Wuwale 29
29
I vilavywa vye sikukuu yo mwaka mupya
(Lawi 23:23-25)
1Na mwi'zuwa lilongozi lya mu mwezi wo mupunghati, mweze kwihanguliza wose so wuhembi. Ninga mulece kwituma mulimo wunji mwi'zuwa lilyo. Na mwizuwa lilyo munojeye mutowe ndulele. 2Kanyhi mulavye ne cilavywa cinyanywe kuli Muwaha Mulungu, ne mhunjile yayo, yikumwendeza Muwaha Mulungu. Mulavye nzeku monga, nduwilu monga, hamonga na nyana za ngholo, nume, mupunghati za mwaka monga, nhelevu zono zisina cilema co cose. 3Kanyhi mulavye cilavywa cono cikwilaniciye, cilavywa co wusaje wono muhanzahanze ne mafuta. Weze wusaje wa kilo yidatu so nzeku yiyo monga, na kilo nyejete so nduwilu, 4na kilo monga monga so nyana ze zingholo, vyono nyejete. 5Kanyhi mulavye mvulati monga yiwe so cilavywa co wubi. Na mu nzila yiyino, mo komunozezenyi wilamule. 6Mweze kulavya vilavywa vivi hamonga na cilavywa cinyanywe ce nhondo zose, mwi'zuwa lilongozi lyo mwezi, hamonga ne cilavywa cayo co wusaje, hamonga ne cilavywa ce divayi. Ne vilavywa vivino vye ndigwa, vikumwendeza Muwaha Mulungu so mhunjile yayo.
I vilavywa vya mwi'zuwa lyo Wilamule
(Lawi 23:26-32)
7Kanyhi, mweze kwihanguliza hamonga, mwizuwa lye likumi lyo mwezi wo mupunghati, so wuhembi. Na mwizuwa lilyo, mulece kulya cinji hamba kwituma mulimo wunji. 8Mumulavizye Muwaha Mulungu cilavywa cinyanywe, hambi mhunjile yayo nha yikumwendeza Muwaha Mulungu. Mweze kumulavizya nzeku monga, nduwilu monga, hamonga ne nyana nume mupunghati za ngholo za mwaka monga, nhelevu zono zisina cilema co cose. 9Mumulavizye cilavywa cono cikwilaniciye ce cilavywa co wusaje wono muhanzahanze ne mafuta, wuwe kilo yidatu so nzeku, na kilo nyejete so nduwilu, 10na kilo monga monga so zingholo zose monga monga. 11Kanyhi mulavye mvulati monga yiwe so cilavywa co wubi, hamonga ne cilavywa co wubi co wilamule, ne cilavywa cinyanywe ce nhondo zose, hamonga ne cilavywa cayo co wusaje ne cilavywa ce divayi.
I vilavywa vye sikukuu ye vibanda
(Lawi 23:33-44)
12Mweze kwihanguliza hamopnga so wuhembi, mwi'zuwa lye likumi ne'hano lyo mwezi wo mupunghati. Munoze sikukuu yiyi, vilo mupunghati, mu cogopo co Muwaha Mulungu. Na mwi'zuwa lilyo, mulecele lukulu kwituma mulimo wunji. 13Na mwi'zuwa lili lilongozi, munojeye mumulavizye Muwaha Mulungu cilavywa ce ndigwa. Hambi mhunjile yayo nha yikumwendeza muno Muwaha Mulungu, mumulavizye nzeku yikumi ne 'datu, nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose. 14Mumulavizye cilavywa cono cikwilaniciye co wusaje wono muhanzahanze ne mafuta, wuwe wusaje wa kilo yidatu yidatu so nzeku zose, kilo nyejete nyejete so nduwilu zose, 15na kilo monga monga so ngholo zose, hamonga ne visakwa vye vilavywa vye divayi. 16Kanyhi mulavye mvulati monga, yiwe so cilavywa co wubi. Muvilavye vivino, hamonga ne cilavywa cinyanywe ce nhondo zose, ne cilavywa cayo co wusaje ne divayi.
17Na mwi'zuwa lye kejete, mulavye nzeku yikumi na nyejete, na nduwilu nyejete, hamonga na nyana za ngholo nume yikumi na yine za mwaka monga, zose nhelevu, zisina cilema co cose. 18Mulavye vilavywa vivyo, cilavywa co wusaje ne divayi, so nzeku, na so zinduwilu ne zinyana ze zingholo, hamonga ne vilavywa vyose vyono vikusakwa nha mwi'zuwa lilongozi. 19Na mvulati monga ciwe cilavywa co wubi, kuhanga ne cilavywa cinyanywe ce nhondo zose, ne cilavywa co wusaje ne divayi.
20Na mwi'zuwa lye kadatu, mulavye nzeku yikumi na monga na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose. 21Mulavye vilavywa vivyo hamonga ne divayi so zinzeku, na zo zinduwilu na so zinyana ze zingholo, nha vyono linha liwalo lyazo. 22Na mvulati monga ciwe cilavywa co wubi, hamonga ne vilavywa vyose vyono vikusakwa, nha mwi'zuwa lilyo lilongozi.
23Na mwi'zuwa lye kane, mulavye nzeku yikumi limonga, na nduwilu nyejete, hamonga na nyana za ngholo nume, yikumi na yine za mwaka monga zose nhelevu, zisina cilema co cose. 24Mulavye vilavywa viyo, 25hamonga ne vilavywa vinji vyono vikusakwa mwi'zuwa lilyo.
26Na mwizuwa lye 'hano, mulavye nzeku yicenda, na nduwilu nyejete, hamonga na nyana za ngholo nume, yikumi na yine, za mwaka monga, zose nhelevu, zisina cilema co cose. 27Mulavye vilavywa vivyo, 28hamonga ne vilavywa vinji vyono vikusakwa mwizuwa lilyo.
29Na mwizuwa lyo mutandatu, mulavye nzeku munana, na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema cocose. 30Mulavye vilavywa vivyo, 31hamonga ne vilavywa vyono vikusakwa mwizuwa lilyo.
32Na mwizuwa lyo mupunghati, mulavye nzeku mupunghati, na nduwilu nyejete, hamonga na nyana za ngholo nume, yikumi na yine za mwaka monga, zose nhelevu, zisina cilema co cose. 33Mulavye vilavywa vivyo, 34hamonga ne vilavywa vyono vikusakwa mwizuwa lilyo.
35Na mwi'zuwa lyo munana, mwikongholele wose hamonga so wuhembi. Na mwi'zuwa lilyo mulecele lukulu kwituma mulimo wunji. 36Mulavye cilavywa cinyanywe kuli Muwaha Mulungu, yiwe nha cilavywa ce ndigwa kuli Muwaha Mulungu, ne mhunjile yayo yikumwendeza muno. Mumulavizye nzeku monga, na nduwilu monga, hamonga na nyana za ngholo nume, zili mupunghati, nhelevu zisina cilema co cose. 37Mulavye vilavywa vivyo, 38hamonga ne vilavywa vinji vyono vikusakwa mwi'zuwa lilyo.
39Na wuwu wo wityatye wa kuli vilavywa vinyanywe, ne vilavywa vyo wusaje, ne vilavywa vye divayi, hamonga ne vilavywa vyo mulamu, vyono mowa kumunozeza Muwaha Mulungu, mu zisikukuu ze mazuwa gayo mahagulwe. No wityatye wuwu, wowa sunga na kuli vilavywa vyenyu vyono mukulavya, so wufisilize wo wilahize wenyu, hamba mu vilavywa vye lihewa.
40Nayo Musa, yakawa kuwaloloseza wanhu Waisilayeli zose zono Muwaha Mulungu yamulajiliza.
Currently Selected:
Wuwale 29: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
