Wuwale 27
27
Iwana we cicekulu wa Zelofehadi
1Mahila na Nowa, na Hogila, na Milika hamonga na Tiliza, wali wo wana we cicekulu wa Zelofehadi, u mwana wa Hefeli, u mwana wa Gileyadi, u mwana wa Macili, u mwana wa Manase, u mwana wa Yusufu. 2Wawo wakamubitila Musa na Eleyezali mukohani, ne walongola wose, ne mhuga yose ye Waisilayeli, ha mulango we Lihema lyono Lyelile, wakawa kutya,
3“Alu ase, u sogo yetu yafwila mu nyika, yakafwa yasina hamba wana we cilume yaye. Nayo hamba si yali mutyatyi wa Kola. Kola mono yamubeza Muwaha Mulungu. Nayo yakafwa so wubi wakwe mweneco. 4Alu vyono mwene yali yasina wana we cilume, alu ase ma, hamba ciwe cili wana we cicekulu, nhawule litagwa lyo sogo yetu lyajililile lukulu mu Isilayeli? Holeka cikulomba wucigawile nase sawo mu wulawa muli zi sawo ze wanduguze zo sogo yetu.”
5Nayo Musa yakawa kuyiwika nghani yiyi kuli Muwaha Mulungu. 6Nayo Muwaha Mulungu yakamupitula yakatya, 7“Zizo zono wawo wana we cicekulu wa Zelofehadi wakuziwuza, na mbeka. Holeka heya wuwapelaje nawo sawo yono yikulawa muli wanduguze zo sogo yawo. Wuhazi wo sogo yawo wuwe wawo. 8Holeka wuwalonjele Waisilayeli wose, vyono, u munhu wo wose hono yafwe si yalecile mwana we cilume i wanagwe we cicekulu wo wowa wahazi we sawo yakwe yose. 9Na hono munhu yuyo yafwe si yalecile hamba mwana we cicekulu, hodu yinojeye muwahawe hamba mwanakwawe yo yawe muhazi we sawo yiyo. 10Na hono yawe yasina hamba muwahawe hamba mwanakwawe, ale u muwahawe hamba u mwanakwawe wo sogwe yo kowa muhazi we sawo yiyo. 11Na hono yawe yasina muwahawe hamba mwanakwawe wo sogwe, hamba mwihwawe, ale nduguye mono vili behi nayo, yo kowa muhazi we sawo yiyo, nayo yowa yawa sawo yakwe du. Nawo Waisilayeli, yiwanojeye wazikamise zizi, ziwe wo wityatye we ling'ani, wono wunojeye wawutyatye muli vinhu vivyo vye ling'ani, nha vyono ane no Muwaha Mulungu nghukulajiliza.”
Yoshuwa yakuhagulwa yahalile hanhu ha Musa
(Kum 31:1-8)
12Muwaha Mulungu yakamulonjela Musa yakatya, “Alu wubite kucanyha ye matunda ga Abalimu, na ku wulawa kuko, wuyilanje yisi yose yono nghuwapela Waisilayeli. 13Nagwe kolo wakondya kuyilanga no kuyiwona vyono yinha, hodu wuwe kufwila baho, nha vyono muwahawo Haluni yafwa, 14Hambi agwe go mweneco, hamonga no muwahawo Haluni, nha mwalibedegala lilajilizo lyangu akulya ku nyika ya Zini. Lono mhuga yose ye Waisilayeli wang'ung'ulicilaga bahalya ha muvwilo wa Meliba. Nagwe baho walema kulajila ze vilungo vyangu vyono vyelile hali wene.” (Nayo Meliba co cikolongo ce malenga cono cili ku Kadeshi mu nyika ya Zini.)
15Nayo Musa hobaho yakawa kufugama, yakawa kulomba yakutya, 16“Gwe go Muwaha Mulungu, go ndawililo yo wumi we wanhu wose, nghukunena, wuhagule gwegwe, u munhu mono kosuma kuwatonga Waisilayeli, 17kanyhi mono kosuma kuwa mulongola wawo mu wulugu. I litewa lyako ho lilece kuwa nha ngholo zono zisina mudimi.”
18Nayo Muwaha Mulungu yakamupitula Musa yakatya, “Ale musolaje Yoshuwa u mwana wa Nuni, u munhu mono yena muhe, u muwicile miwoko yako mu mutwe wakwe. 19Wumunoze yawe muwaha hali Eleyezali mukohani, hamonga ne mhuga yose ye Waisilayeli. Nagwe wumuwice ha mwande yawo wose, wuwalonjele vyono, yuyu Yoshuwa yo yakuwuhalila u mulimo wako. 20Wumulecele wulajilize wako wunji. I wanhu wa Isilayeli ho wamuhulice. 21Nayo kowa yali hamonga na Eleyezali u mukohani, mono kosuma kuwumanya wuhile wangu mu nzila yo witumamila Ulimu na Tumimu. Na mu nzila yiyo, Eleyezali kosuma kumutonga Yoshuwa, hamonga ne mhuga yose ye Waisilayeli, muli zinghani zawo zose.”
22Nayo Musa yakazinoza zose nha vyono Muwaha Mulungu yamulajiliza. Yakamunoza Yoshuwa yeme hali Eleyezali mukohani, sunga na hali mhuga yose ye Waisilayeli. 23Musa yakawa kuyiwicila miwoko yakwe mu mutwe wa Yoshuwa nha vyono Muwaha Mulungu yamulajiliza. Yakawa kumuwika ha mwande, yakawa kuwalonjela wanhu, vyono Yoshuwa yo yakondya kuwuhalila u mulimo wakwe.
Currently Selected:
Wuwale 27: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
