Wuwale 30
30
Wulajilize wa kuli zo wilahize
1Nayo Musa, yakawaloloseza walongola we milango ye Waisilayeli, wityatye wono wanojeye wawutyatye, kuli zo wilahize, yakawatya, 2“Hono munhu yelahize vyono komulavizya Muwaha Mulungu cinhu cinji, hamba hono yelahize wilahize wo kwiyimila cinhu cinji, yanojeye yelanjilile yalece kubena wihuwize wakwe. Langa yowa yimunojeye yawufisilize du, nha vyono yali yakondya kwihuwiza, vyono kokwituma nghani yiyo.
3“Na hono mwana we cicekulu, mono yakali yali mukaya mo sogwe, hono yelahize vyono komulavizya cinji Muwaha Mulungu, hamba yehuwize kwiyimila cinhu cinji. 4Ale yowa yimunojeye yetume nha vyono yelahize, hamba vyono yehuwize, langa hono sogwe yalete cimizi kolo yazihulika zizo. 5Na hono sogwe kolo yakuhulika, yamwimile ho yalece kuwufisiliza wilahize wakwe, ale hodu yalece. Muwaha Mulungu komunenela, hambi sogwe nha yo yamwimiye yalece kuwibata wilahize wakwe. 6Na hono mucekulu mutolwe yelahize mweneco du, hamba hono yelahize wula kumanya, hamba hono yehuwize kwiyimila cinhu cinji.
7“Ale u mucekulu yuyo, yowa yimunojeye yazifisilize zose zono yelahize, hamba zono yehuwize, langa mulume wakwe hono yalete cimizi kolo yazihulika. 8Na mulume wakwe hono yamwimile ho yalece kufisiliza wilahize wakwe kolo yazihulika, ale hodu yalece. Nayo Muwaha Mulungu komunenela. 9Nayo mucekulu mufwile, hamba mono yalecigwe, ayo yimunojeye yafisilize du wilahize wakwe wose, wono kokwilahiza, sunga no wihuwize wo kwiyimila cinhu cinji.
10“Na hono mucekulu mutolwa yelahize, hamba yehuwize kwiyimila cinhu cinji 11nayo yowa yimunojeye yafisilize du wilahize wakwe, hamba wihuwize wakwe, langa hono mulume wakwe yalete cimizi kolo yazihulika. 12Na hono mulume wakwe kolo yazihulika zizo, ho yamulemeze, hodu yazilekaje. Nayo Muwaha Mulungu komunenela, hambi nha mulume wakwe mono yamwimiye, ho yalece kuwufisiliza wihuwize wakwe. 13Hambi u mulume wakwe, nha yena ling'ani yo kuwukangaza hamba kuwubena wilahize wo wose, hamba wihuwize wo wose wono yawunozize. 14Ninga hono mulume wakwe yanyamale twii mwi'zuwa lilyo lyono yazihuliciye zo wilahize wo mugolece wakwe, nayo hamba si yalonjile cinji, hodu mucekulu kosuma kuzifisiliza zose zono yali yelahize, hamba zono yali yehuwize. Hambi mulume wakwe nha si yalavizye cimizi co cose, mwi'zuwa lyono yazihuliciye zizo. 15Ninga hanyuma hono mulume kanyhi yabene mweneco wilahize wo mugolece wakwe, ale mulume yuyo kowudinghula mweneco wubi wo mugolece wakwe, hambi nha kalemwa kuwufisiliza wilahize. 16Nawo wuwu, wo wulajilize wono Muwaha Mulungu yamulajiliza Musa, na kuli zo wilahize, wono wukunozwa no mucekulu mono si mutolwe mono yali mu nyumba yo sogwe, hamba kuli mucekulu mutolwa.”
Currently Selected:
Wuwale 30: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
