Walamuzi 15
15
1Hanyuma yayo, Samusoni yakatuluka yakamulamuse mugolece wakwe mu vipango vye ndudula yo wuhemba. Yakasola ne nyana ye mhene ho yamutegulile mugolece wakwe yakamulonjela mukwewe, u sogwe yo mugolece wakwe yakamutya, “Alu baba, ane nghulomba ninjile mu cumba co mugolece wangu nimulamuse.” Ninga u sogwe yo mugolece wakwe siyamukombola yenjile. 2Langa yakamulonjela Samusoni yakamutya, “Ane mbeka nali nehwesa vyono wakondya kumusula, holeka nghamutoza kuli muzelelo mono yali mwimilizi wako mwi'zuwa lye halusi. Ninga U mwanakwawe mudodo yo muswanu muno muno si nho mwene, holeka, kosuma kumutola yuyo, yahomele ho muwahawe.”
3Samusoni yakatya, “Alu hono yili nhavivyo, ane nowa sina yisutya kuli Wafilisiti, muli zose zono nowatendela.” 4Hobaho yakawa kutuluka, yakawa kubita kugebata macewe magana madatu. Yakasola mazeza, yakagawopeleza mu macewe mejete mejete, kusonje ye micila yago. 5Hanyuma yakawa kugakoleleza moto mazeza, yakawa kugakumhila macewe gose mu migunda yo wuhemba ye Wafilisiti. Na mu nzila yiyo, yakawuticimiza wuhemba wose wono wali wadudulwa, hamonga no wono wali wukali nadudulwa, hamonga na migunda yose ye Mizeyituni. 6Na lono i Wafilisiti wewuzaga nani mono yetumile zizi, hanyuma wakamanya vyono, kumbe Samusoni yo yetumile zizi, ku soko vyono u mukwewe we cilume, u munhu wa ku Timuna, yamusola mugolece wa Samusoni no kumutoza kuli muzelelo mono yali yo mwimilizi wa Samusoni mwi'zuwa lye halusi. Hodu nawo Wafilisiti, wakawa kubita kumusola mucekulu wa Samusoni, wakawa kumupembela mu moto hamonga no sogwe.
7Samusoni, yakawatya, “Alu hongo nhavivi vyo mwetuma! Ale nane nghwilahiza nha vyono nojendelela kwituma zizi, hamba si noleka yaye, ho nimulipicizenyi.” 8Hodu hobaho, nayo yakawa kwanza kuwahoma muno, yakawawulaga wenji. Hanyuma yakawa kuwuka yakawa kubita kwikala mu mhango ye libwe ku Etamu.
Samusoni yakuwasuma Wafilisiti
9Nawo Wafilisiti, wakawa kuza wakayisimya nghambi yawo ku Yuda, wakalihoma litumbi lya Lehi. 10Nawo wanhu wa Yuda wakawawuza wakatya, “Nhawulenyi 'lu 'nye mukucihoma?” Nawo Wafilisiti wakawapitula wakatya, “Aa! Ciza ho cimwibate Samusoni, cimuwope no kumutendela nha vyono mwene yacitendela 'se.” 11Hobaho wanhu wa Yuda elufu yidatu, wakabita ku mhango, mwi'bwe, kuko ku Etamu, wakamutya Samusoni, “Alu gwe Samusoni, hongo siwumanyile nha vyono i Wafilisiti wo wacitemile? Alu ho kucitendela nghanici yiyi?”
Nayo Samusoni yakawapitula yakawatya, “Ane nawatendela wene, nha vyono nawo wanhendela'ne.” 12Nawo wakamutya, “Alu ase ciza ho cikuwope, cikutegule kuli wene.” Samusoni yakawatya, “Ale munyilahile vyono anye nyo weneco yo simombulaga.”
13Nawo wakamutya, “Heya, ase, sicokuwulaga ng'o langa cokuwopa du, cikutegule kuli wene Wafilisiti.” Hobaho wakawa kumuwopa ne midatilo myejete mipya yono yikamile, wakamuwusa kuko kwi'bwe.
14Samusoni yali yeza kufika ku Lehi, Wafilisiti wakamuziza lumangho, akuno wakumuhoweleza. Lo lulo lulo u Muhe wo Muwaha Mulungu wukamuziza yakatuga vilungo, baho yakayidumulanga midatilo yono wali wamuwopile mu zimhukumhuku na mu miwoko yakwe nha mhuti nyanye mu moto. 15Nayo yalanje nhavi, yakawona yifupa lyo luzagasa lwa ndogowe yono yali yafwa lulo lulo baho. Yakenama ya kalitondola, yakawa wulaga wanhu elufu monga ne lifupa lilyo. 16Lulo Samusoni yakemba yakatya,
“Ko luzagasa lwe ndogowe,
nawawulaga wanhu
elufu monga.
Ko luzagasa lwe ndogowe
nghawalundika hamonga malundo malundo.”
17Yaza kukondya, yakalugumila luzagasa lulo kutali. Ne hanhu baho hono ziketumwa zizi hakacemelwa litagwa lya Lamati-lehi. (Nhunizo yayo “Litunda lyo luzagasa.”) 18Lulo Samusoni yakebatwa ne nhyilu ya malenga. Yakamucemeleza Muwaha Mulungu yakatya, “Gwe go Muwaha Mulungu, agwe yo gwegwe mono wumhelile wusume wuwaha, alu ho nifwe ne nyhilu ye malenga, kanyhi ho nibatwe ne Wafilisiti wawa wono si walame?” 19Lo lulo lulo Muwaha Mulungu yakatobola yikombo baho ha Lehi, malenga gakalawila. Samusoni yakang'wa yakawa kutuga vilungo. Hobaho u muvwilo wuwo wukacemelwa litagwa lya Eni-hakole (nhunizo yayo “Muvwilo wa mono yalomba.”) No muvwilo wuwo wuli kuko ku Lehi sunga nalu.
20Samusoni yakawa mulongola we Waisilayeli myaka makumi mejete mu vilo vye Wafilisiti lono wali watemile mu 'si.
Currently Selected:
Walamuzi 15: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
