Yoshuwa 11

Yoshuwa yakumusuma Yabini, hamonga ne watemi wono wali welunzize nayo

1Ale baho, lono zinghani zo wusume winji we Waisilayeli, zali zeza kumuficila mutemi Yabini wa ku Hazoli. Yakategula nghani kuli mutemi Yobabu wa ku Madoni, na kuli watemi wa Shimiloni na Acisafu, 2na kuli watemi wa mu yisi ya mu matunda, ku lubavu lwa kusumuka, mwi'lolo lya Yoludani, ku lubavu lwa kutakama ye lilamba lya Galilaya, na mu nhenenhuko, ye matunda na mu mwejelele we lilenga, behi na Doli. 3Kanyhi Yabini yakategula nghani kuli Wakanani wono wekalaga ku nhumbi zose vyono nyejete ze likolongo lya Yoludani, sunga na kuli Waamoli na kuli Wahiti, na kuli Wapelizi ne Wayebusi wa mu yisi ye matunda, hamonga na kuli Wahivi wono wekalaga mu nhenenhuko ye litunda lya Helemoni mu yisi ya Mizipa. 4Ne watemi wawo wose, wakaza hamonga ne lipuga yiwaha lye wasilikale wawo wo wulugu. Lipuga lilyo lye wasilikale, lyali lina wasilikale wo wulugu wenji muno kotya musawawa wa mu mwejelele we lilenga. Kanyhi wakawa wena ne zifwalasi nyinji muno, hamonga ne matuka menji go wulugu. 5Watemi wawa wose wakelumbaniza, wakawa kwilunza hamonga, wakawa kubita hamonga ne wasilikale wawo wo wulugu, wakawa kusimya nghambi ha cikolongo ca Melomu, ho wehome ne Waisilayeli.

6Muwaha Mulungu yakamulonjela Yoshuwa yakamutya, “Wulece kuwogopa yaye, hambi nha mu vipango vivi mitondo, nowa nakondya kuwahoma no kuwawulaga wose ha mwande ye Waisilayeli. Nanye muzidumule matimba zifwalasi zawo, kanyhi mugaticimizaje ne matuka gawo go wulugu.” 7Hobaho Yoshuwa ne wanhu wakwe wakawahungucila, wakawahoma muno muno ha cikolongo ca Melomu. 8Muwaha Mulungu yakawapela wusume Waisilayeli, wakawahoma no kuwawinjiliziza ku lubavu lwa kusumuka, sunga ko ku Miselefoti-mayimu na ku Sidoni, sunga ku lubavu lwa kucilima, sunga Mwi'lolo lya Mizipa. Wulugu wukajendelela sunga hakawa hasina mulugu wawo hamba monga mono yasigazwa mumi. 9Yoshuwa yakawatendela nha vyono Muwaha Mulungu yali yalajiliza. Yakazidumula matimba zi fwalasi no kugaticimiza no moto i matuka gawo go wulugu.

10Hobaho Yoshuwa yakawuya kanyhi ne nyuma, yakayihoma no kuyiteka Hazoli yakamuwulaga no mutemi wayo, (Mu vilo vivilya, Hazoli, yali yo mbaha mu matemi ga galya gose,) 11yakawawulaga wanhu wose wa mumo. Kwali kusina mono yakasigazwa mumi, ne likaya lya Hazoli, likaticimizwa no moto.

12Yoshuwa yakagateka makaya gaga gose, hamonga ne watemi wayo, yakawawulaga wose, nha vyono Musa u mwitumami wo Muwaha Mulungu yalajiliza. 13Ninga hamba nhavivyo, i Waisilayeli siwagaticimiza makaya gono gali mazengwe mu vitumbi tumbi, langa Hazoli du, yo Yoshuwa yakayiticimiza. 14Wanhu Waisilayeli, wakasola vinhu vyose hamonga ne mitugo mu makaya gaga, wakaviwika viwe sawo yawo weneco. Ninga langa, wakawawulaga wanhu wose, hasina hamba yunji mono yasigazwa mumi. 15Hambi Muwaha Mulungu nha yali yakondya kumupela Musa malajilizo gaga. Nayo Musa, yali yakondya kumupela Yoshuwa, nayo Yoshuwa yakagebata. Yaketuma zose nha vyono Muwaha Mulungu yali yamulajiliza Musa.

Yisi yono yasolwa na Yoshuwa

16Hobaho Yoshuwa yakawa yakondya kuyiteka yisi yose. Yisi ya mu matunda, ne yisi ya ha nhenenhuko ye matunda. Zisi zose za kusumuka na za kutakama, hamonga ne yisi yose ya Gosheni, sunga ko ku yisi nghavu ya kulubavu lwa kutakama, sunga ko kwi'lolo lye likolongo lya Yoludani. 17Yisi yali yilawiliye mwi'tunda lya Halaki ku lubavu lwa kutakama behi na Edomu, sunga ko ku Baali-gadi ku lubavu lwa kusumuka, mwi'lolo lya Lebanoni mhelo ye takama ye litunda lya Helemoni. 18Yoshuwa yakawa yali mu wihomi, yakwihoma ne watemi wa mu yisi yiyo vilo vinji du muno muno. Ninga yakawasuma wose, yakawawulaga. 19Langa i likaya du lyono lyanoza mulamu ne wanhu wa Isilayeli, lyali lyo likaya lya Gibeyoni, i hanhu hono i Wahivi wanji wekalaga. Ne makaya ganji gose gali gakondya kusumwa mu wulugu. 20U Muwaha Mulungu, yawanoza wawe na nhumbula nghamu, ho wehome ne Waisilayeli, ho wawulagwe no kongomezezwa lukulu, hamba kuwonelwa lusungu yaye. Na zizi zo Muwaha Mulungu yali yamulajiliza Musa.

21Kanyhi mu vipango vivyo, vyo Yoshuwa yabitila no kuwongomeza we nghungugo ye manhu mawaha gono gacemwaga Waanaki, gono gekalaga mu yisi ye matunda, ku Hebuloni, na Debili na Anabu, sunga na mu zisi zose ze matunda za Yuda na Isilayeli. Yoshuwa yakagongomezeza lukulu manhu gago, hamonga ne makaya gawo. 22Kwali kusina hamba Mwanaki yunji wo wose mono yasigazwa mumi mu yisi ya Isilayeli. Langa wacefu du wo wasigala ku Gaza, na ku Gati, na ku Ashidodi.

23Yoshuwa yakayisola yisi yose, nha vyono Muwaha Mulungu yali yamulajiliza Musa. Yakawapela Waisilayeli yiwe yawo, yakawagawaniza wanhu, nha vyono lyali linha liwalo lye milango yawo, hanhu na mulango wawo. Nhondo no wulugu wukawa kumalika, ne wanhu wakawa kwikala wapolile.

Currently Selected:

Yoshuwa 11: LLKWW

Highlight

Compare

Copy