Walawi 13

Malajilizo ku so wutamwa wo wukoma

1Muwaha Mulungu yakawapela malajilizo gaga Musa na Haluni, yakawatya, 2Hono lunji munhu wo wose yawe yena wupele hamba wukulutu, hamba wulalawuce, vyono vyosuma kuwa nha wutamwa wo wukoma. Munhu yuyo yanojeye yategulwe kuli Haluni mukohani. 3Nayo mukohani yalilanje livimbe lilyo. Na hono yijele zimvwili zono zili he 'vimbe, zagaluka zawa nzelu, ne futa ye livimbe likwijela yikombo mu nghuli yakwe, ale wuwo weza wutamwa wo wukoma. Holeka mukohani komwanza munhu yuyo vyono mwavufywe. 4Ninga hono livimbe liwe yizelu, kanyhi likwijela lisina yikombo mu nghuli, sunga ne zimvwili zayo ziwe si zizelupe, ale, mukohani komukoma munhu yuyo vilo mupunghati. 5Ninga hanyuma mukohani ho yamulanje kanyhi mwi'zuwa lyo mupunghati, na hono yawone vyono livimbe likali lili nhavivilya du hamba si lipituce liwala, hamba si lyonjelezece yaye, hodu mukohani komukoma kanyhi vilo mupunghati. 6Nayo mukohani yamulanje kanyhi mwi'zuwa lyo mupunghati. Na hono yawone livimbe likucepuka hamba si lyonjelezece yaye, hodu mukohani komwanza munhu yuyo vyono si mwavufywe yaye, langa lyali yivimbe du. Nayo munhu yuyo yayikanze myenda yakwe no kwiyeza. 7Langa livimbe hono liwe likujendelela kuvimba kanyhi, lono mukohani yali yakondya kumulanga munhu yuyo, no kwanzwa zo wezwe wakwe, ale munhu yuyo yowa yimunojeye yelajile kanyhi kuli mukohani. 8Nayo mukohani yamulanje kanyhi, na hono mukohani yawone vyono livimbe likonjelezeka, hodu komwanza munhu yuyo vyono mwavufywe, yawa nhamwa yo wukoma.

9Na hono munhu wo wose yawe yena wutamwa wo wukoma, yimunojeye munhu yuyo yaletwe kuli mukohani, 10ho yalangwe. Na hono hawe holili yivimbe yizelu mu nghuli yakwe munhu yuyo, lyono lina mvwili nzelu hamonga no wufila, 11ale lilyo lyakondya kuwa wutamwa wo wukoma. Nayo mukohani komwanza munhu yuyo vyono mwavufywe. Hamba howa hasina kanyhi soko yo kukomwa ne wayagwe. Hambi nha yaweza mwavufywe cagalanze. 12Na hono wutamwa wuwe wakondya kumutandala munhu mu muwili wose ku wulawilila ku migulu sunga ko ku mutwe, 13ale, mukohani yamulanje kanyhi. Na hono mukohani yawone vyono, mbeka wutamwa wutandeye mu muwili wose, hodu komwanza munhu yuyo vyono yakondya kwezwa. Vyono hono nghuli yose yo munhu yuyo yiwe yawa nzelu swee, hodu yakondya kwezwa. 14Ninga hono livimbe likopozoce, hodu munhu yuyo kowa mwavufywe. 15Nayo mukohani komulanga kanyhi, na hono yawone livimbe likopozoce, hodu yamwanze vyono mwavufywe. Hambi wukopozoce nha wukulajila vyono awo weza wutamwa wo wukoma, sunga no munhu yuyo yawa mwavufywe. 16Ninga hono livimbe linoje no kupituka kuwa kanyhi yizelu, hodu munhu yuyo yanojeye yabite kanyhi kuli mukohani, 17ho yamulanje kanyhi. Na hono mukohani yawone vyono livimbe lyapituka lyawa yizelu, hodu mukohani komwanza munhu yuyo vyono yakondya kwezwa.

18Na hono munhu yawe yali yena yipu, lyono ninga alu lyakondya kunoga, 19ninga kanyhi ho yejele yatuga wuvimbe wuzelu, hamba vipelepele vyono vihanjile wuzelu no wudunghu, ale munhu yuyo, yanojeye yabite kuli mukohani. 20Nayo mukohani yamulanje, na hono mukohani yawone vyono lyahimba yikombo, sunga ne zimvwili zayo zawa nzelu, hodu mukohani yamwanzaje munhu yuyo vyono mwavufywe. Hambi nha lyaweza wutamwa wo wukoma wono wukwamuliziza mwi'pu. 21Ninga hono mukohani yalilanje yawone vyono zimvwili si zinawa nzelu, kanyhi liwe si lihimbile yikombo, ninga lyakondya kwanza kutukuwala, hodu mukohani yamukomaje munhu yuyo mu wayagwe vilo mupunghati. 22Ninga hono vipelepele viwe vikujendelela kutandala, hodu mukohani yamwanzaje munhu yuyo vyono mwavufywe, hambi nha yakondya kwibatwa ne nhamwa. 23Ninga hono liwe si lipituce liwala, hamba si litandaye yaye, langa lisigaye yikovu du baho he 'pu, ale mukohani yamwanze munhu yuyo vyono yakondya kwezwa.

24Na kuli munhu mono yapiye moto, cilonda co moto, hono ciswelulile, hamba lunji ciwe no wuswelulile wo wudunghudunghu, 25ale, mukohani yamulanje munhu yuyo. Na hono yijele zimvwili za mu cilonda zisweluliye, na liwe lyahimba yikombo, ale wuwo waweza wutamwa wo wukoma wono wamulizize mu cilonda, so wupye wo moto wono wumunyanyile. Holeka mukohani yamwanzaje munhu yuyo vyono mwavufywe. 26Ninga zimvwili zayo, hono ziwe si zisweluliye yaye, kanyhi hamba si lihimbile yikombo, ninga lyakondya kwanza kutukuwala, ale mukohani yamukomaje munhu yuyo mu wayagwe vilo mupunghati. 27Ninga mukohani yamulanje kanyhi mwizuwa lyo mupunghati. Na hono lijele lilonda likujendelela konjelezeka, ale wuwo weza wutamwa wo wukoma. Holeka mukohani yamwanzaje munhu yuyo vyono mwavufywe. 28Ninga hono liwe si lipituce yiwala, hamba si litandaye yaye, ninga lyakondya kwanza kutukuwala, ale wutamwa wuwo wowa wutamwa wono si wa wukoma yaye. Holeka mukohani yamwanze munhu yuyo vyono yakondya kwezwa. Hambi nha lisigaye lyo likovu du lyo wupye wo moto.

29Na hono munhu we cilume hamba we cicekulu, yawe yatuga cilonda mu mutwe wakwe, hamba mu cidevu, 30ale mukohani yamulanje munhu yuyo cico cilonda cakwe. Na hono cilonda cico cijele cihimbile yikombo, ne zimvwili zayo ziwe zawa zili manjano, kanyhi mugati yayo muwe movili viwembe wembe visisili, ale wuwo waweza wutamwa wo wukoma. No munhu yuyo yanzwe no mukohani vyono mwavufywe. 31Na lono mukohani yawe yamulanga, yawone vyono cilonda si cihimbile yikombo, ninga zimvwili zayo ziwe zikali si zinatukuwala yaye, ale mukohani yamukomaje muli wayagwe vilo mupunghati. 32Ninga mukohani yamulanje kanyhi mwi'zuwa lyo mupunghati. Na hono yawone vyono lilonda si litandaye yaye, kanyhi lisina zimvwili ze manjano mugati yalyo, kanyhi hamba si lihimbile ng'o, 33hodu mukohani yamunyonyole munhu yuyo zimvwili zakwe zose, ninga yazinje du hono holili lilonda. Hanyuma mukohani yamukomaje kanyhi munhu yuyo mu wayagwe vilo mupunghati. 34Ninga mukohani yamulanje kanyhi kolo vyeza kupuluta vilo mupunghati. Na hono lilonda liwe si litandaye hamba si lihimbile yikombo, hodu mukohani yamwanzaje munhu yuyo vyono yakondya kwezwa. Nayo munhu yuyo yayikanze myenda yakwe, nayo kowa yezwa. 35Ninga lono yakondya kwanzwa vyono yezwa, na kanyhi lilonda lyakwe ho liwuye ne nyuma no kutandala kanyhi, 36ale, mukohani yamulanje kanyhi. Na hono yijele vyono lilonda lyakwe lyatandala kanyhi, hodu kowa kusina soko kanyhi yo kuwona hono zimvwili zawa zili manjano, hambi munhu yuyo nha yakondya kwijela cagalanze vyono mwavufywe. 37Na mu wulanje wo mukohani, hono yawone vyono lilonda si likutandala sunga ne zimvwili zinhitu zakondya kucindika, hodu lilonda lilyo lyakondya kunoga, na mukohani yamwanzaje munhu yuyo vyono yakondya kwezwa.

38Na hono munhu we cilume hamba we cicekulu, yawe yatuga wulalawuce mu nghuli yakwe, 39mukohani yamulanje munhu yuyo. Hono yijele vyono wulalawuce wuwo wuli buli yono yihanzize no wuswelulile, ale gago go malila-ga-mbuli gono, galalawuce du mu nghuli, no munhu yuyo yelile.

40Na hono munhu yatuje cipala ku cigosi 41hamba muhalu, awo si wavufywe yaye. 42Langa hono cilonda cimwime mu cipala hamba mu muhalu, ale, awo langa weza wutamwa wo wukoma. 43No mukohani yamulanje munhu yuyo, na hono mukohani yawone cilonda cico cina wuswelulile wo wudunghudunghu, 44hodu mukohani yamwanzaje munhu yuyo vyono mwavufywe, ku soko yo wutamwa wo wukoma wono yena nawo mu mutwe wakwe.

45No munhu mono yena wutamwa wo wukoma, yimunojeye yavwale myenda yono yidemukanjice, kanyhi yalece kuswamula ne zimvwili zakwe, kanyhi yagubicize no mwenda mulomo wakwe wa kucanyha, yawe kuzoza yakutya, “Ane nili mwavufywe! Ane nili mwavufywe!” 46Nayo kojendelela kuwa mwavufywe mu vilo vyakwe vyose vyono yakali mutamwa. Kanyhi yimunojeye munhu yuyo, yekale kunze ye nghambi kutali ne wayagwe.

Wulajilize kuli zo mumvulya

47Hono hawe howuli mwenda wawe watuga mumvulya, hono wuwe mwenda wa bafuta hamba mwenda wa wuhamba, 48hamba yiwe mu mwenda we 'wala lyo lyose, lunji mu mwenda we bafuta, lunji wo wuhamba, hamba mwenda we nguwo, hamba muli cinhu co cose cono cinozwe na nguwo. 49Hono mumvulya wuwo wuwe we 'wala lye dedede, hamba lidunghu, awo weza wutamwa wo wukoma. Holeka yowa yinojeye wulajilwe kuli mukohani. 50Nayo mukohani kowulanga mwenda wuwo, nayo yawusole yawuwice kutali muno ne wanhu, wikale kuko vilo mupunghati. 51Nayo mukohani yawulanje kanyhi mwi'zuwa lyo mupunghati, na hono yawone vyono mumvulya wujendeleye kutandala, hodu mwenda wuwo waweza iwifyo. 52Mukohani yawusolaje yawutakamize mu moto, vyono weza mumvulya wono wukutandala, wono wunojeye wutakamizwe mu moto.

53Ninga mukohani lono yakucilanga cinhu cico, ho yawone vyono mumvulya si wutandaye mu cinhu cico, 54hodu yalajilize cinhu cico cikwemwe ne malenga, yaciwice kutali ye wanhu vilo mupunghati kanyhi. 55Hanyuma ho yacilanje kanyhi, na hono yawone vyono mumvulya wu wulya wukali hamba si napituka liwala, hamba wuwe si wutandaye mu cinhu cico, ninga cinhu cico cowa cikali cili iwifyo du. Nanye munojeye mucitakamize mu moto, hamba cinhu cico ciwe cakondya kuwola mugati yayo, hamba munze yayo. 56Ninga mukohani lono yakucilanga kanyhi, yagane mumvulya hono ho wuli wakondya kunyala, hodu mukohani yahademulaje baho hono hali ho wuli, mu mwenda hamba mu nguwo. 57Na hono mumvulya wuwo wijele kanyhi, no kutandala, ale, munya cinhu cico yacitakamizaje mu moto. 58Na hono yacikweme mu malenga sunga libanhi lyajilile, ale, yowa yimunojeye yawuyajile kucikwema kanyhi lwe kejete, ne cinhu cico, cowa cakondya kwezwa.

59Nawo wu wuno wo wulajilize wa kuli zo mumvulya wono wuli mu mwenda. Hamba wuwe mu mwenda wo wuhamba, hamba mu mwenda we bafuta, hamba wuwe mu cinhu co cose cono cinozwe na nyhingo. Nawo awu wo wulamuzi wono wunojeye wukamiswe kuli vyose vye liwifyo, na kuli vyono si vye liwifyo.

Currently Selected:

Walawi 13: LLKWW

Highlight

Compare

Copy