Walamuzi 14
14
Samusoni no muhinza wa ku Timuna
1Mwi'zuwa linji Samusoni yakatenenhuka sunga ku Timuna, na kuko yakamuwona muhinza yunji we Cifilisiti. 2Yakawuya ku kaya, yakamulonjela sogwe no nyina yakawatya, “Kuko ku Timuna nimwagana muhinza yunji we Cifilisiti mono kanyendeza muno, holeka nghumulombenyi mubite mukamulete ane, nghusaka nimutole.” 3Ninga u nyina no sogwe wakamuwuza wakamutya, “Nhawule wukusaka kubita kutola mucekulu kuko kuli Wafilisiti wono si walame? Alo siwudahile kulondola muhinza yunji wa mu mulango wetu, mu wanhu wetu?”
Ninga Samusoni yakamutya sogwe, “Nane yuyo, yo nhumbula yangu yamwenda, holeka nghusaka mubite mukamusole yuyo.”
4Walezi wakwe hamba siwamanya vyono Muwaha Mulungu yo yamutongaga Samusoni mu wituma zizi, hambi Muwaha Mulungu nha yalondolaga nzila yo kuwahoma Wafilisiti. Na mu vilo vivyo Wafilisiti wali wawatemile Waisilayeli. 5Ale Samusoni hamonga no Sogwe no nyina wakawa kutuluka wakawa kubita ku Timuna. Na vyono wabitaga wakoleye mu migunda ye mizabibu, Samusoni yakahulika nyana ya simba yikukoloma. 6Lo lulo lulo u muhe wo Muwaha Mulungu wukamuziza ne vilungo, yakayidemulanga simba kwe miwoko yakwe, kotya yakuyidemulanga nyana ya mhene. Nayo yali yasina citwalo co cose mu miwoko yakwe. Ninga siyawalonjela ne walezi wakwe yaye, zizo zono yetuma. 7Ale baho yakawa kubita, yakawa kulongana no muhinza yu yulya yakendezwa nayo. 8Vikapuluta vilo vicefu du, Samusoni yakawa kubita kumutola muhinza yuyo. Na lono wali wali mu muhinzo, Samusoni, yakatemanuka ho yakayilanje simba yono yayiwulaga. Yakatinuka muno, yaza kuwona nzuci nyinji zili mu mudunhu we simba, no wuci winji muno muno mu mudunhe we simba. 9Yakabakula wuci mu mu miwoko yakwe yakawa kujenda akuno yakulya. Hanyuma yakawa kubita kuli sogwe na nyina, yakaw kuwapela nawo wuci wuwo, nawo wakalya. Ninga Samusoni siyawalonjela vyono kawusola wuci wuwo mu mudunhu we simba.
10U sogwe yakabita ku kaya yo muhinza yuyo, nayo Samusoni yakawatenjela zindigwa kuko. Hambi nha wali wo moto wawo i wazelelo kunoza nhavivi. 11Nawo Wafilisiti wali weza kumuwona, wakamuletela wazelelo makumi madatu wawe hamonga nayo. 12Samusoni yakawalonjela yakatya, “Nomuwuzenyi fumbo monga, hono musume kundoloseza nhunizo yayo lono vikali napuluta vilo vivi mupunghati vye halusi, nane nomupelenyi myenda miswanu makumi madatu yo wihambo ne misweko munhu na wakwe. 13Ninga hono mulece kunonjela nhunizo ye fumbo iyo, nyenye yo mumhela myenda makumi madatu yo wihambo, hamonga ne misweko makumi madatu.” Nawo wakamutya, “Ale lonje fumbo yako, nase ciyihulice.” 14Yakatya, “Mugati mo munya kulya, yikalawa ndigwa,
Mugati mwa citung'ati, mukalawa muzinzi.”
Vikapuluta vilo vidatu,
wakawa walemegwa kuyilolosa fumbo yiyo.
15Lyali lyeza kufika lizuwa lye kane, wakamutya mugolece wa Samusoni. “Ale wumupepelezaje mulume wako, ho wucilonjele fumbo yiyi yina nhunizo ci. Hono wulece kunoza nhavivyo nase coyipembela moto kaya yo sogo cikuticimize hamonga na gwegwe. Alo mucicema ho mucihizize hongo?” 16Hobaho u mugolece wa Samusoni yakamubitila Samusoni akuno yakulila yakamutya, “Gwe Samusoni, mbeka siwunyendile! Langa wusulile du! Ku soko kuwapela wandugu zangu fumbo yono hamba na nene wukali nanonjela yaye nhunizo yayo!”
Samusoni yakamutya, “Langa ta! Hamba wa baba na yaya nghali nawalonjela yaye, nhawule 'lu nghulonjele 'gwe?” 17Ninga nayo mugolece yakajendelela kulila du mu vilo vyose mupunghati vye zindigwa ze halusi. Nhondo Samusoni yakawa kumulonjela i nhunizo ye fumbo yiyo. Hambi nha yali yamudwajiza muno. Nayo yakawa kuwalonjela i wanduguze Wafilisiti. 18Na mwi'zuwa lyo mupunghati, lono Samusoni yali yakali nabita kugona, wanhu wa mwi'kaya wakamulonjela Samusoni wakamutya,
“Cicici cono cili muzinzi si nha wuci?
Hamba cicici cono
cili vilungo, si nha Simba?”
Samusoni yakawatya, “Mhali mulece kuyitumamila ndama yangu, mbeka si mwali musume kuyilolosa i nhunizo ye fumbo yangu yaye.”
19Kanyhi baho u muhe wo Muwaha Mulungu wukamuziza Samusoni, wukamupela vilungo. Yakawa kutuluka, yakawa kubita sunga ko ku Ashikeloni. Na kuko yakawawulaga wanhu we cilume makumi madatu, yakawasolela myenda yawo miswanu, yakawa kuwategulile awalya wono wayilolosa fumbo yakwe. Wulawilila baho, hodu yakawa kuwuya ku kaya akuno yakoligwe muno ne likuwo so zizo. 20Nawo kono nyuma wakawa kumutoza u mugolece wakwe kuli muzelelo mono yali yo mwimilizi wa Samusoni mwi'zuwa lye halusi.
Currently Selected:
Walamuzi 14: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
