Wuwale 25

I Waisilayeli ha Peyoli

1Nawo Waisilayeli lono wali wali mu nghambi mwi'lolo lya Shitimu, i wanhu we cilume, wakawa wakusenyha ne wahinza we Cimowabu wono wali wali mumo. 2Hambi nha wawacemelaga mu zindigwa ze makumbiko ge milungu yawo ye Wamowabi yono wayihembaga. Nawo Waisilayeli, wakalya zindigwa zizo, kanyhi wakamuhemba no mulungu wawo Baali-peyoli. 3Na ku soko yiyo, Muwaha Mulungu yakawakolelwa Waisilayeli likuwo muno muno, 4yakawa kumulonjela Musa yakatya, “Ale wasolaje walongola we Waisilayeli, na ku so cihuliko cako, wuwawulajile wose he'zuwa, nane ho ndece kuwakolelwa likuwo Waisilayeli.” 5Nayo Musa yakawa kuwalonjela i wawaha yakawatya, “Wose muli nyenye, muwawulagaje wanhu wose, munhu na wo mulango wakwe wose, i wanhu wono wakumuhemba Baali-peyoli.”

6Nawo lono wali wehangulize mhuga yose, wakulila ha mulango we Lihema lyono Lyelile, walanje nhavi, yumonga wa muli Waisilayeli, yakamusola mucekulu we Cimidiyani, yakawa kumwinjiza mwi'hema lyakwe ciwonelela, ha meso ga Musa na hali wanhu wose. 7Nayo Finehasi u mwana wa Eleyezali, kanyhi yo mwizukulu we cilume wa Haluni u mukohani, yali yeza kuziwona zizo, yakawa kwinuka, yakawa kuwuka ha wihangulize. Yakasola mugoha, 8yakawa kumulonda yu yulya munhu, hamonga no mucekulu yuyulya, mumulya mwi'hema, yakawa kuwahoma no mugoha yakawabanhiza wose vyono wejete lwa kamonga, yakawawulaga. Na mu nzila yiyo, li lilya litamwa lye lihuhuji, lyono lyawamalaga Waisilayeli, hodu nalyo likawa kuwuka. 9Ninga hamba nhavivyo, lyali lyakondya kuwawulaga wanhu makumi mejete na yine elufu.

10Muwaha Mulungu yakawa kumulonjela kanyhi Musa yakatya, 11“Alu ku soko ya zizo zono, yetumile Finehasi, nane hodu si nojendelela kanyhi kuwakolelwa likuwo wanhu wa Isilayeli yaye. Hambi Finehasi nha si yawene viswanu kuwukangalila wuhembi we liwala lyo lyose lyo wuhemba milungu yinji, langa wahembe nene du. Na yiyi yo yikuleka nane si nghusaka niwongomezeze mwi 'kuwo lyangu. 12Holeka wumulonjele Finehasi nha vyono, alu neza kunoza cilagane co mulamu. 13Mwene, hamonga ne wanagwe wose, mu ndelo zakwe zose, ane nakondya kuwawika kuwa wakohani mu vilo vyose. Hambi mwene nha si yali kusuma kuvikangalila i vinhu vyose vyono vikujela kwisumaniza nane. Kanyhi kasuma kuwanozeza wanhu wa Isilayeli wilamule.”

14Ne litagwa lyo Mwiisilayeli mono yawulagwa hamonga no mucekulu Mumidiyani, yali Zimuli u mwana wa Salu, u mulongola we mhuga yo mulango wa Simiyoni. 15Ne litagwa lyo mucekulu yuyo we Cimidiyani, yacemwaga Kozibi. Nayo Zulu u sogwe wo mucekulu yuyo, yali yo mulongola muwaha we mhuga ye Wamidiyani.

16Hobaho Muwaha Mulungu yakawa kumulajiliza Musa yakutya, 17“Ale, wahomaje wawo Wamidiyani wuwongomezeze lukulu, 18ku soko yo wubi wono wamutendelenyi, lono wakamukonjenyi akulya ku Peyoli, kanyhi na ku soko ya Kozibi mono yakawulagwa kuko ku Peyoli, mwipango lye litamwa lye lihuhuji lono lyali ligwiye.”

Currently Selected:

Wuwale 25: LLKWW

Highlight

Compare

Copy