Wuwale 28
28
I vilavywa vye nhondo zose
(Wut 29:38-46)
1Muwaha Mulungu yakamulajiliza Musa. 2Yawalajilize Waisilayeli vyono, yiwanojeye wamulavizye Mulungu vilavywa vye ndigwa, vyono vikumwendeza, wavilavye mu vilo vyono vitemezwe kulavywa.
3Navyo avino vyo vilavywa vye ndigwa, vyono vinojeye wamulavizye Muwaha Mulungu so cilavywa cinyanywe. Weze kulavya nyana za ngholo nume nyejete za mwaka monga, nhelevu, zono zisina cilema co cose. 4Weze kulavya nyana monga ya ngholo hakali mitondo, ne nzagwe nayo cinyamihe. 5Weze kuzilavya hamonga ne cilavywa co wusaje. Wusaje wa kilo monga, wono muhanzahanze ne mafuta malengu lita monga. 6Naco cici, cowa co cilavywa ce nhondo zose, cono cowa cinyanywe, cilavywa cono calavywa halulongozi nha cilavywa ce ndigwa he 'tunda lya Sinayi. Ne mhunjile yayo yikumwendeza Muwaha Mulungu. 7Alu nha vyono yinha, yinojeye divayi, yilavywe hamonga ne ngholo nongozi, holeka wujidile divayi mu cikumbicilo lita monga. 8Na mwi'pango lye cinyamihe, wuyilavye ngholo ye kejete, wuyilavizye mu nzila yiyo du nha vyono wuyilavizye ngholo ya hakali mitondo, hamonga ne cilavywa cayo ce divayi. Naco co cilavywa ce ndigwa, ne mhunjile yayo yikumwendeza Muwaha Mulungu.
I vilavywa vya mwi'zuwa lye Sabato
9Na mwizuwa lye Sabato, wulavye nyana za ngholo nume nyejete, nhelevu, zono zisina cilema co cose, hamonga no wusaje kilo nyejete muhanzahanze ne mafuta, wuwe cilavywa co wusaje. 10Ne cilavywa cicino cinyanywe, ceze kulavywa mu Sabato zose, hamonga ne divayi, nha vyono yinha du mu cilavywa ce nhondo zose.
I cilavywa ca mwi'zuwa lilongozi lyo Mwezi
11Weze kumulavizya Muwaha Mulungu cilavywa cinyanywe mwi'zuwa lilongozi lya mu myezi yose. Weze kulavya nzeku nyejete, hamonga ne nduwilu monga, hamonga na nyana za ngholo nume za mwaka monga, zili mupunghati, nazo zose zeze nhelevu, zono zisina cilema co cose. 12Na vyono co cilavywa co wusaje, holeka wulavye wusaje wono muhanzahanze ne mafuta. Wulavye kilo yidatu zo wusaje, hamonga na nzeku monga monga, nzeku na kilo yidatu za wusaje. Nazo zinduwilu, ziweze nduwilu monga na kilo nyejete zo wusaje. 13Ninga kuli zi nyana ze zingholo, azo wuzilavye hamonga na kilo monga monga du ya wusaje. Navyo vilavywa vivino vinyanywe, vyo vilavywa vye ndigwa. Ne mhunjile yayo yikumwendeza Muwaha Mulungu. 14Ne cilavywa cono cikwilaniciye ce divayi, ciweze lita nyejete za divayi, hamonga na nzeku monga monga, nha cinji nzeku na lita zayo nyejete. Ninga kuli nduwilu, wulavye mafuta lita monga na nusu du. Na lita monga monga du, kuli ziyana ze zingholo. Ngholo na lita yayo. Na wuwu wo wulajilize kuli ze cilavywa cinyanywe, ca mwi'zuwa lilongozi lya mu myezi yose, mu mwaka wose mututu. 15Kanyhi weze kulavya mvulati so cilavywa co wubi hamonga ne cilavywa cinyanywe ce nhondo zose, hamonga ne cilavywa cayo ce divayi.
I vilavywa vya mu sikukuu yo mukate wono wusina cisase
(Lawi 23:5-14)
16Nayo sikukuu ye Pasaka yo kumupela lilumbo Muwaha Mulungu, yinojeye yinozwe mwi'zuwa lye likumi na yine lya mu mwezi mulongozi. 17Na mwi'zuwa lye likumi na yihano, sikukuu ye ci dini yikwanza, nayo yijendelele sunga vilo mupunghati. Na mu vilo vivyo, yeze kuligwa mikate yono yisina cisase du, yono yiwikanizwe so mulimo wuwo. 18Na mwi'zuwa lilyo lilongozi lye sikukuu, anye munojeye mwihangulizize hamonga so wuhembi. Na mwi'zuwa lilyo mulecele lukulu kwituma mulimo wunji wowose. 19Kanyhi mumulavizyaje Muwaha mulungu cilavywa cinyanywe ciwe co cilavywa ce ndigwa kuli mwene. Mumulavizye nzeku nyejete, na nduwilu monga, hamonga na nyana ze zingholo nume za mwaka monga, zili mupunghati, nazo zose zeze nhelevu zono zisina cilema co cose. 20Kanyhi mulavye cilavywa cono cikwilaniciye co wusaje, ciwe co wusaje muhanzahanze ne mafuta, wuwe kilo yidatu yidatu mu nzeku monga monga, 21kilo monga monga, so zinyana ze zingholo monga monga. 22Kanyhi mulavye mvulati monga yiwe so cilavywa co wubi. Na mu nzila yiyi mo komunozezenyi wilamule. 23Nazo zizi muzilavye hamonga ne cilavywa cinyanywe ce nhondo zose hakali mitondo. 24Na mu nzila yiyi du, yo mweze kumulavizya Muwaha Mulungu cilavywa ce ndigwa, mu vilo mupunghati. Ne mhunjile yayo yikumwendeza Muwaha Mulungu. Nanye mweze kulavya nhavivi, hamonga ne cilavywa cinyanywe ce nhondo zose, hamonga ne cilavywa ce divayi. 25Mweze kwihanguliza hamonga mwizuwa lyo mupunghati so wuhembi, kanyhi mulecele lukulu kwituma mulimo wunji mwi'zuwa lilyo.
I vilavywa vye sikukuu ye nhwanga
(Lawi 23:15-22)
26Na mwi'zuwa lilongozi lya mu sikukuu ye nhwanga, lono mukumuletela Muwaha Mulungu cilavywa co wuhemba wupya, munojeye mwihangulize wose hamonga so wuhembi, ninga mulece kwituma mulimo wunji mwizuwa lilyo. 27Mulavye cilavywa cinyanywe, cilavywa ca nzeku nyejete, na nduwilu monga, hamonga na nyana za ngholo, nume, mupunghati za mwaka monga nhelevu, zono zisina cilema co cose. 28Kanyhi mulavye cilavywa cono cikwilaniciye co wusaje, wusaje wono muhanzahanze ne mafuta. Weze wusaje wa kilo yidatu yidatu mu nzeku zose monga monga, na kilo nyejete so nduwilu, 29na kilo monga monga so nyana ze zingholo monga monga. 30Kanyhi mulavye mvulati monga yiwe so cilavywa co wubi. Na mu nzila yiyi, mo komunozezenyi wilamule. 31Nanye muzilavye zizi hamonga ne cilavywa ce divayi, hamonga ne cilavywa cinyanywe ce nhondo zose, hamonga ne cilavywa co wusaje.
Currently Selected:
Wuwale 28: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
