Hoseya 1

1Ayi yo nghani yono Muwaha Mulungu yamulonjela Hoseya, Mwana wa Beyeli, mu vilo vya Uziya, na Yotamu, na Ahazi na Hezekiya, lono wali watemi wa Yuda, na Yelobowamu mwana wa Yehowashi yali mutemi wa Isilayeli.

Mucekulu wa Hoseya ne wanagwe

2Baho lulongozi lono Muwaha Mulungu yalonga ne Waisilayeli mu nzila ya Hoseya, Muwaha Mulungu yakamutya Hoseya, “Wubite wukatole, mucekulu musenyha, sunga ne wanagwe nawo wowa wasenyha nha vyono yenha nyina yawo. Nhavivyo ne wanhu wangu Waisilayeli, nawo wakondya kundeka, alu waweza wasenyha.” 3Holeka Hoseya yakawa kutola mucekulu mono yacemwaga Gomeli, u mwana wa Dibulayimu. Yali yeza kulelwa mwana wawo mulongozi we cilume, 4Muwaha Mulungu yakamutya Hoseya yamucemele litagwa lyakwe Yezeleli, ku soko cikali cipango cidodo du, nomulipiciza mutemi wa Isilayeli, so wuwulaji wono kukuye Yehu yetuma kuli Yezeleli, aluno nane noludumya lulelo lwa Yehu. 5Na mu cipango cico, nolovihodanga vilungo vyo wulugu vye wasilikale we Waisilayeli mwi'lolo lya Yezeleli. 6Gomeli yakalela mwana we kejete wa cicekulu. Muwaha Mulungu yakamutya Hoseya “Mucemelaje Loluhama (nhunizo yayo, ‘Mono si yakuwonelwa lusungu’) ku soko sinolajila wendo kuli Waisilayeli, hamba kuwanenela. 7Langa kuli wanhu wa Yuda, nolajila wendo. Ane no Muwaha Mulungu wawo, nowaponya wene, ninga sinozinoza zizo mu nzila yo wulugu wo mumaje, hamba wo wupinde ne zisonga, hamba we zifwalasi ne wapanda fwalasi.” 8Baho Gomeli yali yeza kumulesa mwanagwe we cicekulu. Yakadinghula 'nda kanyhi, yakatuga mwana yunji wa cilume. 9Muwaha Mulungu yakamutya Hoseya, “Mucemelaje litagwa lyakwe ‘Loami’ (Nhunizo yayo, ‘Si wanhu wangu.’) Ku soko wanhu wa Isilayeli, si wanhu wangu, nane si nili Mulungu wawo.”

Isilayeli wologomolwa

10Ninga i wanhu wa Isilayeli wolowa wenji liwalo lyawo nho musawawa wa mwi'lenga, wono siwusumikaga ku wupimwe hamba ku wuwalwe. Aluno Mulungu yakuwatya, anye si muli wanhu wangu, ninga lizuwa likuza lyono mwene kolowatya, “Anye muli wana wo Mulungu mumi!” 11I wanhu wa Yuda ne wanhu wa Isilayeli, wolokwilunza hamonga. Nawo wolokwihagulila weneco mulongola, na kanyhi, wolokonjelezeka no kumoteswa mu yisi yawo. Heya, lizuwa lya Yezeleli lyolowa yizuwa yiwaha muno!

Currently Selected:

Hoseya 1: LLKWW

Highlight

Copy