Danyeli 12

Lidaha lyo Mudumo

1Nayo malayika mono yali yavwalile myenda ye bafuta, yakanonjela nene Danyeli, yakatya, “Mwi'pango lyono kolokuziza Mikayeli u mulongola we Wamalayika, mono kawadimaga wanhu wako, baho lyolowa yipago lyo wugaye wuwaha muno. Wugaye wono wukali nejela mu madaha go gose, ku wulawa vyono lyamuliziza likungugo, sunga mu madaha gago. Na kolo likuza lidaha lilyo, i wanhu we nghungugo yako, wono matagwa gawo gandicigwe mu citabu co Mulungu, wose wolopona. 2Na wono wakondya kufwa, wose wolozukulwa. Wanji wolozukulilwa mu wumi we cibitilila, na wanji wolotuga cevu no wugaye we cibitilila. 3Ninga i walongola we mahala, wolonga'lala nhe limuli lya ku wulanga. Na wono wawatongaga wanhu wenji, ho wetume ze ling'ani, awo wolong'alala nhe zinyelezi, cibitilila.”

4Yakanonjela kanyhi yakatya, “Danyeli 'gwe, aluno zinghani zizi zeze za cinyele kuli 'gwe, wucigubikaje citabu, wuciwicile ne citanjilo, cilece kugubulwa kanyhi, sunga ku ndumilizo ye yinze. I wanhu wenji wolowa wena lumangho ako na ako, ne mahala gokonjezeka.” 5Hanyuma ya zizo, nghawona wanhu wejete wemile ha nyenje ye likolongo, yumonga yemile mu nyenje ayi kuno, no muyagwe nayo mu nyenje yo lubavu luyagwe. 6Na yumonga muli wene, yakamuwuza malayika mono lulo yali yemile mucanyha ye lilenga lye likolongo, yakamutya, “Alu yosola myaka milinga sunga zinghani zizi zo wizine zize zidume.” 7Nayo malayika yuyo, yakenula miwoko yakwe yose ku wulanga, yakelahiza mwi'agwa lyo Mulungu, mono kekalaga cibitilila. Nane nghamuhulika yakutya, “Yowa myaka midatu na nusu. Na kolo wugazwe we wanhu wo Mulungu wapuluta, baho na zizi zose zolowa zakondya kwijela.” 8Nane nghazihulika zono yalonga, ninga hamba si nasuma kuzizuka yaye. Holeka nghamuwuza nghamutya, “Gwe muwaha wangu, mudumo we zinghani zizi, zowa wule?” 9Nayo malayika yakamhitula yakatya, “Alu Danyeli, wubite, hambi nghani zizi nha zowa za cinyele, kanyhi zowa hundikwe sunga lono mudumo wulaziza. 10Ne wanhu wenji wolokwezwa. Ninga i wabi, hamba si wolozizuka zizo, langa wene wolocila kuwa wabi du. Langa we mahala wo wolozizuka.

11“No wulawilila mu madaha gago, gono vilavywa vye nhondo zose vye makumbiko vyolokwimililwa, ne Liwifyo kolo lyeza kusimywa, vyolopuluta vilo elufu monga, na magana mejete na makumi yicenda. 12Wo wamoti wawo wono wowa wehuwilwa, sunga vize vipulute vilo elufu monga na magana madatu, na makumi madatu na vihano! 13Holeka nagwe Danyeli, weze wuli mwihuwilwa sunga ko ku ndumo. Heya, kofwa, ninga kolozuka kanyhi, wubocele ligawo lyako ha mudumo we vilo.”

Currently Selected:

Danyeli 12: LLKWW

Highlight

Copy