Wuwale 31
31
U wulugu wono welile kuli Wamidiyani
1Muwaha Mulungu yakamulonjela Musa yakatya, 2“Walipicizaje Wamidiyani ku soko ya zono wawatendeye wanhu Waisilayeli. Na kolo wakondya kuzituma zizi, nagwe nhondo ho wuwe kufwa.”
3Nayo Musa yakawa kuwalonjela wanhu yakatya, “Ale, mwiwikanizaje so wulugu, ho musume kuwahoma Wamidiyani, muwalipicize ku soko ye zinghani zono wamutendela Muwaha Mulungu. 4Holeka nghumulombenyi muwikanize wanhu walume, mu wulawa mu milango yenyu yose, wono wobita ku wulugu. Na mu mulango monga, walawe wanhu elufu monga.”
5Hobaho wakawa kuwahagula wanhu walume elufu monga monga mu wulawa mu milango yawo yose, wakawa kuwawikaniza ho wabite ku wulugu. 6Nayo Musa yakawa kuwasola, yakawa kuwategula ku wihomi, hasi yo wulanjilizi wa Finehasi u mwana wa Eleyezali u mukohani, mono yali yo mulanjilizi we viya vyose vyono vyelile, hamonga ne zindulele zono wetumamilaga so kuwasugula nha vyono zinha. 7Hodu, wakawa kuwahoma Wamidiyani, nha vyono Muwaha Mulungu yamulajiliza Musa, nawo wakawawulaga wanhu wose we cilume, 8hamonga ne watemi wahano we Wamidiyani, Evi, Lekemu, Zuli, Huli, hamonga na Leba. Wakamuwulaga nhavivilya na Balamu u mwana wa Beyoli.
9Wanhu Waisilayeli, wakawasola mateka i wacekulu wose we Cimidiyani, hamonga ne wana wawo wose. Wakazisola ne zing'ombe, hamonga ne matewa gawo gose, wakazisola ne zisawo zawo zose. 10Hanyuma wakawa kugapembela moto ne makaya gawo hamonga ne zinghambi zawo. 11Hodu wakawa kuvikunza vinhu vyose vyono wali waviteka, hamonga ne wafungwa, ne mitugo zose. 12Wakawa kuvileta vinhu vyose kuli Musa, na Eleyezali, na kuli mhuga yose ye Waisilayeli, lono wali wali mu nghambi zawo mu yisi yo wuhihi ya Mowabu, ku nhumbi ye likolongo lya Yoludani ku wulawa Yeliko.
Wasilikale wo wulugu wakuwuya
13Nayo Musa na Eleyezali hamonga ne walongola we mhuga yose ye wanhu, wakawa kubita kunze ye nghambi kuwahinjiliza wasilikale wo wulugu. 14Nayo Musa yakawa kuwakolelwa yikuwo muno muno i wawaha walongola we vipuga vipuga vye wasilikale, wono wawuya ku wulawa ku wulugu. 15Yakawawuza yakatya, “Alu nye, nhawule muwaleka i wacekulu womi? 16Ninga mukumbucile vyono wo wawa wacekulu wono wagatyatya mafundo ga Balamu, sunga wakawa kuwakwega wanhu wamubedegale Muwaha Mulungu. Na yiyi yikawa yo soko yono yikaleka lihuhuji likawaziza i wanhu wo Mulungu. 17Holeka luno, muwawulagaje i wacekulu wose hamonga ne wazelelo wose wono wakondya kuzimanya zinghani ze ligona. 18Ninga langa, mwisigazize nyo weneco i wahinza wose wono wakali namanya walume. 19Ninga kanyhi hamba nhavivyo, anye wose, mono kowa yawulaje munhu wo wose, hamba lunji kapamiza muvimba, yowa yimunojeye yekale kunze ye nghambi vilo mupunghati. Na mwizuwa lye kadatu, na mwizuwa lyo mupunghati, mwiyeze nyo weneco hamonga ne wacekulu wono muwatecile. 20Kanyhi mowa munojeye muyeze ne myenda yenyu yose, sunga ne myenda yono mihonwe ko wukunzeje we zinguwo ze zimhene, sunga ne vinhu vyose vyono vinozwe kwe mabici.”
21Nayo Eleyezali u mukohani, yakawalonjela wanhu walume wono walawa ku wulugu yakawatya, “Awu wo wulajilize wono Muwaha Mulungu yamulajiliza Musa. 22Cinhu co cose cono si cosuma kutakamila mu moto, nha vyono yinha zahabu, fweza, shaba, cuma, hambe 'bati, 23hamba lisasi, vivyo vinojeye vikozwe mu moto ho viwe vyezwa. Ninga i vinji vyose vinojeye vyezwe kwe malenga, holeka viwe vyezwa. 24Na mwi'zuwa lyo mupunghati, mokanza myenda yenyu, nanye mowa mwezwa, hanyuma nhondo ho mosuma kukombolwa mwinjile mu nghambi.”
Wugawane we mateka
25Muwaha Mulungu yakamulonjela Musa yakatya, 26“Agwe na Eleyezali u mukohani, hamonga ne walongola wose we mhuga, muviwale vinhu vyose vyono muvitecile ku wulugu, hamonga ne wafungwa, ne mitugo zose. 27Muvigawe mafungu mejete, lifungu limonga liwe lye wasilikale, ne lifungu liyagwe, liwe lye mhuga yose ye wanhu. 28Ninga mwifungu lyono lyowa lyo lye wasilikale, musole kodi ku so Muwaha Mulungu. Mweze kusola cinhu cimonga cimonga mu makumi mahano mahano, ku wulawa mu wafungwa, mitugo, ndogowe, ngholo, sunga ne zimhene. 29Ne vinhu vivyo vyose, mumupele Eleyezali u mukohani, viwe vilavywa kuli Muwaha Mulungu. 30Na mwi'fungu lyono muwapelile mhuga yose ye wanhu, namo mumo, musole cinhu cimonga cimonga mu makumi mahano mahano, ku wulawa mu wafungwa, mitugo, ndogowe, ngholo, sunga ne zimhene. Ne vinhu vivi vyose, muwapele Walawi wono wena mulimo wo kulilanjilila Lihema lyo Muwaha Mulungu.” 31Nayo Musa na Eleyezali u mukohani, waketuma nha vyono Muwaha Mulungu yalajiliza.
32Na alino lyo liwalo lye vinhu vyono wasilikale waviteka, hamonga ne vinhu vyono wasolaga weneco. Ngholo hamonga ne zimhene, magana mutandatu na makumi mupunghati na yihano elufu. 33Ng'ombe, makumi mupunghati na nyejete elufu. 34Ndogowe, makumi mutandatu na monga elufu. 35Ne wacekulu, wono wali wakali namanya walume, wali wali makumi madatu na nyejete elufu. 36Ne nusu yono wasola wasilikale, yali yificile mhene magana madatu na makumi madatu na mupunghati elufu, na ngholo magana mahano. 37Nazo ze magana mutandatu na makumi mupunghati na yihano, zo zasolwa zikawa zo kodi yo Muwaha Mulungu. 38Ng'ombe, makumi madatu na mutandatu elufu. Ze makumi mupunghati na nyejete zikawa yo kodi yo Muwaha Mulungu. 39Nazo zindogowe, zali zili makumi madatu, elufu, na magana mahano. Na muli zizo, zikasolwa makumi mutandatu na monga, zikawa yo kodi yo Muwaha Mulungu. 40Nawo wacekulu wono wali wakali namanya walume, wono wagawilwa i wasilikale, wali waficile wacekulu yikumi na mutandatu elufu. Na muli wawo, wakasolwa wacekulu makumi madatu na wejete, wakawa yo kodi yo Muwaha Mulungu. 41Nayo Musa, yakamupela Eleyezali u mukohani vinhu vivyo vyose vye kodi, i cilavywa cinulwa kuli Muwaha Mulungu, nha vyono Muwaha Mulungu yamulajiliza Musa.
42Ne ligawo lye mhuga ye wanhu wose, lyali viling'aniye u winji wayo, ne ligawo lyono wagawilwa wasilikale, 43nazo zali nhavi: Ngholo hamonga ne zimhene zali zili magana madatu na makumi madatu na mupunghati elufu, na magana mahano. 44Nazo ng'ombe, zali zili makumi madatu na mutandatu elufu. 45Ndogowe, nazo zali zili makumi madatu elufu na magana mahano. 46I wacekulu wono wali wakali namanya walume, nawo wali waficile yikumi na mutandatu elufu. 47Na mwi'fungu lili nalyo, Musa yakasola cinhu cimonga cimonga mu wulawa mu vinhu makumi mahano mahano, mu wulawa mu wanhu, na mu mitugo. Musa yakawa kuwapela Walawi wono wali wo wetuma mulimo wo wulanjilizi we Lihema lyo Muwaha Mulungu, nha vyono Muwaha Mulungu yali yamulajilize Musa.
48Hanyuma nawo wono wali walongola we vipuga vipuga vye wasilikale, wakamubitila Musa 49wakamulonjela wakutya, “Gwe muwaha, ase cakondya kunoza liwalo lye wasilikale wose wono wali wali hasi yo wulanjilizi wetu, nase ciwona vyono, hasina hamba monga mono yajiliye. 50Holeka nase luno, cikukuletela i vinhu vyono nase cavisola yumonga yumonga muli sese. Navyo vyovino: Wihambo wa zahabu, wudodi, bangili, nyamwidole ze vitanjilo, viheleni, hamonga ne mikufu. Nase cikumulavizya Muwaha Mulungu, cinoze wilamule nayo so wumi wetu. Ho yajendelele kucidima mu mikalile yetu.” 51Musa hamonga na Eleyezali u mukohani, wakawa kuyibocela zahabu, hamonga ne vinhu vyose vyo wihambo. 52Ne vilavywa vyose hamonga vyono wawo wawaha walongola wavileta, vyali vina wuzito wa behi ya kilo magana mejete. 53Ninga awalya wono wali wo si wawaha walongola, awo wakekala navyo du i vinhu vyono wali waviteka. 54Hodu nayo Musa na Eleyezali u mukohani, wakawa kuyisola zahabu yose wakawa kuyitegula mwi Hema. Muwaha Mulungu ho yawadime i Waisilayeli.
Currently Selected:
Wuwale 31: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
