Yoshuwa 10
10
Waamoli wakusumwa
1Ale, baho, Adonizedeki lono yali mutemi wa ha Yelusalemi, yakahulika nha vyono Yoshuwa yali yakondya kuyiteka no kuyongomeza Ayi, na vyono yakamuwulaga no Mutemi wayo, nha vyono yetuma ku Yeliko, na vyono yamuwulaga no mutemi wayo. Kanyhi yakahulika nha vyono, i wanhu wa ku Gibeyoni, wali wakondya kunoza mulamu ne Waisilayeli, na vyono wekaye hamonga. 2Wanhu wa ku Yelusalemi, wakenjilwa na woga wuwaha muli yiyo, vyono Gibeyoni lyali yikaya yiwaha kotya makaya ganji gono gali gena ne watemi, kanyhi lyali yiwaha kuciza likaya lya Ayi, ne wanhu we likaya lilyo, wali wanghula muno mu wulugu. 3Holeka Adonizedeki u mutemi wa Yelusalemi, yakategula wulolose wono wutyatyize kuli mutemi Hohamu wa ku Hebuloni, na ko mutemi Pilamu wa ku Yalemuti, na ko mutemi Yafiya wa ku Lakishi, na ko mutemi Debili wa ku Ejiloni, yakawalonjela yakatya, 4“Ale muze wose munhaze ciyihome Gibeyoni, hambi wanhu wayo, nha wakondya kunoza mulamu, no kwilumbaniza na Yoshuwa hamonga ne Waisilayeli.” 5Nawo watemi wawa i wahano we Waamoli, mutemi wa Yelusalemi, na Hebuloni, na Yalemuti, na Lakishi, na Ejiloni, wakawahanguliza hamonga wasilikale wawo, wakayipilima Gibeyoni wakanza kuyihoma.
6Nawo i wanhu wa ku Gibeyoni, wakategula nghani kuli Yoshuwa ku nghambi ya ku Giligali wakamutya, “Wulece kucileka co wetumami wako gwe Yoshuwa! Wuze mbela mbela wucitaze! Wuciponye! Hambi i watemi wose we Waamoli wono wekalaga mu yisi ye matunda, nha wakondya kulonjela kumonga, wawahanguliza i wasilikale wawo, nalu wanza kucihoma!”
7Lo lulo lulo Yoshuwa hamonga ne lipuga lye wasilikale wo wulugu, hamonga ne watun'gati, wakatuluka ku wulawilila Giligali. 8U Muwaha Mulungu yakamulonjela Yoshuwa yakamutya, “Wulece kuwogopa wawo, hambi nha nakondya kukupela wusume. Hasina hamba yunji muli wene, mono kosuma kwima ha mwande yako ho mwihome nayo.”
9Mu cilo cico cose, Yoshuwa ne wasilikale wo wulugu, wakatuluka wakulawa ha Giligali, wakawa kubita ku Gibeyoni. Wakawatiniciza Waamoli mu wihomi, wakanza kuwahoma. 10Hobaho Muwaha Mulungu, yakawanoza Waamoli, wakenjilwa no woga wuwaha muno ha mwande ye wasilikale we Waisilayeli wo wulugu. Nawo wasilikale we Waisilayeli, wakawawulaga Waamoli wose ha Gibeyoni, no kuwawinjiliza sunga ko ku nzila yono yitenenhuce mwi'tunda, ku Bete Holoni, akuno wajendeleye no kuwahoma, sunga ko ku mhelo ye takama, sunga ko ku Azeka na Makeda. 11Na lono Waamoli watizaga ha mwande ye Waisilayeli, akuno wakumangha, wakutimila ku Bete-holoni, Muwaha Mulungu yakawagumilila mvula mbaha ye mabwe, yono yikawatonyela nzila yose sunga ko ku Azeka. Wenji muno wono wawulagwa ne mvula yiyo, kuciza na wono wawulagwa ne Waisilayeli.
12Mwi'zuwa lyono Muwaha Mulungu yawapelela wanhu wa Isilayeli wusume kuli Waamoli, Yoshuwa yakamulonjela Muwaha Mulungu hamwande ye Waisilayeli yakatya,
“Go lizuwa, ale, wime wutulile hacanyha ya Gibeyoni,
Nagwe go mwezi, wime hacanyha ye lilolo lya Ayaloni.”
13Lizuwa likema litulile, nawo mwezi wukatulana, sunga lono likungugo lyali lyakondya kuwasuma i walugu wawo. Nazo zizi zandicigwe mu citabu ca Yasheli. Lizuwa likema litulile haciligati yo wulanga hamba si lyaswa yaye mwi'zuwa lilyo. 14Kanyhi kusina yizuwa linji lyono lyejela kotya lili, hamba si lyolokwijela kanyhi, lyono Muwaha Mulungu yakawuvumila wulonje wo munhu. Hambi Muwaha Mulungu nha yawalewela Waisilayeli. 15Zaza kukondya zizi, Yoshuwa ne wasilikale wakwe we milewo, wakawuya kanyhi ku nghambi yawo ku Giligali.
Yoshuwa yakuwebata watemi wahano we Waamoli
16I watemi wawa wahano we Waamoli, hamba nhavivyo wali wakondya kutiza wehundika mu mhango ya mu Makeda. 17Yunji yakawawona, yakamulonjela Yoshuwa i hanhu hono wali wehundice. 18Yoshuwa yakawatya, “Ale, muwabidusizaje mabwe mawaha, muwudinde mulango we mhango, muwice ne walindilizi baho. 19Langa anye, mulece kwikala baho. Anye mujendelele kuwalondelela i walugu wenyu, ho muwahome ku wulawilila mu nyuma yawo. Walece kuwuya mu makaya gawo kanyhi. Hambi Muwaha Mulungu, u Mulungu wenyu, nha yakondya kumupenyi wusume muli wene.” 20Yoshuwa ne Waisilayeli, wakawawulaga no mumaje no kuwongomeza. Hamba nha vivyo, wanji wakehundika mugati ye majinji ge likaya, holeka siwawulagwa. 21Hobaho i wanhu wose wa Yoshuwa, wakawuya waswanu kuli mwene ha nghambi ya ha Makeda.
Hakawa hasina hamba yunji kanyhi mu yisi, mono yejelela kulonga nghani 'mbi, kuli Waisilayeli. 22Hanyuma Yoshuwa yakawatya, “Ale, lu, digulenyi mulango we mhango, mundetele watemi wawalya wahano.” 23I mhango yikadigulwa, ne watemi wa ku Yelusalemi, na Hebuloni, na Yelemoti, na Lakishi na wa Ejiloni wakalavyanizwa kunze. 24Wakategulwa kuli Yoshuwa, nayo Yoshuwa yakawacemeleza Waisilayeli wose, yakawalajiliza i wawaha wose wono vyabitana, walete migulu yawo, wawakanyaje watemi wawa mu zisingo zawo. Nawo waketuma nhavivyo. 25Hanyuma Yoshuwa yakawatya i wawaha. “Mulece kogopa, hamba kwinjilwa na woga, mweze ne vilungo kanyhi no wutung'ati, hambi azi, nha zo Muwaha Mulungu ko kwituma muli walugu wenyu wose.”
26Hobaho Yoshuwa yakawawulaga i watemi wa walya, yakayitumbika miwili yawo mu mabici mahano. Ne miwili yiyo, yikawa mucanyha ye mabici, sunga lizuwa likaswa. 27Na lono lizuwa lyagwililicilaga, Yoshuwa yakalajiliza miwili yawo yiwuswe, yikagumilwe mu mhango yiyilya yono wali wehundice hamwamulizo. Mabwe mawaha gakawicilwa mu mulango we mhango, nago gali baho sunga nalu.
Yoshuwa yakuzibata zi'si zinji ze Waamoli
28Mwizuwa lilyo, Yoshuwa yakayihoma Makeda hamonga no mutemi wayo yakayiteka. Yakawawulaga wanhu wose wa mwikaya, si yasigala munhu hamba monga. Yakamutendela u mutemi wa ha Makeda, nha vyono yamutendela u mutemi wa Yeliko.
29Zizi zaza kuwa zakondya kupuluta, Yoshuwa hamonga ne wasilikale wakwe we milewo, wakajendelela wulawa Makeda, sunga ku Libina, wakayihoma Libina. 30Muwaha Mulungu kanyhi yakawapela Waisilayeli wusume, wakalisuma sunga ne likaya lili, hamonga no mutemi wayo. Wakawawulaga wanhu wose siyasigala munhu hamba monga. Kanyhi wakamutendela mutemi wawo nha vyono wamutendela mutemi wa ku Yeliko.
31Zaza kupuluta zizi, Yoshuwa ne wasilikale wakwe we milewo, wakajendelela wulawilila ku Libina sunga ku Lakishi, wakalipilima likaya, wakalihoma. 32U Muwaha Mulungu yakawapela wusume Waisilayeli ku Lakishi, mwi'zuwa lye kejete lyo wulugu. Nawo wakayitendela Lakishi nha vyono wayitendela Libina. Si wasigaza munhu hamba monga, langa wakawawulaga wanhu wose wono wali wali mwi'kaya lilyo. 33Nayo Holamu u mutemi wa Gezeli, yakelunza ho yayitazize Lakishi, ninga Yoshuwa yakamusuma hamonga ne wasilikale wakwe, yakawawulaga wose, si yasigaza munhu hamba monga.
34Hanyuma Yoshuwa hamonga ne wasilikale wakwe wo wulugu, wakajendelela wakulawilila ku Lakishi, sunga ku Ejiloni. Wakayipilima, nayo wakayihoma no kuyiteka. 35Wakayibata mwizuwa lilyo. Wakawawulaga wanhu wose wono wali wali mumo, nha vyono wawatendela wanhu wa ku Lakishi.
36Hanyuma kanyhi, Yoshuwa ne wasilikale wakwe wo wulugu, wakatuluka wulawilila ku Ejiloni, wakabita mu matunda, sunga ku Hebuloni, nayo wakayihoma, 37wakayiteka. Wakamuwulaga mutemi, hamonga ne wanhu wose wono wali wali mwi'kaya, hamonga na wanji wose wa mu matumbi ge behi behi, Yoshuwa yakalikumulanga likaya lilyo, no kulyongomezeza lukulu, nha vyono yalinoza likaya lya Ejiloni. Hakawa hasina munhu hamba monga mono yasigala mumi.
38Hanyuma kanyhi Yoshuwa hamonga ne lipuga lye wasilikale wakwe wo wulugu, wakawuya ne nyuma ku Debili, wakayihoma nayo no kuyisola. 39Yakayiteka hamonga no mutemi wayo, ne matumbi ge behi behi. Wakawawulaga wanhu wose. Yoshuwa yakayitendela Debili no mutemi wayo nha vyono yayitendela Libina na Hebuloni ne watemi wayo.
40Yoshuwa yakayisuma yisi yose. Yakawasuma i watemi wa mu yisi ya mu matunda na ku nhenenhuko yo lubavu lwa kucilima, na wa mu mwalambalo we matunda, ku lubavu lwa kumwezi. Hamonga na wa ku yisi nghavu, ya ku lubavu lwa kutakama. Namo mumo, yakawawulaga wanhu wose siyasigaza munhu hamba monga. Hambi Muwaha Mulungu, u Mulungu we Waisilayeli, nha vyo yali yalajiliza. 41Wulugu wuwo wa Yoshuwa, wukajendelela muno, ku wulawilila ku Kadeshi Balineya mhelo ya kutakama, sunga ko ku Gaza, behi no mwejelele we lilenga, hamonga ne litumbi lyose lya Gosheni, sunga ku lubavu lwa kusumuka, ku Gibeyoni. 42Yoshuwa yakawasuma i watemi wawa hamonga ne matumbi gawo, mwipango lililya du, hambi u Muwaha Mulungu, u Mulungu we Waisilayeli nha yo yawalewela Waisilayeli. 43Zaza kukondya zizi, Yoshuwa ne wasilikale wakwe wo wulugu, wakawa kuwuya ku nghambi yawo ku Giligali.
Currently Selected:
Yoshuwa 10: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
