Hoseya 2
2
1Holeka muwacemaje wandugu zenyu Waisilayeli “Ami” (Nhunizo yayo, “Wanhu wangu.”) Ne walumbu zenyu muwacemaje “Luhama.” (Nhunizo yayo, “Mono yawonelwa lusungu.”)
Wu wula wihuwilwa wa Gomeli, no wu wula wihuwilwa wa Isilayeli
2Wanangu, mumunene nyina yenyu hamba yiwe mwene, yaweza si mugolece wangu, nane neza si nili mulume wakwe. Mumunenaje yalece zinghani zakwe zo wusenyha, no wumalaya wakwe. 3Na hono si yakuleka, nomuwopoza vivwalo vyakwe yekale cipwi, yawe nha vyono yali mwi'zuwa lyono yalelelwa. Nane nomunoza yawe nhe yisi nghavu ne ye nyika, nayo kolofwa ne nyhilu. 4Nane hamba si nilalajila lusungu kuli wanagwe, 5hambi wene nha wana wo mucekulu malaya, mono yasina hamba cevu. Hambi nha yalonga mweneco yakatya, “Nane nobita kuli wono wanyendile wono wakumhela ndigwa ne malenga, no wusinga, no wuhamba, hamonga ne mafuta ne divayi.”
6Holeka ku soko yiyo, nomuwicila ligomawakali lye mamivya no kuzenga lijinji ho liyidinde nzila yakwe, yalece kuwuwona wukolo wakwe. 7Nayo kowamanyhilila wendece wakwe, ninga hamba si kowatuga yaye. Kowalondola, ninga hamba si kowawona. Hanyuma kotya, “Alu neza kuwuya kuli mulume wangu u mulongozi, hambi u wuwe wangu wulongozi, nha wali wuwe wuswanu muno, si nha wuwe wono nina nawo aluno.” 8Hamba si kosuma kumanya vyono, ane yonene mono namupela wuhemba, ne divayi, ne mafuta, ne zifweza zose, hamonga ne zahabu, vyono yetumamilaga mu wuhemba Baali. 9Holeka ku soko ya zizo, mu cipango ce nhwanga, nolowusa vipegwa vyangu vyo wuhemba ne divayi. Na kanyhi, nolosola myenda yangu yono namupela ho yavwale. 10Nolomuwopoza myenda yakwe ha mwande ye wendece wakwe, yekale cipwi, hamba hasina yunji mono yalasuma kumuponya ku wulawa mu vilungo vyangu. 11Noloyidumya nyemo yakwe yose ye zisikukuu, ne vilo vyakwe vye ndawo yo mwezi ne zi Sabato, hamonga no wihangulize wawo wose we mikung'ano ye cidini. 12Noloyihodanga mizabibu yakwe ne miganhi, yono yakutya wendece wakwe wamupela ho yawetumamile. Nolopitula migunda yakwe ye mizabibu, ne migunda ye mibici yono yilelaga mikalo, yiwe mbago, ne vilimu vya mu mbago vyoloyihodanga. 13Nolomulipiciza ku soko ye cipango cono yakasemwa 'ne, lono yafusaga wuvumba kuli Baali, no kuvwala wihambo wo wuguzi wukamu, no kuwatyatya wendece wakwe. Vyo yakutya Muwaha Mulungu.
U wendo wo Muwaha Mulungu kuli wanhu wakwe
14Holeka nomugomola sunga ku nyika kanyhi, na ku wulawa kuko, nolomugomola mu nzila yo kulonga nayo nghani zo wendo. 15Na ku wulawa kuko, nomupela kanyhi migunda ye mizabibu yono yali yena, no kulinoza lilolo lyo wugazwe, liwe mulango wo witumbilo. Nayo kohulika 'ne, nha vyono yahulikaga mu vilo vyo wudodo wakwe, lono yaziza ku wulawa Misili. 16Kanyhi mwi'zuwa lilyo kolonyhema “Ishi.” Nhunizo yayo, “Mulume wangu.” Hamba sikolonyhema kanyhi “Baali.” Nhunizo yayo “Mbuya yangu.” 17Nane nolowusiza lukulu matagwa ge zi Baali, si nolomuleka kanyhi yagatambule matagwa gawo.
18Mu vilo vivyo, nolonoza cilagane ne vilimu vyose vya mu mbago ne zindeje, ho vilece kuleta wugaye muli wanhu wangu. Nane nolowusa vitwalo vyose vyo wulugu mu'si, mimaje yose no wupinde. Nolowaleka wanhu wangu wekale wapolile.
19Gwe Isilayeli,
ane nolokunoza wuwe mugolece wangu,
Nolowa nili wa mbeka no wihuwilwa,
Nolokulajila wendo wuwaha no lusungu.
20Nane nolowukamisa wilahize wangu,
no kukunoza agwe wuwe wuli wangu,
nagwe kolomanya 'ne,
vyono yo nene Muwaha Mulungu.
21Mu vilo vivyo nolowupitula wulombe we
wanhu wangu Isilayeli.
22Nolotonyeza mvula mu'si,
nayo yisi yololela wuhemba,
ne zizabibu hamonga na zeyituni.
23Nolowasikamya wanhu wangu mu'si,
no kuwanoza wamoteswe.
Nane nolomuwonela lusungu
mono si yakuwonelwa lusungu,
na kuli wawo wono wacemwaga si wanhu wangu,
nolotya, “Anye muli wanhu wangu,”
nawo wolomhitula watye,
“Agwe yo gwegwe Mulungu wetu.”
Currently Selected:
Hoseya 2: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
