Wuwale 26
26
Wuwale we wanhu lwe kejete
1Litamwa lye lihuhuji lyono lyawamala wanhu, lyali lyeza kuwa lyapuluta, Muwaha Mulungu yakawalonjela Musa na Eleyezali u mwana wa Haluni, yakawatya, 2“Alu, mwandice liwalo lye zimhuga zose ze milango ye Waisilayeli, liwalo lye walume wose, wono waficile myaka makumi mejete hamba wono wacizize, wono wowa wakwiliye ku wituma mulimo wo wusilikale wo wulugu.” 3Nayo Musa na Eleyezali mukohani, wakawa na cihuliko kuli Muwaha mulungu, wakawa kuwakongholela hamonga i walume wose we lizika lilyo. Wekongholelela mu yisi yo wuhihi ya Mowabu, lono wukulowoka likolongo lya Yoludani ku wulawa Yeliko. 4Wakawa kuwawala wanhu wono waficile myaka makumi mejete, na wono wacizize, nha vyono Muwaha Mulungu yamulajiliza Musa.
Ne liwalo lye wanhu Waisilayeli wono wakawa baho, wono walawa ku Misili nha lyoli.
5Wo mulango wa Lubeni u mwana wa Yakobo we mhuga ya Hanoki na ya Palu, 6na ya Hezeloni, hamonga na ya Kalimi. 7Ne liwalo lya wose hamonga wo mulango wa Lubeni, wali waficile walume wose wanhu makumi mane ne 'datu elufu, na magana mupunghati na makumi madatu. 8Nawo i wana wa Palu, wowa: Eliyabi, 9hamonga ne wanagwe Nemuyeli, na Datani, na Abilamu. (Wawano Datani hamonga na Abilamu wo wali wo wahagulwe ne mhuga yawo. Nawo wawa wo wesumaniza na Musa na Haluni, wakelunza ne watyatyi wa Kola, lono wamubezeza Muwaha Mulungu. 10Nayo yisi yikahama, yikawamela wose, wakafwa, Kola, hamonga ne watyatyi wakwe wose. Na lono mhuga yiyo yali yakondya kufwa, moto nawo wukawatakamiza wanhu walume waficile magana mejete na makumi mahano, wakawa suguzi kuli wanhu. 11Ninga langa i wana we cilume wa Kola, awo si wawulagwa.)
12Wo mulango wa Simiyoni nawo wowa; We mhuga ya Nemuyeli, na ya Yamini, na ya Yacini, 13na ya Zela, hamonga na ya Shawuli. 14Ne liwalo lya wose hamonga wo mulango wa Simiyoni, wali waficile wanhu walume, makumi mejete na nyejete elufu, na magana mejete.
15Wo mulango wa Gadi nawo wowa: We mhuga ya Zefoni, na ya Hagi, na ya Shuni, 16na ya Ozini, na ya Eli, 17na ya Alodi, hamonga na ya Aleli. 18Ne liwalo lyawo wose, hamonga, wo mulango wa Gadi, wali waficile wanhu walume makumi mane elufu, na magana mahano.
19Wo mulango wa Yuda, nawo wowa: 20We mhuga ya Shela, na ya Pelezi, na ya Zela, 21na ya Hezeloni, na ya Hamuli, (hamonga ne wana wejete we cilume Eli na Onani, wono wali wakondya kufwila ku yisi ya Kanani.) 22Ne liwalo lyawo wose hamonga wo mulango wa Yuda, wali waficile wanhu walume makumi mupunghati na mutandatu elufu, na magana mahano.
23Wo mulango wa Isakali nawo wowa: we mhuga ya Tola, na ya Puwa, 24na ya Yashubu, hamonga na ya Shimuloni. 25Ne liwalo lyawo wose hamonga, wo mulango wa Isakali, wali waficile wanhu walume makumi mutandatu na yine elufu na magana madatu.
26Wo mulango wa Zabuloni nawo wowa: We mhuga ya Seledi, na ya Eloni, hamonga na ya Yehaleleli: 27Ne liwalo lyawo wose hamonga wo mulango wa Zabuloni, wali waficile wanhu walume makumi mutandatu elufu, na magana mahano.
28Wo mulango wa Yusufu, Yusufu mono yali yo sogo ye wana we cilume wejete, Manase na Efulayimu.
29Wo mulango wa Manase nawo wowa: Macili u mwana wa Manase, yali yo mulezi wa Gileyadi, hamonga ne wana wanji wono nawo wakawa wa mu mhuga ya Gileyadi ku lubavu lwe wakuku zawo, nawo wowa: 30We mhuga ya Lezeli, na ya Heleki, 31na ya Asiliyeli, na ya Shekemu, 32na ya Shemida, na ya Hefa. 33Nayo Zelofehadi u mwana wa Hefa, yakawa yasina wana we cilume, langa yakawa na wana we cicekulu du, nawo matagwa gawo wowa: Mahila, na Nowa, na Hogila, Milika, na Tiliza. 34Ne liwalo lyawo wose hamonga, wo mulango wa Manase, wali waficile wanhu walume makumi mahano na nyejete elufu, na magana mupunghati.
35Wo mulango wa Efulayimu nawo wowa: We mhuga ya Shutela na ya Bekeli, na ya Tahani. 36Wanhu we mhuga ya Elani, wono walawa mu lulelo lwe wana wa Shutela. 37Ne liwalo lyawo wose hamonga, wo mulango wa Efulayimu, wali waficile wanhu walume makumi madatu na nyejete elufu, na magana mahano.
Nayo yiyo yo milango yono yilawiliye muli wana wa Yusufu.
38Wo mulango wa Benyamini nawo wowa: We mhuga ya Bela, na ya Ashibeli, na ya Ahilamu, 39na ya Shefufamu, na ya Hufamu. 40We mhuga ya Alidi na Naamani, walawilila mu lulelo lwa Bela. 41Ne liwalo lyawo wose hamonga wo mulango wa Benyamini, wakawa waficile walume makumi mane ne'hano elufu, na magana mutandatu.
42Wo mulango wa Dani, nawo wowa: We mhuga ya Shushamu, 43wono wali waficile liwalo lyawo, wanhu walume makumi mutandatu na yine elufu, na magana mane.
44Wo mulango wa Asheli, nawo wowa: We mhuga ya Imuna, na ya Ishivi, na ya Beliya. 45We mhuga ya Habeli, na ya Maliciyeli, wono walawilila mu lulelo lwa Beliya. 46Asheli yali yena mwana we cicekulu litagwa lyakwe Sela. 47Ne liwalo lyawo wose hamonga wo mulango wa Asheli, wakawa waficile walume makumi mahano na yidatu elufu, na magana mane.
48Wo mulango wa Nafutali, nawo wowa: We mhuga ya Yahizeyeli, na ya Guni, 49na ya Yezeli, na ya Shilemu. 50Ne liwalo lyawo wose hamonga wakawa waficile wanhu walume makumi mane na yihano elufu, na magana mane.
51Ne liwalo lye Waisilayeli hamonga, wakawa waficile wanhu walume magana mutandatu na monga elufu, na magana mupunghati na makumi madatu.
52Muwaha Mulungu yakamulonjela Musa yakatya, 53“Alu, wuyigawaje yisi, wuwagawile we milango yiyino yose yiwe mulango na yisi yawo, mu nghango yo winji we liwalo lyawo vyono wenha, wanhu na mulango wawo. 54Ninga yisi wuyigawaje mu nzila yo kutowa kula, 55wuwapele nha vyono winha u winji we wanhu wa mu milango yawo, 56wo mulango wono wina wanhu wenji, watuje yisi mbaha, nawo wo mulango wono wina wanhu wacefu watuje yisi ndodo.”
57Wo mulango wa Lawi, walawilila mu mhuga ya Gelishoni, na ya Kohati, na ya Melali. 58Ne zindelo zawo, zilawiliye mu zimhuga ndodo ndodo za Libina, na Hebuloni, na Mahili, na Mushi, na Kola. Nayo Kohati yali yo sogo wa Amulamu, 59mono hanyuma yakamutola Yekobedi u mwana we cicekulu wa Lawi, u mulelelwa ku Misili. Nayo Yekobedi yakamulelela Amulamu wana wejete we cilume, yo Haluni na Musa hamonga no lumbu lyawo Milyamu. 60Nayo Haluni yakawa na wana we cilume wane, yo Nadabu, na Abihu, na Eleyezali, na Itamali. 61Nadabu na Abihu, wawo wo wafwa lwa kamonga, mwi'zuwa lililya lono walavizya kuli Muwaha Mulungu, u moto wono si wali welile mu cikumbicilo. 62Ne liwalo lye wana we cilume we Walawi, i wana wono wali waficile mwezi monga, hamonga na wono wali wacizize, wose hamonga wali waficile elufu makumi mejete na yidatu cititila. Wene wakawalwa, ninga si wawalilizwa hamonga ne Waisilayeli wose, vyono wene wali wasina ling'ani yo kupegwa wuhazi wa cinhu cocose mu Isilayeli.
63Ne milango yiyo yose. Musa na Eleyezali wo wayiwala no kuyandika liwalo lyayo, lono wetumamila mulimo wo kwandika liwalo lye Waisilayeli wose, lono wali wali mu yisi yo wuhihi ya Mowabu, ku nhumbi ye likolongo lya Yoludani ku wulawa Yeliko. 64Hamba hali hasina munhu monga mono si yawalwa, muli wanhu wose wono Musa na Haluni wawawala ha wuwale wulongozi lono wali wali mu nyika ya Sinayi. 65Ninga Mulungu yali yakondya kulonga nha vyono, wose muli wene, wofwila mu nyika. Hasina hamba munhu monga mono kosigala, langa kosigala Kalebi du u mwana wa Yefune, hamonga na Yoshuwa u mwana wa Nuni.
Currently Selected:
Wuwale 26: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
