Walawi 11

Vilimu vyono vinojeye kuligwa

(Kum 14:3-21)

1Muwaha Mulungu yakawapela Musa na Haluni malajilizo 2gono getyatizye, ku so wanhu wa Isilayeli, yakatya, Mosuma kulya nyama ye zinimu zose mono'nze. 3Nimu zono zina mabangho gatemanuce, na zono zina magulu gapanduce, kanyhi zono zikusindula, zizo zo mudahile kulya. 4Ninga mulecele lukulu kulya ngamiya, 5hamba mhimbi, 6ne sungula wugombe. Azi zose nha nyavu hali 'nye. Hamba ziwe zisindulaga, ninga mabangho gazo si gatemanuce yaye. 7Kanyhi mulece kulya ngubi, hambi nha si zelile kuli 'nye, hamba ziwe zina mabangho gatemanuce, ninga sizisindulaga yaye. 8Holeka mulecele lukulu kulya zinimu zizino, hamba kuyipamiza midunhu yazo, hambi nha nyavufywe.

9Ninga mosuma kulya zisomba ze mawala gose, zono zina malebeto ne makaka. 10Langa, cilimu co cose cono cikalaga mu malenga, cono cisina malebeto ne makaka, aco mulece kulya avi iwifyo kuli'nye. 11Vilimu vye liwala lilyo, si vitelevu yaye. Holeka mulecele lukulu kuvilavya, hamba kuyipamiza midunhu yavyo. 12Holeka mulecele lukulu kulya cinhu co cose cono cikalaga mu malenga, cono cisina malebeto ne makaka. 13Kanyhi mulecele lukulu kulya zindeje ze liwala alino, hambi nha iwifyo kuli'nye, 'ndi, numba, mwanziwa, 14nyaciko, nyacikwanghwala ku luto lwayo. 15Ne mahowe gose ku luto lwayo. 16Ne nyacihema ne maluwatu, no mulundi, ne mwewe 17No mugulo, ne limulowa, ne nhuwi, 18ne limuzinji, no mujimbo, ne mwambogo. 19Ne mhuje, ne nyhinyinha, ne li mung'wa ne libudibudi.

20Navyo vitambala hasi vyose vyono vina mabawa, vyono vijendaga ne migulu mine, vivyo navyo iwifyo kuli'nye. 21Ninga, avi vitambala hasi vinji, vyono navyo vina mabawa, kanyhi vikujenda ne migulu mine, kanyhi vina ne milundi, ne vima mu mazayo gayo vyo kuzumhila zumhila, avyo mosuma kulya. 22Kanyhi mudahile kulya zinzije, nhendelefute, nyenye, na mhanzi. 23Ninga vitambala hasi vyose, vyono vina mabawa avyo langa iwifyo kuli'nye.

24Na muli wose, mono koyipamiza midunhu ye vilimu avino vyono vityatizye, yuyo kowa yeyavufya, sunga kono lyoswela lizuwa. 25Vilimu vyose vyono visindulaga vyono vina mabangho, na vyono vina magulu gapanduce. 26Ne vilimu vyose vyono vina migulu mine, hamonga ne makombazala. 27Munhu wowose mono kodinghula mudunhu wavyo, yimunojeye munhu yuyo yayikanze myenda yakwe. 28Ninga hamba nhavivyo, kojendelela kuwa yeyavufye sunga kono lyoswela lizuwa.

29Navyo vitambala hasi vyono vitambalaga kononze, vyono vyowa iwifyo kuli'nye nha vyovi. Funde, ne ngule, ne mbulu, 30ne nhunu, nyhodo, ne libandagazi, ne likaka, no lwivu. 31Na muli wose mono koyipamiza midunhu yavyo, kowa yeyavufya sunga kono lyoswela lizuwa. 32Na hono midunhu yazo yigwile muli cinhu co cose, i cinhu cico naco, hodu cowa cavufywa. Ne nghani yiyino, yowa yili muli vinhu vye mawala gose, iviya vye mabici, myenda, nyhingo, hamba mhinda hamba cinhu cocose du cono citumamilwaga, hamba ciwe vyono cinha, cinhu cico cinojele cizabikwe mu malenga, hamba nhavivyo cowa cavu sunga kono lyoswela lizuwa. 33Na hono midunhu yavyo yigwile mu nyungu, hodu vyono vili mumo vyowa vyawa iwifyo, holeka yowa yikunojeye wuyitule nyungu yiyo. 34Ne ndigwa yoyose yono yali yinojeye yiligwe, ninga ho yiwe yimwajiciywe malenga gono gakulawa mu njilo yono yina liwifyo, ne ndigwa yiyo yaweza iwifyo, ne malenga gono gali mu njilo yiyo gose gaweza iwifyo. 35Ne ciya cocose cono cogwilwa ne midunhu yiyo, ciya cico cowa iwifyo, lunji nyungu hamba mafigwa, yinojeye vinhu vivyo vitulangwe. 36Ninga muvwilo we malenga, hamba lisima, mono malenga galawile, avyo vyowa vitelevu du, hamba yiwe ivinji vyose, vyono vipamize midunhu yazo, vyawa iwifyo. 37Na hono cimonga ca muli vitambala hasi vivyo, cigwile mu mbeyu yono yali yakondya kuwikanizwa yikahadikwe, i mbeyu yiyo, yowa nhelevu du. 38Langa hono yiwe mbeyu yakondya kulowekwa mu malenga, na cinji co cose co mudunhu cigwile mu mbeyu yiyo, hodu mbeyu yiyo yowa yeza iwifyo.

39Na hono mutugo wo wose wono wunojeye wuligwe, ninga hono wifwile weneco, munhu wo wose mono kowupamiza mudunhu wayo, u munhu yuyo kowa yeyavufya, sunga kono lyoswela lizuwa. 40Na hono munhu wo wose yejelele yalye mhonje ye nyama yo mutugo wuwo, munhu yuyo yanojeye yakanze myenda yakwe. Ninga hamba nhavivyo, kowa yeyavufya sunga kono lyoswela lizuwa. No munhu wo wose mono kodinghula mudunhu wayo, yimunojeye munhu yuyo yayikanze myenda yakwe. Ninga hamba nhavivyo, kojendelela kuwa yeyavufye sunga kono lyoswela lizuwa.

41Kanyhi mulecele lukulu kulya i vilimu vyo vyose i vidodododo vyono vikujenda hasi. 42Hamba viwe vyono vikutambala hasi, hamba viwe vyono vikujenda kwe migulu yavyo mine, hamba vyono vina migulu minji. 43Holeka mulecele lukulu kwiyavufya so wulya vilimu vye liwala lili. 44Hambi 'ne, nha yo nene mono nili Muwaha Mulungu wenyu. Holeka munojeye mweze mwelile, hambi 'ne nha nelile. 45Hambi 'ne nha yo nene Muwaha Mulungu wenyu, mono namuwusenyi ku yisi ya Misili, ho niwe Mulungu wenyu. Holeka munojeye mweze mwelile, hambi 'ne nha nelile.

46Nalyo lilino lyo lilajilizo lya kuli vilimu vyose hamonga ne zindeje, na kuli vinhu vyose vyono vikujenda mu'si. 47Holeka yinojeye mulanjilile muno muno, ho musume kusiwanula muli vinhu vye liwifyo na vyono vyelile. Na muli vilimu vyono vidahile kuligwa, na vyono si vidahile kuligwa.

Currently Selected:

Walawi 11: LLKWW

Highlight

Compare

Copy