Wutuluce 40

Wusimywe we Lihema lyono lyelile hamonga no wusiwanulwe walyo

1Muwaha Mulungu yakamulonjela Musa yakatya, 2“Gwe Musa, mwizuwa lilongozi lyo mwezi mulongozi, nhondo wulisimye Lihema lyono lyelile. 3Na mugati ye Lihema lilyo, wuwice ne Lisanduku lye Cilagane, hanyuma wuwice ne lipaziya, wulicitize lilyo Lisanduku. 4Hanyuma wuyinjize ne meza, wujelece ne vitumamilwa vyayo vyose mucanyha yayo. Winjize no wuwiko we zitala, wujelece ne zitala zayo, wuwe kuzikoleleza. 5Naco cikumbicilo ce zahabu co kufusiza wuvumba, wuciwice mu wulunji we Lisanduku lye Cilagane, Wuwe kulitumbika ne lipaziya lya ha mulango we Lihema lyono lyelile. 6Hanyuma yayo, wusole cikumbicilo ce cilavywa cinyanywe, naco wuciwice behi no mulango we Lihema lyono lyelile. 7Wucisole ne ciya co kwizuguziza, wucimemye ne malenga naco wuciwice haciligati ye Lihema lyono lyelile ne cikumbicilo cico. 8Hanyuma, wuwe kulipilimya Lihema ne luwa yayo, wuwe kulitumbika ne lipaziya ha mulango we luwa.

9“Hanyuma, wuwe kulisiwanula no kulyeza Lihema lyono lyelile, hamonga ne vitumamilwa vyayo vyose, mu nzila yo kuvibaka vyose mafuta go witile. Nalyo lyowa lyelile. 10Kanyhi wucisiwanule no kuceza cikumbicilo ce cilavywa cinyanywe, mu nzila yiyo yo kucibaka mafuta go witile, hamonga ne vitumamilwa vyayo vyose, naco cowa celile muno. 11Sunga ne ciya co kwizuguziza, naco wucisiwanule no kuceza mu nzila yiyo du.

12“Hanyuma ya zizo, ale wumuceme Haluni hamonga ne wanagwe, waze weme ha mulango we Lihema lyono lyelile, wuwe kuwazuguza. 13Wuwe kumuvwika Haluni vivilya vivwalo vyono vyelile, wuwe kumwitila mafuta go witile, wuwe kumusiwanula, ho yasume kunyitumamila mu mulimo wo wukohani. 14Wuwaceme ne wanagwe, wuwavwice nawo zi shati. 15Hanyuma wuwetile mafuta go witile nha vyono wumunozize Haluni u sogo yawo, nawo nhavivyo ho wanyitumamile mu mulimo wo wukohani. Na mu witilwe we mafuta gago, wonozwa wenjile mu witumami we cibitilila wo wukohani mu zindelo zawo zose.”

16Nayo Musa yakazinoza zizo zose viswanu nha vyono Muwaha Mulungu yamulajiliza. 17Holeka, lyali lyeza kufika lizuwa lilongozi, lyo mwezi mulongozi, wa mu mwaka we kejete, lono wali wakondya kuwuka mu yisi ya Misili, Lihema lyono lyelile, likawa kusimywa. 18Musa yakagawicila matende gayo, yakasimya ne zimbawo zayo, yakazilunza zimbawo hamonga ne mahapa gayo, no kusimya ne masumbili gayo. 19Yakawa kulitandalika lipaziya mucanyha ye Lihema lyono lyelile, yakawa kuligubika ne ligubiko lyalyo, nha vyono yalajilizwa no Muwaha Mulungu. 20Hanyuma, yakawa kuvisola vivilya vibawo vyejete vye mabwe, navyo yakavitajila mugati ye Lisanduku lye Cilagane. Yakagatunjila ne mabici go kulidinghulila Lisanduku lye Cilagane mu zi nyamwidole zalyo, yakawa kulijeleka ligoda lyo Lusungu mucanyha ye Lisanduku. 21Hanyuma, ho yakawa kulinjiza Lisanduku lye Cilagane mugati ye Lihema, yakawa kutumbika ne lipaziya. Na mu nzila yiyo, yakalicitiza Lisanduku lye Cilagane, nha vyono yalajilizwa no Muwaha Mulungu.

22Yakayiwika nayo meza mugati ye Lihema lyono lyelile, yakayiwika ku lubavu lwe sumuka, kunze ye lipaziya. 23Na mucanyha yayo, yakawa kuyijeleka viswanu mikate yono milavywe kuli Muwaha Mulungu, nha vyono yalajilizwa no Muwaha Mulungu. 24Yakawinjiza wuwiko we zitala mugati ye Lihema lyono lyelile, yakawuwika ku lubavu lwa kutakama, vidomile ne meza. 25Yakawa kuzikoleleza zitala zayo hali Muwaha Mulungu, nha vyono yalajilizwa no Muwaha Mulungu. 26Yakaciwika ne cikumbicilo ce zahabu mugati ye Lihema, behi ne lipaziya. 27Yakawa kuwufusa mumo wuvumba we mhunjile swanu, nha vyono yalajilizwa no Muwaha Mulungu. 28Yakawicila lipaziya ha mulango we Lihema lyono lyelile. 29Na ha mwande ye lipaziya lilyo, yakaciwika cikumbicilo ce cilavywa cinyanywe, yakalavya mumo cilavywa cinyanywe ne cilavywa co wusaje, nha vyono yalajilizwa no Muwaha Mulungu. 30Hanyuma, yakaciwika ciya co kwizuguziza haciligati ye Lihema lyono lyelile ne cikumbicilo. Yakagatajila ne malenga mu ciya co kwizuguziza. 31Nayo Musa na Haluni hamonga ne wana wa Haluni, wose wakezuguza miwoko yawo hamonga ne migulu yawo mumo. 32Na mu mapango gose, lono wenjilaga Mwi'hema, hamba lono wasejelelaga ha cikumbicilo, wamulaga wezuguza, hanyuma ho wenjila, nha vyono Musa yalajilizwa no Muwaha Mulungu. 33Na ha ndumilizo, nhondo Musa yakawa kuyinoza luwa, yakalipilimya Lihema lyono lyelile hamonga ne cikumbicilo, yakawa litumbika ne lipaziya ha mulango we luwa. Nhondo, baho Musa ho yakawa yayikondeleza milimo yose.

Livunde, hacanyha ye Lihema lyono lyelile

(Wuw 9:15-23)

34Hanyuma, livunde likaligubika Lihema lyono lyelile, ne nhojo yo Muwaha Mulungu, yikalimemya Lihema. 35Sunga na Musa hamba si yasuma yaye ku winjila mwi 'Hema lyono lyelile, hambi livunde lilyo, nha lyali likaye hacanyha ye Lihema, ne nhojo yo Muwaha Mulungu, yali yimemile mumo. 36Nawo wanhu wa Isilayeli watyatyaga livunde lilyo. Nalyo kolo likuwuka hacanyha ye Lihema, nawo wawukaga mu nghambi yiyo, wawa kutuluka no kujendelela mu muhinzo wawo. Nawo wakawa wakunoza nhavivyo du mu mihinzo yawo yose. 37Na mu mapango gose, lono livunde lilyo lyowa likali lili hacanyha ye Lihema, nawo hamba si wawukaga mu nghambi yiyo. 38Na mu mihinzo yawo yose i wanhu wa Isilayeli, wasumaga kuliwona livunde lilyo lyo Muwaha Mulungu, hacanyha ye Lihema lyono lyelile ku misi. Na ku cilo, moto wakaga mwi'vunde lilyo.

Currently Selected:

Wutuluce 40: LLKWW

Highlight

Compare

Copy