Walamuzi 21
21
Wacekulu so wo mulango wa Benyamini
1Na lono Waisilayeli wali wakondya kwihanguliza ha Mizipa. Wakelahiza wilahize kuli Muwaha Mulungu, wakatya, “Hasina hamba munhu monga wa muli sese, mono kumukombola mwanagwe we cicekulu, yatolwe na wo mulango wa Benyamini.” 2Hobaho Waisilayeli wakawa kubita ku Beteli no kwikala baho hali Mulungu, sunga lizuwa likaswa. Wakenula mazi gawo kwe vilungo wakulila no kukalala muno, wakutya, 3“Gwe go Muwaha Mulungu u Mulungu wa Isilayeli, alo nhawule zizi zacijelela nhavivi lo? Nhawule wo mulango wa Benyamini 'lu, weza kwajilila mu Isilayeli.” 4Hodu wali weza kwela i mitondo yaco hakali mitondo, wanhu wakazenga cikumbicilo baho, wakalavya cilavywa co mulamu hamonga na vilavywa vinyanywe 5Waisilayeli wakewuza wakatya, “Wulenyi, howa holili yipuga lyo lyose muli milango ye Waisilayeli lyono silyaza ha wihangulize wa hali Muwaha Mulungu ha Mizipa?” (Hambi nha wali wekondya kwilahiza nha vyono, wo wose mono wilahize we mbeka vyono, sikobita ha Mizipa ciba yawulagwe.) 6Wanhu wa Isilayeli wakatuga wukalale wuwaha so wandugu zawo wo mulango wa Benyamini wakatya, “Mwi'zuwa lili Isilayeli cakondya kuwajiliza i wayetu wo mulango monga wa mu milango yetu. 7Alu cotenda wule ho cisume kuwakombola wana wetu we cicekulu watolwe ne wana wawo we cilume we Wabenyamini wono wasigaye? Hambi nha cakondya kwilahiza hali Muwaha Mulungu, nha vyono ase sicowapelela lukulu wana wetu we cicekulu watolwe nawo.”
8Wali weza kukondya kwiwuza vyono wo mulangoci wa muli milango ya Isilayeli wono siwafika ha wihangulize wa ha Mizipa, Hobako wakamanya vyono hali hasina hamba yunji wa muli wono wekalaga ku Yebeshi ya Gileyadi mono yali yali baho. 9Sunga na lono wawacemaga matagwa i wasilikale wose wo wulugu kwali kusina hamba yumonga mono yejela mono yalawilila ku Yabeshi ya Gileyadi. 10Hodu hobaho mukung'ano wukawatuma Wasilikale wono wakamile kanyhi wanghula waficile elufu yikumi na vyejete. Wakawalajiliza wakatya, “Mwinuce mubite mukawawalaje wanhu wose wa ku Yabeshi ya Gileyadi, walume na we cicekulu, hamonga ne wana wose. 11Muwawulaje we cilume wose na we cicekulu wose wono wakondya kumanya walume.” 12Nawo wasilikale wawo wali weza kufika kuko ku Yabeshi ya Gileyadi wakawagana wana we cicekulu wono wakali namanya walume, wali waficile magana mane, hodu wakawa kuwasola no kuwategula ku nghambi ya ku Shilo, yono yali yili mu yisi ya Kanani.
13Hobaho u mukung'ano wuwo wukategula nghani kuli Wabenyamini wono wali wali kwi'bwe lya Limoni wakewicila mulamu hamonga walece kwihoma. 14Hodu Wabenyamini wakawa kuwuya, nawo Waisilayeli, wakawa kuwapela wahinza wa walya wono wasolwa ku Yabeshi ya Gileyadi, awalya wono siwawawulaga. Ninga hamba nhavivyo siwawakwile wose yaye.
15I wanhu wakenjilwa no lusungu luwaha so wanhu wa Benyamini, hambi Muwaha Mulungu, nha yali yakondya kuwutemanula u wilunze wawo i milango ya Isilayeli. 16Hobaho i walongola wa ha mukung'ano wuwo wakatya, “Nha hasina kanyhi wacekulu wono wasigaye wa mu mulango wa Benyamini. Alu ho cotenda nhawule, ho ciwapele wugolece i walume wawa wono wasigaye? 17Hambi nha si yowa viswanu, hono Isilayeli yajilize mulango monga wa muli milango yawo yikumi na nyejete. Holeka yicinojeye, cilondole nzila kuli mulango wa Benyamini ho wulece kwajilila. 18Ninga hamba nhavivyo, ase sicowakombolela lukulu i wana wetu we cicekulu ho wawatole. Hambi nha cakondya kwilahiza nha vyono yalijitwe munhu wo wose mono komukombolela Mubenyamini, u mwanagwe we cicekulu yamutole.”
19Baho kanyhi wakehwesa wakatya, “Langa ta, sikukuu yo ku Shilo ya Muwaha Mulungu ya mwaka nha yasejelela.” Shilo yili lubavu lwa kusumuka ya Beteli, kutakama ya Lebona kanyhi lubavu lwe cilima lwe nzila yono yili haciligati ya Beteli na Shekemu. 20Holeka wakawalonjela Wabenyamini wakawatya, “Muwuce mubite mukehundice mu migunda ye mizabibu, 21muwe mulanjiliye. Na lono i wahinza wa ku Shilo wakuza kono wuvina, kono sikukuu, anye nhondo mulawile mu migunda ye mizabibu. Nanye munhu na lwakwe, yehagulile mucekulu mono yakusaka, yamupule kwa vilungo yamutegule ku yisi ya Benyamini. 22Hono wasogo zawo, hamba walumbu zawo waze wamuwuzenyi, muwalonjele mutye, cikumunenenyi muwalekaje cikale nawo, hambi nha sicawasola kuli'nye mu nzila yo wulugu, ho wawe wagolece zetu. Nalu mbeka, vyono si nyenye mono mwacikombolela wawe wagolece zetu, holeka anye musina lisutya lyo wubena wihuwizo.”
23Nawo Wabenyamini waketuma nhavivyo, wose yumonga yumonga, wakehagulila mucekulu, mu wulawa muli wawo wahinza, wono wali waza ha wuvina, ha sikukuu ya ha Shilo. Wakawa kuwapula, wakawa kubita nawo, wakawa kuwuya nawo ku yisi yawo, wakazenga kanyhi zikaya zawo wakekala mumo. 24Lulo lulo wanji wa muli Waisilayeli, wono wali wakali wasigaye, nawo wakawa kuwuka, wakawa kuwuya munhu na kwakwe kuli wo mulango wakwe ne mhuga yakwe, no wuhazi wakwe.
25Na mu vilo vivyo, mu Isilayeli, mwali mukali musina mutemi, holeka wanhu wetumaga du zono wehwesaga munhu na lwakwe.
Currently Selected:
Walamuzi 21: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
