Walawi 1
1
Kuli ze makumbiko ge cilavywa cinyanywe cinhu mututu
1Muwaha Mulungu yakamucema Musa mu wulawa mwi 'Hema lyono lyelile. 2Yakawa kumulonjela ze malajilizo gono Waisilayeli wanojeye wagatyatye lono wakulavya i makumbiko gawo.
Munhu wo wose lono yakulavya mutugo so likumbiko lye cilavywa cinyanywe, yinojeye yiwe yono yikulawa mu mitugo zakwe mweneco, hono yiwe ng'ombe, hamba mhene, hamba ngholo. 3“Na hono yawe yakulavya ng'ombe yakwe, yiwe lyo likumbiko lye cilavywa cinyanywe, yimunojeye yalavye ng'ombe nume, yono yisina cilema cinji. Yayilete ha Mulango we Lihema lyono lyelile, no Mulungu nayo ho kosuma kumubocela. 4No munhu yuyo yimunojeye yawujelece muwoko wakwe mu mutwe wo mutugo wuwo, nawo mutugo wuwo ho wovumilwa ciwe cilavywa co kumunozeza wilamule wakwe. 5Nayo koyiwulajila ng'ombe yiyo baho hali Muwaha Mulungu. Nawo wana wa Haluni i wakohani, woyilavya sakami yayo kuli Muwaha Mulungu, hanyuma wawe kuyimiza mu cikumbicilo cono cili ha mulango we Lihema lyono lyelile, mbavu zose vyono yine. 6Hanyuma yuyo munhu, yayihinze ng'ombe yiyo, yayitemasetemase, 7nawo Wakohani i wana wa Haluni, wawikanize zingwagu mu cikumbicilo no kuzikoleleza. 8Hanyuma wawe kuzijeleka mucanyha yo moto zinyama zi nhemase, hamonga no mutwe, ne mhama yayo. 9Kanyhi yimunojeye munhu yuyo, yasole wutumbu, hamonga ne vima, ne viwoko vye ng'ombe yiyo, yavikweme ne malenga. Nayo mukohani, yacikongoje cilavywa cose hamonga, mu moto mucanyha ye cikumbicilo. Ne mhunjile swanu muno ye cilavywa cico, yikwendeza muno kuli Muwaha Mulungu.
10“Na hono munhu yawe kulavya cilavywa ce ngholo hamba mhene, yimunojeye yalavye nduwilu hamba mvulati yono yisina cilema cinji. 11Nayo yayiwulajile ku lubavu lwe sumuka ye cikumbicilo; Nawo Wakohani i wana wa Haluni, wayimize sakami yayo mu zimbavu zose vyono yine, ze cikumbicilo. 12Nayo munhu kolo yakondya kuyitemasha-temasha, mukohani yayisole nyama yose, hamonga no wutumbu, no mutwe wayo, ne mhama yayo, vyose yavijelece mu moto mu cikumbicilo. 13Ninga munhu yuyo, yamule yavikweme ne malenga, wutumbu hamonga ne vima. Nayo mukohani ho yalilete likumbiko lilyo hali Muwaha Mulungu, yalikongoje mu moto mucanyha ye cikumbicilo. Ne mhunjile swanu muno ye cilavywa cico, yikwendeza muno kuli Muwaha Mulungu.
14“Na hono munhu yawe kulavya cilavywa ce ndeje, ciwe co cilavywa cinyanywe, yimunojeye yalavye nghunda, hamba macinda ge nziwa. 15Nayo Mukohani yayilete ha cikumbicilo, yayinyongotole singo, yawe kuwukongoga mutwe wayo mu moto mucanyha ye cikumbicilo. Langa sakami yayo, yayisuluzize ha mhelo, ha lubavu lwe cikumbicilo. 16Ninga yawuse lisolelo hamonga ne mazoya gayo, yavitaje ku lubavu lwa kucilima ye cikumbicilo, kono walundaga. 17Hanyuma yayitandakule ndeje yiyo mabawa gayo no kuyikata, ninga yalece kugadumula mabawa gayo. Hanyuma yawe kuyikongoga yose mu moto mucanyha ye cikumbicilo. Ne mhunjile swanu muno ye cilavywa cico, yikwendeza muno kuli Muwaha Mulungu.
Currently Selected:
Walawi 1: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
