Walawi 12

U wezwe we wacekulu, lono wakulawa mu lusawo

1Muwaha Mulungu yakamulonjela Musa yakatya, 2“Walonjelaje wanhu wa Isilayeli wulajilize awu, wutye nhavi, ‘U mucekulu hono yatuje 'nda yasawe mwana we cilume, mucekulu yuyo kowa yeyavufya, sunga vipulute vilo mupunghati, nha vyono kawezaga yeyavufye, lono yali mu vilo vyakwe vyo mwezi. 3Na mwi'zuwa lyo munana u mwana yuyo yanojeye yategulwe ku calamo, yalame. 4Kanyhi mucekulu yuyo yajendelele kuwa yali mu wavufywe du, sunga vipulute vilo makumi madatu ne 'datu, lono yakali neyeza mu wulawa mu sakami yo wezwe wakwe. Kanyhi yimunojeye yalecele lukulu kupamiza cinhu co cose cono celile, hamba yalece kwinjila mwi Hema lyono lyelile, sunga kolo vyakondya kufika i vilo vyo wezwe wakwe.’ ”

5Langa hono mucekulu yasawe mwana we cicekulu, mucekulu yuyo, kokwikala yeyavufye vilo yikumi na vine, nha vyono kawezaga mu vilo vyakwe vyo mwezi. Kanyhi yajendelele kuwa yali mu wavufywe wakwe du, sunga vipulute vilo makumi mutandatu na mutandatu, lono yakali neyeza mu wulawa mu sakami yo wezwe wakwe.

6Na kolo vilo vyo wezwe vyakondya kufika, hono yiwe so mwana we cilume hamba so mwana we cicekulu, yimunojeye mucekulu yuyo, yaze kuli mukohani ha mulango we Lihema lyono lyelile. Yaleteleze ne nyana ye ngholo ya mwaka monga, so cilavywa cinyanywe, hamonga ne nziwa, hamba nghunda, so cilavywa co wubi. 7Nayo mukohani yawe kucilavya cilavywa cico kuli Muwaha Mulungu, no kumunozeza wilamule. Nayo mucekulu, kowa yezwa mu wulawe we sakami yakwe. Nazo zizi zo zinojeye yazitume mucekulu mono yakulawa mu lusawo.

8Na hono mucekulu yalece kusuma kulavya nyana ye ngholo, hodu, kosuma kuleta nziwa nyejete hamba nghunda nyejete. Na muli zizo, monga yowa so cilavywa cinyanywe, ne nyagwe nayo yowa so cilavywa co wubi. Nayo mukohani komunozeza wilamule. Nayo mucekulu kowa yezwa.

Currently Selected:

Walawi 12: LLKWW

Highlight

Compare

Copy