Walamuzi 20

Isilayeli wakwiwikaniza so wulugu

1Wanhu wose wa Isilayeli kulawilila Dani lubavu lwa kusumuka sunga ku Beyeli-sheba lubavu lwa kutakama sunga ko ku yisi ya Gileyadi lubavu lwa kucilima, wose wakedika kucemo lulo, wakehanguliza hamonga hali Muwaha Mulungu ku Mizipa. 2Ne walongola wose wa mu milango yose ya Isilayeli, wali wali baho ha wihangulize wuwo we wanhu wo Mulungu, kanyhi kwali ne Wasilikale wajenda kwa migulu waficile elufu magana mane liwalo lyawo. 3Cipango cico i wanhu wa Benyamini, wakahulika nha vyono Waisilayeli wanji wose, wali wakondya kwihanguliza ha Mizipa.

Waisilayeli wakawuza wakatya, “Mucilonjelaje ta, ku sokoci wubi wuwu witumwa?” 4U Mulawi munghalo mujitulwa mono yali yawulagwa, yakawapitula yakatya, “Nene hamonga no mujitulwa wangu, cabita ku Gibeya mu yisi ya Benyamini ho cigone baho. 5Nawo wanhu wa ha Gibeya wakanyiziza mu cilo mugati no kuyipilima nyumba mono nali ngonile. Wakasaka wambulaje, ninga wakamwibata mujitulwa wangu kwe vilungo, wakagona nayo sunga yakafwa. 6Nane nghawa kuwusola muwili wakwe, nghawa kuwutemasha mhonje yikumi na nyejete, nha vyono yinha milango yikumi na myejete, ye Waisilayeli. Nghawa kuwategulila milango yose mhonje monga monga. Hambi i wanhu awa, nha wetuma nghani 'mbi ya cevu muli Isilayeli. 7Nase wose ahano, cili Waisilayeli. Alu ho citende wule so nghani yiyi?”

8Wanhu wose wakenucila hamonga wakatya, “Kusina yunji muli sese, mono kekalaga mwi'hema hamba mu kaya mono kopituka yawuye ku kaya kwakwe. 9Alu conoza nhavi: Cotowa kula ho ciwawagule wanhu wono wobita wakayihome Gibeya. 10Wanhu yikumi limonga-limoga lya mu wanhu yigana yigana lya mu Waisilayeli, wo wolavya ndigwa so wasilikale wo wulugu. Na wanji wose, wokwinuka wabite wakayilipicize Gibeya, so wubi wuwu wono wetumile mu Isilayeli.” 11Holeka wanhu wose wa mu Isilayeli wakekonghola ko wuhile wumonga wo kulihoma likaya lya Gibeya.

12Nawo milango yose ye Waisilayeli, wakawatuma wanhu wakolele mu yisi yose ya wo mulango wa Benyamini, wakawatya, “Alo wubici wuwu wono mwetuma?” 13Alu muwalavyanizaje i wanhu wabi wawo, wono wayamuye nghani yiyo mu Gibeya, nase ciwawulaje, ho ciwuse wubi wuwu mu Isilayeli. Ninga wene wanhu wo mulango wa Benyamini, hamba si wayicelelela bwete nghani yiyo ye Waisilayeli wayawo. 14Langa wene wanhu wose wa mu makaya gose ga Benyamini, wakekongholela ha Gibeya, wakawa kuwahoma Waisilayeli wayawo. 15Wakawakonghola wasilikale elufu makumi mejete na mutandatu, ku wulawilila mu makaya gawo gose mwi'zuwa lilyo. 16Hamonga na wawo, iwekazi wa ha Gibeya, nawo wakekonghola wanhu magana mupunghati, wono wahagulwa, wono wetumamilaga miwoko yo kucekulu. Muli wene, mwali mo wali wanghula wo kugumila mabwe ne zinhago, no kutowa luvwili hamba kwicelya yaye. 17Nawo we milango ye Waisilayeli, yono yali yisigaye, nayo yikawakonghola wasilikale wo mulungu, waficile elufu magana mane, wono wali wejizwe muno wunghula wo wihomi.

Waisilayeli wakwihoma ne Wabenyamini

18Waisilayeli wakasejelela hanhu ho kuhembela ha Beteli, wakawa kumuwuza Mulungu wakutya, “Gwe go Mulungu, alu wo mulangoci wono walongole kuwahoma Wabenyamini?”

Nayo Muwaha Mulungu yakawapitula yakatya, “Wo mulango wa Yuda.”

19Hobaho Waisilayeli wakatuluka i mitondo yaco, hakali mitondo muno, wakayisimya nghambi yawo behi ne likaya lya Gibeya. 20Wakatuluka ho wakawahome wasilikale wa Benyamini. Wakawatandalika wasilikale wawo wakema vidomile ne likaya lya Gibeya. 21Nawo we lipuga lye wasilikale lya Benyamini wakalawila mwi'kaya, ninga na lono ne lizuwa lyali likali si naswa, wali wakondya kuwulagwa wasilikale we Waisilayeli elufu makumi mejete na nyejete liwalo lyawo. 22Lulo Waisilayeli wakabita mu Nyumba yo wuhembelo, wakamulilila ko wukalale Muwaha Mulungu, sunga lizuwa likaswa. 23Wakamuwuza Muwaha Mulungu wakutya, “Wule ciwuyajile kanyhi, cikehome ne wandugu zetu wa Wabenyamini?”

U Muwaha Mulungu yakawapitula yakawatya “Heya mubite.”

Lulo wasilikale we ci Isilayeli wakekamiliza mu mitima yawo, wakawa kuwatandalika wasilikale wawo bahalya du nha vyono wali wawatandalice ha lulongozi.

24Wakanza kwitang'anila kanyhi ne lipuga lye wasilikale wa Benyamini lwe kejete. 25Nawo wasilikale we Wabenyamini, wakalawila mwi'kaya lya Gibeya lwe kejete. Alu nhondo mwi'zuwa lilyo, wakawulagwa wasilikale wanghula we Ciisilayeli, waficile elufu yikumi na munana liwalo lyawo. 26Lulo kanyhi wanhu wa Isilayeli wakatuluka wakabita ku Beteli, wakalila ko wukalale wuwaha muno muno hali Mulungu. Wakaceha baho hali Muwaha Mulungu hamba siwalya cinji sunga likaswa. Wakalavya hali Muwaha Mulungu cilavywa co mulamu, hamonga ne cilavywa cinyanywe. 27Ne lisanduku lye cilagane lyo Muwaha Mulungu, lyekalaga ha Beteli mu vilo vivyo. 28Nayo Finehasi u mwana wa Eleyezali, kanyhi yo mwizukulu wa Haluni, yali yo mulanjilizi walyo. Wanhu wakamuwuza u Muwaha Mulungu, wakatya, “Gwe go Muwaha Mulungu, wule, ciwuyajile kanyhi cikehome ne wandugu zetu Wabenyamini hamba hodu cilece?”

Nayo Muwaha Mulungu yakawapitula yakawatya, “Heya! Mubite mukawahome! Nane baho mitondo nhondo, nomupelenyi wusume wuwaha muno kuli wene.”

29Lulo nhondo Waisilayeli wakawatandalika wasilikale wawo cinyele, wakalipilima likaya lyose lya Gibeya. 30Na mwi'zuwa lilyo lye kadatu, vyono lyali lyo lizuwa lyo wusume. Waisilayeli wakawabitila wasilikale wa Benyamini, no kuwatandalika wasilikale wawo wakema vidomile ne likaya lya Gibeya, nha vyono wawatandalika ha mwamulizo. 31Nawo Wabenyamini, wakalawila ho wehome, ninga Waisilayeli wakawakwejeleza Wabenyamini, sunga wakawafisa kutali ne likaya. Ninga nha vyono yali ha mwamulizo, wakanza kuwawulaga Waisilayeli wanji mwi'hala, na mu nzila yono yibitile ku Beteli. Nawo Waisilayeli wakawakwejeleza du Wabenyamini, sunga ku nzila yono yikoleye ha Gibeya. Ninga nawo Wabenyamini wakawawulaga Waisilayeli waficile nha wanhu makumi madatu nhavi.

32Nawo Wabenyamini wakatya, “Alu cawahoma nha vyono cawahoma hamwamulizo.”

Ninga mwi'zuwa lilyo Waisilayeli wali wewikaniza wenoze nha wakutiza ha mwande ye Wabenyamini. Ho wawakwejeleze wawafise kutali ne likaya, sunga ku zinzila zimbaha. 33Lulo lulo lipuga lye Waisilayeli wakawuka i hanhu hawo, wakatandala mu milewo ku Baali-tamali. Na wono wali wehundice mu yisi ya Gibeya, nawo wakawuka i hanhu hono wali wehundice mu mabwe behi ne likaya. 34I Wanhu elufu yikumi wono wahagulwa muli Waisilayeli, wawo wakayihoma Gibeya, no wulugu wuwo wali wukali muno, nawo Wabenyamini hamba si wamanya yaye vyono weza kongomezwa yaye. 35Muwaha Mulungu yakawapela Waisilayeli wusume kuli Wabenyamini. Waisilayeli wakawawulaga walugu wawo, waficile elufu makumi mejete na yigana limonga, liwalo lyawo mwi'zuwa lilyo. 36Nawo Wabenyamini, nhondo ho wakawa kumanya vyono kumbe wasumwa.

Waisilayeli vyono wawasuma Wabenyamini

Lipuga lyose lye wasilikale we Waisilayeli, wakenoza nha wakutiza hali Wabenyamini, vyono wali wawetumbiye awalya wono wali wehundice, walipilime likaya lya Gibeya. 37Wanhu wawo wo wakamangha mbela mbela, wakeyagala mwi'kaya lyose lya Gibeya, wakawawulaga wanhu wose mono wali wali mwi'kaya. 38Lipuga liwaha lye wasilikale, na awalya wono wali wehundice, wali wewiciye citanjilo. Nha vyono, kolo weza kuwona lyosi yiwaha likomile wulawilila mwi'kaya, 39baho Waisilayeli wono wali kwi'wanza lyo wulugu, ale, wapituce, ninga mu vipango vivyo, Wabenyamini wali wakondya kuwawulaga Waisilayeli makumi madatu. Holeka wakeyitya, “Heya, cawahoma nha vyono cawahoma ha mwamulizo.” 40Lo lulo lulo naco citanjilo ce lyosi cikawa kwijela. Livunde lye lyosi likawa likukomoka kulawilila mwi'kaya. Nawo Wabenyamini wali weza kwilenga ku nyuma, wakezina kuwona likaya lyacile moto. 41Hobaho Waisilayeli wakawa kupituka no kuwuya ne nyuma. Nawo Wabenyamini wose, wakenjilwa no woga wuwaha muno, hambi nha wakemanya vyono, alu, langa, weza kongomezwa. 42Hodu, wakawa kutiza ha mwande ye Waisilayeli, wakawa kumanyhila mwi'hala. Ninga hamba nhavivyo, si watiga yaye. Wakebatilwa haciligati ye lipuga liwaha lye wasilikale. Ne wanhu wono walawaga mwi'kaya, nawo wakongomezwa wose. 43Waisilayeli wakawatejela walugu wawo, wakajendelela kuwawinjiliza akuno wakuwawulaga, sunga ko ku nhuzi ya kucilima ya Gibeya. 44Baho wakawawulaga wasilikale vitung'ati we Wabenyamini waficile elufu yikumi na munana liwalo lyawo. 45Wanji wakapituka wakanza lumangho mwi'hala wakatiziza kwi'bwe lya Limoni. Ninga hamba nhavivyo, wawulajilwa mu nzila wanhu elufu yihano. 46Nawo Waisilayeli wakajendelela kuwawinjiliza du, Wabenyamini wono wali wasigaye, sunga Gidomu, wakawawulaga waficile elufu makumi majete na yihano Wabenyamini liwalo lyawo, mwi'zuwa lilyo. Na wose wawa wali wo wasilikale vitung'ati.

47Hamba nhavivyo, Wabenyamini wanji magana mutandatu, wakasuma kutiziza mwi'hala, sunga ko kwi'bwe lya Limoni, nawo wakekala baho myezi mine. 48Waisilayeli wakawawuyila kanyhi Wabenyamini wanji, wono wali wakali wasigaye, wakawawulaga wose, we cilume, na we cicekulu, ne wana wose hamonga ne mitugo zawo zose. Wakagapembela moto ne makaya gose gono wagawona.

Currently Selected:

Walamuzi 20: LLKWW

Highlight

Compare

Copy