidoli. 8Wakawuka ha Pi-hahiloti, wakakolela he 'lenga lya Shamu, mu nyika ya Shuli, nawo wali weza kujenda muhinzo wa vilo vidatu, wakasita nghambi yawo ha Mala. 9Na ku wulawa baho, wakabita Elimu, wakasita nghambi yawo baho, hambi nha hali na vikolongo vye malenga yikumi na vyejete, hamonga ne mitende makumi mupunghati.
10Wakawuka Elimu, wakasita nghambi he'lenga lya Shamu. 11Ne nghambi yawo yono yatyatya yali ya mu nyika ya Zini. 12Hanyuma wakasita nghambi yawo ha Dofeka. 13Wali weza kuwuka baho, wakabita Alusi. 14Na yono yatyatya, yali Lefidimu, i hanhu hono hali ho yili nyhilu mbaha ye malenga go kung'wa wene.
15Wakajenda muhinzo wulawa Lefidimu, wakasita nghambi yawo mu nyika ya Sinayi. 16Wakajenda muhinzo wulawa mu nyika ya Sinayi, wakasita nghambi yawo ha Kibeloti-hatava. 17Wakajenda muhinzo wulawa Kibeloti-hatava wakasita nghambi yawo ha Hazeloti. 18Wakajenda muhinzo wulawa Hazeloti, wakasita nghambi yawo ha Litima. 19Wakajenda muhinzo wulawa Litima, wakasita nghambi yawo ha Limoni-pelezi. 20Wakajenda muhinzo wulawa Limoni-pelezi, wakasita nghambi yawo ha Libina. 21Wakajenda muhinzo wulawa Libina, wakasita nghambi yawo ha Lisa. 22Wakajenda muhinzo wulawa Libina, wakasita nghambi yawo ha Kehelata. 23Wakajenda muhinzo wulawa Kehelata, wakasita nghambi yawo mwi'tunda lya Shefeli. 24Wakajenda muhinzo wulawa he 'tunda lya Shefeli, wakasita nghambi yawo ha Halada. 25Wakajenda muhinzo wulawa Halada, wakasita nghambi yawo ha Makiloti. 26Wakajenda muhinzo wulawa Makiloti, wakasita nghambi yawo ha Tahati. 27Wakajenda muhinzo wulawa Tahati, wakasita nghambi yawo ha Tela. 28Wakajenda muhinzo wulawa Tela, wakasita nghambi yawo ha Mitika. 29Wakajenda muhinzo wulawa Mitika, wakasita nghambi yawo ha Hasimona. 30Wakajenda muhinzo wulawa Hasimona, wakasita nghambi yawo ha Moseloti. 31Wakajenda muhinzo wulawa Moseloti, wakasita nghambi yawo ha Beneyakani. 32Wakajenda muhinzo wulawa Beneyakani, wakasita nghambi yawo ha Holi-hagidigadi. 33Wakajenda muhinzo wulawa Holi-hagidigadi, wakasita nghambi yawo ha Yotibata. 34Wakajenda muhinzo wulawa Yotibata, wakasita nghambi yawo ha Abilona. 35Wakajenda muhinzo wulawa Abilona, wakasita nghambi yawo ha Eziyoni-gebeli. 36Wakajenda muhinzo wulawa Eziyoni-gebeli, wakasita nghambi yawo mu nyika ya Zini, (Nha cinji nyika ya Kadeshi.) 37Wakajenda muhinzo wulawa Kadeshi wakasita nghambi yawo he'tunda lya Holi, ku mhelo ya Edomu. 38Haluni u Mukohani yakabita kucanyha ye litunda lya Holi nha vyono yalajilizwa no Muwaha Mulungu, yakawa kufwila kuko, mu mwaka we makumi mane ku wulawa mu mwaka wono Waisilayeli wawucila ku Misili, mu mwezi we hano, mwi'zuwa lilongozi lyo mwezi. 39Lulo, Haluni yali yaficila myaka yigana limonga na makumi mejete na midatu, lono yafwilila mwi'tunda lya Holi.
40U mutemi we Cikanani, mono yali yatemile ku Aladi, mono yekalaga kutakama mu yisi ya Kanani, yakazihulika zo wuze we Waisilayeli. 41Nawo Waisilayeli wakajenda muhinzo wulawa Holi, wakasita nghambi yawo ha Zalimoni. 42Wakajenda muhinzo wulawa Zalimoni, wakasita nghambi yawo ha Oboti. 43Wakajenda muhinzo ku wulawa Punoni wakasita nghambi yawo ha Oboti. 44Wakajenda muhinzo wulawa Oboti, wakasita nghambi yawo ha Iyeyabalimu, mu mupaka wa Mowabu. 45Wakajenda muhinzo wulawa Iyimu wakasita nghambi yawo ha Diboni-gadi. 46Wakajenda muhinzo wulawa Diboni-gadi wakasita nghambi yawo ha Alimoni-dibulatayimu. 47Wakajenda muhinzo wulawa Alimoni-dibulatayimu, wakasita nghambi yawo mu matunda ga Abalimu, vidomile na Nebo. 48Wakajenda muhinzo wulawa ha matunda ga Abalimu, wakasita nghambi yawo mu yisi yo wuhihi ya Mowabu, ha Yoludani, behi na Yeliko. 49Wakasita nghambi yawo ha Yoludani wulawa Beteyeshimoti, sunga ko ku Abeli-shitimu, mu yisi yo wuhihi ya Mowabu.
Wulolosezwe lono wakali nalowoka Yoludani
50Na lono wali wakali wali baho, mu yisi yo wuhihi ya Mowabu, ku nhumbi ya Yoludani behi na Yeliko, Muwaha Mulungu yakamulonjela Musa 51yawaloloseze Waisilayeli wityatye awu, yakatya, “Kolo mweza kulowoka likolongo lya Yoludani, mukwinjila mu yisi ya Kanani, 52Ale, munojeye muwawinje wekazi wose wa mu yisi yiyo. Muvyongomezeze lukulu i vihwani vyawo viseswe, hamonga ne hanhu hawo hose ho wuhembelo wawo. 53Muyisole yisi, mwikale mumo, hambi ane nha nimupelenyi nyenye yisi yiwe yenyu. 54Hanyuma muwe kuyigawa yisi mu nzila yo kutowa kula, milango yi yino yose, yituje mulango na yisi yawo, mu nghango yo winji we liwalo lyawo vyono winha, wanhu na mulango wawo. 55Ninga mulanjilile! Hono mulece kuwawinga i wekazi wose wa mu yisi yiyo, wawo wono mowasigaza, wowa nha mamiya mu meso genyu, na mu zi mbavu zenyu. Nawo wowa yitimvya yiwaha muno muno muli nyenye. 56Na hono mulece du kuwawinga, ane yo nomongomezenyi nyenye, nha vyono anye mwali mwiwikanize ho muwongomeze wene.”
Currently Selected:
Wuwale 33: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
