Walamuzi 19
19
U Mulawi no mujitulwa wakwe
1Kukawa mu vilo vivyo, lono Isilayeli wali wakali wasina mutemi, kwali ko yuli Mulawi yunji mono yekalaga mu yisi ye matunda ya Efulayimu. Yakamusola muhinza ku wulawilila ku Betelehemu ya Yuda, ho yawe mujitulwa wakwe. 2Ninga yakamukoza likuwo, yakawa kuwuya ko sogwe ku Betelehemu, yakekala kuko myezi mine. 3Lulo yuyo Mulawi yakamubitila no kumunena ho yamugomole kwakwe kanyhi. Yakawa yena no mwitumami wakwe na ndogowe nyejete. Muhinza yu yulya yakamuleta Mulawi ku kaya ko sogwe. Nayo sogwe yali yaza kumuwona, yakendezwa nayo muno muno. 4U sogwe yakasaka yuyo Mulawi yekale baho vilo vidatu, nayo yakavumila. Wakalya no kung'wa, wakagona baho. 5Na mwi'zuwa lye kane wakawa kwinuka hakali mitondo muno, wakawa kwiwikaniza ho watuluce. Ninga u sogwe yo muhinza yulya, yakamulonjela Mulawi yakatya, mwamule ta mutuje ndigwa mulye. Ale ho mutuluce. 6Lulo wanhu wawa wakekala wakalya no kung'wa hamonga. Baho umukwewe yakamutya, “Nghukunena zuwali wugone baha kanyhi u mutima wako wusangalale kanyhi.” 7Ninga Mulawi yakenuka ho yatuluce, nayo Mukwewe, yakamupepeleza kanyhi ho yagone, nayo yakavumila, yakagona baho kanyhi zuwa mwi'zuwa lilyo. 8Na mwi'zuwa lye 'hano, wakapinjila kwinuka ho watuluce, ninga u mukwewe yakawatya, “Ng'o ye, mulece kutuluka, langa mwamule mulye zindigwa. Mulindile hadodo, sunga lizuwa liwalice. Hodu wakalya zindigwa wose hamonga.”
9Hanyuma munhu yuyu, no mwitumami wakwe hamonga no mujitulwa wakwe, wali weza kusaka kutuluka, ninga kanyhi u mukwewe yakamutya, “Lanje ta, alu lizuwa nha lyaswa, holeka ciba mugone, hambi lizuwa nha lyogwila lulu baha, du, ne citi cokwinjila lulu baha du. Holeka ciba mugone baha kanyhi, mutuje cilejeho co kuceha. Ne mitondo mosuma kwilawa so muhinzo wenyu mubite kwenyu.” 10Ninga u munhu yulya hamba siyasaka kanyhi kugona baho. Langa mwene hamonga no mujitulwa wakwe, wakawa kutuluka, hamonga no mwitumami, no mwitumami, ne zindogowe nyejete zono zali nhandikwe ne matandiko. 11Nawo wali weza kufika behi na Yebusi (nha cinji yo Yelusalemi.) Lizuwa nalyo likawa lyakondya kuswa. Lulo u mwitumami yakamulonjela mutwawe yakamutya, “Nghukunena cibite cikagone he 'kaya lye Wayebusi.” 12Ninga u mutwawe yakamutya, “Sicosuma kwinjila mwi'kaya lyono wanhu wa mumo si Waisilayeli.” 13Langa cipulute ku mwande hadodo, cikagonele ku Gibeya ya ku Lama. 14Hodu wakawa kupulutiza ha Yebusi wajendeleleye no muhinzo wawo. Wakafika ha Gibeya mu yisi ya wo mulango wa Benyamini, lono lizuwa lyagwilaga. 15Hodu, wakawa kutemanuka nzila, wakawa kwinjila ho wagone baho ha Gibeya. Wakenjila mwi'kaya, ninga wakaceha mwi'wanza. Hakawa hasina hamba munhu wo wose mono yawabocela ho wenjile mu nyumba yakwe wagone.
16Na lono wali wekaye baho, mukombi yunji yakaza yakulawa ku mugunda cinyamihe, yakuwuya ku kaya. Nayo yali mulawa ku yisi ye matunda ya Efulayimu. Ninga luno, yekalaga baho ha Gibeya. Ne wanhu wanji baho, wali wo wo mulango wa Benyamini. 17Nayo mukombi yuyu yali yeza kuwawona wajenzi wacehile he'wanza lye likaya, yakamuwuza Mulawi yakamutya, “Alu wukulawilila hayi? Kanyhi wudomile hayi?” 18U mulawi yakapitula yakatya, cali cili ku Betelehemu ya Yuda nalu cili mu muhinzo cidomile kwetu kutali muno muno ku yisi ye matunda ya Efulayimu. Alu hasina hamba munhu mono yacicemeye mu nyumba yakwe cituje wugono, 19Ninga nase hamba nhavivyo cina ne mahanze so zindogowe zetu hamonga no mukate ne divayi so mujitulwa wangu na nene hamonga no mwitumami wangu. Cisina wanjile wa cinhu co cose cono cosaka.
20U mukombi yulya yakawatya, “Ale, muze mukagone ku kaya yangu! Nane nomudimenyi. Holeka musina soko yo yose yo kugona mwi'wanza.” 21Hobaho yakawa kuwasola yakabita nawo kwakwe, yakazilisa zindogowe zawo. Wajenzi wakwe wakezuguza magulu gawo yakawapela ne zindigwa. 22Na lono wali wali mu wisangalaze we mitima yawo; langa ta wukaza wanhu wabi wakulawa mwi'kaya, wakayipilima kaya yo mukombi yuyu, wakawa kuyitowanga milango no kumutya mukombi yuyu, “Mulavyanizaje kononze u munhu yulya mono mwinjilane mu kaya yako. Ase cikusaka cigone nayo!” 23Ninga mukombi yakalawaniza kunze yakawatya, “Aa! Ng'o wandugu zangu, nghumunenenyi mulece kwituma wubi wuwo wo wusenhya, hambi munhu ayu nha mujenzi wangu. 24Alu mulanje ta! Ayu u mwanangu we cicekulu, mono yakali namanya walume, wali hamonga no mujitulwa wo munhu yuyu. Holeka nowalavyaniza wawo kuli'nye, nanye ho muwatendele nhavivyo. Muwetumamilaje nha vyono mosaka nyenye nyo weneco. Ninga mulece kwituma wubi wono winha wuwo, we cevu kuli munhu ayu!” 25Ninga wawo wanhu, hamba siwamuhuliciza yaye. Hobaho u Mulawi yakamusola umujitulwa wakwe, yakamuwika hanze hali wene. Nawo wakagona nayo, wakamunoza vibi muno cilo cose. Hamba si wamuleka yaye sunga wusiku wukela. 26Na lono wusiku welaga, hakali mitondo muno, u mucekulu yuyo yakabita sunga ha mulango wo munya kaya, mono mwali moyuli u mulume wakwe. Yakawa kugwa ha'deha ha mulango, yakekala baho sunga wukela.
27Mwi'zuwa lilyo u mulume wakwe yakelawa kwinuka hakali mitondo, nayo yali yeza kudigula mulango ho yatuluce, yakamuwona mujitulwa wakwe yagonile ha mulango, ne miwoko yakwe yibate cipimbila-mulango. 28Hobaho yakawa kumucema yakutya, “Ale winuce cibite!” Ninga mujitulwa hamba siyapitula yaye. Hodu yakawa kumujeleka cipinga, mucanyha ye ndogowe, yakawa kutuluka nayo. 29Nayo yali yeza kufika kwawo, yakenjila mu kaya, yakasola mumaje, yakawutemasha muwili wo mujitulwa wakwe. Yakawutemasha mhonje yikumi na nyejete, yakategula mhoje monga monga, mu milango yose vyono yikumi na myejete ye Waisilayeli. 30No munhu wo wose mono yayiwona mhonje yiyo, yakatya, “Cikali nahulika vyono calelwa nghani yono yinha yiyi! Hamba hasina nghani yono yinha yiyi, yono yejela ku wulawilila lono Waisilayeli wawucila ku yisi ya Misili sunga nalu. Holeka yicinojeye citume nghani yo yose, vyono yowa yinha, ku soko ya nghani yiyi. Alu mukuwona wule?”
Currently Selected:
Walamuzi 19: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
