Walamuzi 13

Wulelwe wa Samusoni

1Ninga Waisilayeli waketuma kanyhi wubi hali Muwaha Mulungu. Nayo Muwaha Mulungu, yakawatajila mu miwoko ye Wafilisiti, wakawatema myaka makumi mane. 2Na mu vilo vivyo, hali na munhu yunji mono yacemwaga Manowa, munya Zola, yali we mhuga ya Dani. Mugolece wakwe yali sikalelaga. 3Malayika wo Muwaha Mulungu, yakamuziza yuyo mugolece wakwe, yakamutya, “Lanje ta, agwe sikulelaga wana. Ninga lu, kutuga 'nda, nagwe kolela mwana we cilume. 4Ninga wulanjilile, wulecele lukulu kung'wa divayi hamba wujimbi, hamba kulya ndigwa yo yose i nyavufywe. 5Na kolo u mwana yakulelwa, wulecele lukulu kumunyonyola zimvwili zakwe, hambi u mwana yuyo, nha kowa Munazili, musiwanulwe so Mulungu, ku wulawa mwi'zuwa lyono kolo lelelwa. Nayo kokwanza mulimo wo kuwaponya Waisilayeli mu miwoko ye Wafilisiti.”

6Baho mucekulu yuyu yakawa kubita kumuloloseza mulume wakwe yakatya, “Munhu wo Mulungu kanyiziza, nayo yali kwijela wa kogofya muno, i futa yakwe yehwanile nha Malayika wo Mulungu. Nane sinimuwuzize kono yalawiliye, nayo siyanhambuliye ne litagwa lyakwe. 7Langa kanonjela du nha vyono, notuga 'nda nolela mwana wa cilume. Kanyhi kanonjela nha vyono, ndece kung'wa divayi hamba wujimbi, hamba kulya zindigwa yo yose i nyavufywe. Vyono u mwana yuyu mono kolelwa kowa Munazili, musiwanulwe so Muwaha Mulungu mu mikalile yakwe yose.” 8Lo lulo lulo Manowa yakamulomba Muwaha Mulungu yakatya, “Gwe go Muwaha Mulungu, nghukulomba, wumulete munhu wo Mulungu mono wumutumile, yaze kanyhi kuli'se, yacilanjize vyono yicinojeye cinoze no mwana yuyu mono kolelwa.” 9U Mulungu yaketuma nha vyono Manowa yalomba. Malayika yakamuziza kanyhi u mucekulu yuyu lono yali yacehile du mwi'wimbi. Ninga Manowa siyali yali hamonga lulo no mugolece wakwe. 10Lulo mugolece wakwe yakamumanyhilila mulume wakwe, yakamulonjela yakatya, “Lanje ta! U munhu mono yanyiziza halulongozi, alu yaza kanyhi.”

11Manowa yakenuka musunho yakamutyatya mugolece wakwe. Yakafika ko munhu yuyo yakamuwuza yakamutya, “Yo gwegwe mono walongana no mugolece wangu?” Nayo yakamupitula yakatya, “Heya.” 12Hobaho Manowa yakamuwuza yakatya, “Kolo zinghani zako zaficilicila, yowa yimunojeye mwana yuyu yetume cici? Ne mikalile yakwe yeze wule?” 13Nayo Malayika wo Muwaha Mulungu yakamutya, “U mugolece wako yakamise no kuzituma zose zono nimulonjeye. 14Yalecele lukulu kulya ndigwa yo yose yono yikunozwa na zabibu kanyhi yalece kung'wa divayi, hamba wujimbi, hamba kulya cinhu co cose i cavufywe. Yimunojeye yafisilize zizo zose zono nimulonjeye.”

15Ninga Manowa hamba siyatanga vyono munhu yuyu yali Malayika wo Muwaha Mulungu, yakamutya kanyhi, “Nghukunena, wulece kucileka nhavivi, sunga cikuwulajile nyana ya mhene wulye.” 16Ninga Malayika wo Muwaha Mulungu yakatya, “Hamba nha nikale, ninga sinolya ndigwa yenyu yaye. Langa hono wukusaka kwituma zizo, ciba wumulavizye Muwaha Mulungu cilavywa cinyanywe.” 17Manowa yakapitula yakatya, “Ale wucilonjelaje le litagwa lyako, zinghani zako kolo zaficilicila, nase cikupele likumbo.” 18Malayika yakamuwuza yakatya, “Nhawule wukusaka wumanye litagwa lyangu? Hambi nhe 'tagwa lya wizine.” 19Hobaho Manowa yakasola nyana ye mhene hamonga no wusaje wudodo yakavilavizya ha cikumbicilo ce libwe, yakamulavizya Muwaha Mulungu mono ketumaga mezino mawaha. 20Na lono malambilambi go moto gabitaga kucanyha gakulawa mu cikumbicilo. Manowa no mugolece wakwe, wakamuwona Malayika wo Muwaha Mulungu, yakubita kucanyha, hamonga ne malambilambi go moto. Baho nhondo Manowa ho yamanyila vyono, u munhu yu yulya, kumbe yali malayika wo Muwaha Mulungu. Hobaho mwene no mugolece wakwe, wakagwa wugubama hasi. 21Na ku wulawa baho siwamuwona kanyhi.

22Manowa yakamulonjela mugolece wakwe yakamutya, “Mbeka 'lu cofwa, ku soko cewona no Mulungu.” 23Ninga u mugolece wakwe yakapitula yakatya, “Hono mbeka Muwaha Mulungu yali yawe yendile kuciwulaga, siyali yabocele hamba ne vilavywa vyetu, hamba si yali yacilajile na zizi zose, hamba kucilonjela zono zinha zizi mwi'pango lili.” 24Mugolece yuyu yakamulela mwana we cilume, yakamucemela litagwa lya Samusoni. Mwana yuyu yakawiluka Muwaha Mulungu yakamuluguta. 25U Muhe wo Muwaha Mulungu, wukanza kumupela vilungo muno Samusoni, lono yali yali hagati ya Zola na Eshitayoli mu nghambi ya Dani.

Currently Selected:

Walamuzi 13: LLKWW

Highlight

Compare

Copy